ខេត្តកំពង់ធំ ៖ ខេត្តកំពង់ធំក៏ដូចជាបណ្តាខេត្តនានាក្នុងប្រទេសដែរ បញ្ហាទំនាស់ដីធ្លីនិងបញ្ហាចាប់យកដីព្រៃរបស់រដ្ឋនៅតែបន្តកើតមាន តែត្រូវបានកម្លាំងសមត្ថកិច្ចនិងអាជ្ញាធរស្រុក-ខេត្តព្យាយាមធ្វើការសម្របសម្រួលនិងដោះស្រាយទប់ស្កាត់បាននូវរាល់អំពើហិង្សាមិនឱ្យកើតមាន ។ យោងតាមរបាយការណ៍របស់ស្នងការដ្ឋាននគរបាលខេត្តកំពង់ធំបានឱ្យដឹងថា នៅក្នុងខែមិថុនា កន្លងទៅនេះ សកម្មភាពប្រជាពលរដ្ឋប្រមូលផ្តុំគ្នាកើតមានចំនួន៣លើក ក្នុងនោះបញ្ហាទំនាស់ដីធ្លីមាន២លើក នៅស្រុកកំពង់ស្វាយ និងបញ្ហាចាប់យកដីរដ្ឋក្នុងដែនជម្រកសត្វ១លើក នៅស្រុកប្រាសាទបល្ល័ង្ក ។
ទាក់ទងទៅនឹងសកម្មភាពរបស់ប្រជាពលរដ្ឋខាងលើ គឺនៅដើមខែមិថុនា មានប្រជាពលរដ្ឋស្រុកប្រាសាទបល្ល័ង្ក បានប្រមូលផ្តុំគ្នាប្រមាណ៧៣គ្រួសារ មកពី៤ភូមិ ក្នុងនោះនៅឃុំសាគ្រាម ៣ភូមិ គឺភូមិពាមអាទិត្យ ភូមិវាលថ្នល់ និងភូមិសាគ្រាម។ ចំណែកឃុំដូងមាន១ភូមិ គឺភូមិដូង បានធ្វើសកម្មភាពចាប់យកដីរដ្ឋដោយខុសច្បាប់ ក្នុងតំបន់ដែនជម្រកសត្វព្រៃ បឹងពែរ ត្រង់ចំណុចតំបន់ថ្លុក ក្នុងឃុំសាគ្រាម ។ ផ្តើមចេញពីសកម្មភាពខាងលើ កម្លាំងប៉ូលិសស្រុកប្រាសាទបល្ល័ង្កសហការជាមួយមន្ត្រីបរិស្ថានប្រចាំការនៅទីនោះបានធ្វើការចាប់ឃាត់ខ្លួនជន២នាក់ ជាសមាជិកក្រុមប្រឹក្សាឃុំសាគ្រាមតាមបញ្ជារបស់ព្រះរាជអាជ្ញាអមសាលាដំបូងខេត្ត ក្នុងនោះមានម្នាក់ឈ្មោះសូ សំអឿ ភេទប្រុស អាយុ៥១ឆ្នាំ ជាជំទប់ទី១ ឃុំសាគ្រាម មកពីគណបក្សហ៊្វុនស៊ិនប៉ិច និងម្នាក់ទៀតឈ្មោះអ៊ា អឿ ភេទប្រុស អាយុ៥៩ឆ្នាំ ជាជំទប់ទី២ ឃុំសាគ្រាម មកពីគណបក្សសម រង្ស៊ី ។ ពួកគេទាំង២នាក់រស់នៅភូមិវាលថ្នល់ ឃុំសាគ្រាម ស្រុកប្រាសាទបល័្លង្ក ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី ។
ដោយឡែក នៅស្រុកកំពង់ស្វាយ កើតមានសកម្មភាពប្រមូលផ្តុំ២លើក គឺលើកទី១ នៅដើមខែមិថុនា មានប្រជាពលរដ្ឋប្រមាណ១០០នាក់មកពី៣ភូមិ ក្នុងឃុំសាន់គរ បានមកប្រមូលផ្តុំគ្នាធ្វើបាតុកម្មបង្កការអុកឡុកគំរាមមកលើកម្លាំងប៉ូលិស និងតំណាងក្រុមហ៊ុនអភិវឌ្ឍន៍ធ្វើស្រែប្រាំង ដួងហេង សេង ស៊ុនណា និងគំរាមដុតគ្រឿងចក្រមិនឱ្យដំណើរការជីកប្រឡាយព័ទ្ធជុំវិញធ្វើព្រំដីរបស់ក្រុមហ៊ុននៅតំបន់ឈូកវ៉ាន់ ក្នុងភូមិសាស្ត្រឃុំសាន់គរ ។
បន្ទាប់ពីទទួលបានបទបញ្ជារបស់ព្រះរាជអាជ្ញា និងស្នងការនគរបាលខេត្ត ប៉ូលិសស្រុកកំពង់ស្វាយបានចុះឃាត់ខ្លួន ជនម្នាក់ឈ្មោះឃាន សឿន ភេទប្រុស អាយុ៥៣ឆ្នាំ មានទីលំនៅភូមិប្រាសាទអណ្តែត ឃុំសាន់គរ ស្រុកកំពង់ស្វាយ បញ្ជូនមកសាលាដំបូងខេត្តដោយចោទប្រកាន់ពីបទគំរាមកំហែង និងបំផ្លិចបំផ្លាញទ្រព្យសម្បត្តិអ្នកដទៃ ហើយត្រូវឃុំខ្លួនជាបណ្តោះអាសន្ន ។ លើកទី២ កាលពីថ្ងៃទី៦ មិថុនា ២០១១ មានប្រជាពលរដ្ឋមកពី៤ភូមិ ក្នុងឃុំសាន់គរ ស្រុកកំពង់ស្វាយប្រមាណ២៧០នាក់ បានមកប្រមូលផ្តុំគ្នានៅមុខសាលាខេត្តដើម្បីសុំជួបអភិបាលខេត្ត ឱ្យជួយដោះស្រាយបញ្ហាមួយចំនួន ១-សុំឱ្យតុលាការដោះលែងឈ្មោះឃាន សឿន ២-សុំកុំឱ្យមានការចោទប្រកាន់អ្នកដែលជាប់ពាក់ព័ន្ធថាជាមេខ្លោង ៣-សុំឱ្យជួយដោះស្រាយបញ្ហាដីស្រែដែលពាក់ព័ន្ធជាមួយក្រុមហ៊ុនដួងហេង ។ ករណីនេះ អភិបាលខេត្តបានទទួលសំណូមពររបស់ប្រជាពលរដ្ឋ ដើម្បីដោះស្រាយពេលក្រោយ ទើបប្រជាពលរដ្ឋទាំងអស់យល់ព្រមវិលត្រឡប់ទៅលំនៅឋានវិញ ។
លោកអ៊ឹម វណ្ណា តំណាងក្រុមហ៊ុនដួងហេង បានប្រាប់កោះសន្តិភាពតាមទូរស័ព្ទកាលពីថ្ងៃទី២៦ មិថុនា ឱ្យដឹងថា ក្រុមហ៊ុនបានទទួលច្បាប់ធ្វើការអភិវឌ្ឍន៍ស្រូវប្រាំងនៅតំបន់នេះលើផ្ទៃដី១.៩១៧,៧៨ហិកតា តាំងពីឆ្នាំ២០០៥ ។ លុះដល់ឆ្នាំ២០០៧ ស្រាប់តែមានបាតុភាពពីប្រជាពលរដ្ឋមួយចំនួនថា ក្រុមហ៊ុនធ្វើប៉ះលើដីស្រែរបស់ពួកគាត់ ។ ពេលនោះ ក្រុមហ៊ុនបានសហការជាមួយអាជ្ញាធរមូលដ្ឋានដើម្បីធ្វើការត្រួតពិនិត្យឡើងវិញ ទើបក្រុមហ៊ុនសម្រេចឱ្យតែចំពោះប្រជាពលរដ្ឋទាំងឡាយណាដែលធ្វើស្រែនៅតំបន់នេះមុនឆ្នាំ២០០៥ គឺក្រុមហ៊ុននឹងប្រគល់ដីស្រែឱ្យវិញ ។ ប៉ុន្តែចំពោះប្រជាពលរដ្ឋដែលទៅកាប់ឆ្ការព្រៃចាប់យកដី ក្រោយពេលដែលក្រុមហ៊ុនបានច្បាប់គ្រប់គ្រងនៅតំបន់នេះហើយ ក្រុមហ៊ុនមិនអាចប្រគល់ដីឱ្យបានទេ។ ហេតុនេះហើយបានជាប្រជាពលរដ្ឋចុងក្រោយនេះដោយមានអ្នកដឹកនាំផង បានប្រមូលផ្តុំគ្នា ធ្វើការតវ៉ាទាមទារយកដីរបស់ក្រុមហ៊ុនទៅវិញ រហូតមានការប្តឹងប្តល់ ។
បន្ទាប់ពីបានចុះធ្វើការស៊ើបអង្កេតហើយកាលពីឆ្នាំ២០១០ តុលាការខេត្តសម្រេចកាត់ក្តីឱ្យក្រុមហ៊ុនឈ្នះ តែពួកគេនៅតែជំទាស់ដោយមានមេខ្លោងដឹកនាំប្រជាពលរដ្ឋទៅប្តឹងរហូតដល់សាលាឧទ្ធរណ៍ទៀត ។ ពេលនោះសាលាឧទ្ធរណ៍ក៏បានកាត់ឱ្យក្រុមហ៊ុនឈ្នះក្តីកាលពីពេលថ្មីៗនេះទៀត ទើបក្រុមហ៊ុននាំគ្រឿងចក្រទៅដំណើរការជីកប្រឡាយព័ទ្ធជុំវិញ ដើម្បីធ្វើព្រំដីរបស់ខ្លួនហើយក៏មានហេតុការណ៍ដូចខាងលើ ៕
ចែករំលែកព័តមាននេះ