រាជធានីភ្នំពេញ៖ តារាសម្តែងជើងចាស់អ្នកនាង រ៉េត រ៉ូស បានធ្វើការផ្តាំផ្ញើដល់អ្នកសិល្បៈជំនាន់ក្រោយត្រូវមានការប្រុងប្រយ័ត្នចំពោះពេលវេលានៅក្នុងការថត ដោយធ្វើយ៉ាងណាកុំអោយមានការកេងប្រវ័ញ្ចពីផលិតករមួយចំនួន ។ ការលើកឡើងខាងលើពីអ្នកនាង រ៉េត រ៉ូស…
រាជធានីភ្នំពេញ៖ តារាសម្តែងជើងចាស់អ្នកនាង រ៉េត រ៉ូស បានធ្វើការផ្តាំផ្ញើដល់អ្នកសិល្បៈជំនាន់ក្រោយត្រូវមានការប្រុងប្រយ័ត្នចំពោះពេលវេលានៅក្នុងការថត ដោយធ្វើយ៉ាងណាកុំអោយមានការកេងប្រវ័ញ្ចពីផលិតករមួយចំនួន ។
ការលើកឡើងខាងលើពីអ្នកនាង រ៉េត រ៉ូស នាពេលនេះ បានធ្វើឡើងបន្ទាប់ពីអ្នកនាងបានពើបប្រទះនូវបញ្ហាមួយនេះរួចហើយ និងមិនមានដំណោះសមស្របណាមួយឡើយ ។ អ្នកនាង រ៉េត រ៉ូស បានលើកឡើងតាមរយៈសំណេរបង្ហោះលើបណ្តាញសង្គមថា សូមផ្ដាំដល់បងប្អូនសិល្បករពេលដែលទទួលគេថតត្រូវសួរឱ្យច្បាស់ពីពេលវេលាកុំឲ្យខកចិត្តដូចខ្ញុំ ។
អ្នកនាងបញ្ជាក់ថា ផលិតករមួយចំនួនតូចកេងប្រវ័ញ្ចលើកម្លាំងញើសឈាមតួចាស់ៗខ្លាំងណាស់ ឱ្យយើងទៅដល់ទីតាំងម៉ោង 7 និង30ព្រឹក ថតរហូតដល់ស្អែកឡើងម៉ោង6:00 ព្រឹកវិញបានចប់។ សុំសួរមតិបងប្អូនបន្តិច តើការគិតលុយឲ្យតែមួយថ្ងៃត្រឹមត្រូវដែរទេ សូមខំមិនគាំម្នាក់មួយមក តែខ្ញុំបានប្រាប់ថាខ្ញុំសុំគិត2ថ្ងៃ តែខាងផលិតកម្មនៅតែគិតឲ្យ១ថ្ងៃ ដូចជាបំបាក់ទឹកចិត្តយាយចាស់តាចាស់ពេកហើយ ។
អ្នកនាងបន្តថា ពេលតួចាស់ៗ គេមិនហៅថតកាន់តែក្រគ្មានលុយទិញថ្នាំ បែរជានិយាយបែបមើលងាយថា ចាស់ៗសុំតែជំនួយ ចុះពេលដែលហៅគាត់ថតមួយរឿងមានប៉ុន្មានថ្ងៃ? ហើយមួយថ្ងៃឲ្យគាត់ប៉ុន្មានដែរ? នេះហើយជាហេតុផលដែលតួចាស់ដូចខ្ញុំកាន់តែក្រ ។
អ្នកនាង រ៉េត រ៉ូស ក៏បានលើកឡើងចំៗទៅកាន់ផលិតកម្មមួយថា (Angkor Film )អង្គរហ្វីមសុំសន្យាថា នឹងផលិតរឿងអប់រំល្អៗដូចជា ៖
១-រឿងដណ្ដើមហុងស៊ុយ
២-រឿងអ្នកក្រ ភាគទី ១ និងភាគទី ២
៣-រឿងធ្វើបុណ្យទាន់ខែភ្លឺ ។
យើងទើបតែថតចប់ (រឿងលុយសែន) ហើយអង្គរហ្វីមក៏សន្យាថា មិនជំពាក់លុយតួ មិនគេងប្រវ័ញ្ចលើម៉ោងតួ ក្រុមខ្ញុំធ្វើទៅតាមលទ្ធភាព បើមិនមានលុយសម្រាប់ចាយឲ្យតួគឺសុំឱ្យតួជួយថតត្រង់ៗតែម្ដង សម្ដីពិតនិយាយពិតធ្វើពិតពីនាងខ្ញុំ រ៉េត រ៉ូស និងប្អូនៗក្រុមការងារ ។
ជាការកត់សម្គាល់នេះ មិនមែនជាលើកទីមួយទេ ដែលតារាសម្តែងអ្នកនាង រ៉េត រ៉ូស បានទម្លាយនូវរឿងអាស្រូវមួយចំនួនដែលបានកើតនៅក្នុងពិភពសិល្បះខ្មែរ។ កន្លងមក តារារូបនេះក៏ធ្លាប់បានលើកឡើងបញ្ហាមួយដែលបានកើតឡើងលើរូបនាង និងអ្នកសិល្បៈមួយចំនួនទៀត ពាក់ព័ន្ធការថតចប់ហើយ មិនទូទាត់លុយតាមការកំណត់។
អ្នកនាងបានលើកឡើងតាមរយៈសំណេរបង្ហោះលើបណ្តាញសង្គមថា រឿងថតតាំងពីថ្ងៃទី10 ខែ10 មកដល់ថ្ងៃនេះ ហើយរឿងចាក់បញ្ចាំងចង់ចប់ហើយនៅឡើយតែលុយមិនបើកឱ្យ នេះហើយជាមូលហេតុដែលតួចាស់ៗឈឺអត់មានលុយទិញថ្នាំ អត់លុយឱ្យថ្លៃឈ្នួលផ្ទះ ពេលខ្លះត្រូវម្ចាស់ផ្ទះដេញចេញកុំឆ្ងល់ទៀត។
អ្នកនាងបញ្ជាក់ថា ពេលពេលហៅយើងថតនិយាយស្រួលណាស់ មិនឱ្យយូរទេ អ្នកម្ដាយលើកហ្នឹងតែពេលថតចប់ជួយហើយឆាតទៅសុំបើកលុយមិនមើលឆាតយើងផង ចរិតធូរថ្លៃមែន។
នាងថា កុំឆ្ងល់ថា ហេតុអីតួកុនចាស់ៗកាន់តែក្រនេះ ហើយជាមូលហេតុ។ ខ្ញុំមិនចង់និយាយទេតិចទៀតដឹងហើយចេះតែកេងប្រវ័ញ្ចកម្លាំងញើសឈាមមនុស្សចាស់ទៅកើតអត់ខ្លាចចុះនរកទេ ៕
ចែករំលែកព័តមាននេះ