ខេត្តបាត់ដំបង៖ ភ្ញៀវជាតិនិងភ្ញៀវអន្តរជាតិប្រមាណជាង៣៦ម៉ឺននាក់ ដែលមន្ទីរជំនាញអះអាងថា មានការកើនឡើងជាងឆ្នាំមុនៗ បានចូលរួមទស្សនាកម្សាន្តក្នុង«ព្រឹត្តិការណ៏ពិព័រណ៏ម្ហូបខ្មែរ» រយៈពេល០៣ថ្ងៃ ដែលរដ្ឋបាលខេត្តដ៏មានវ័យចំណាស់មួយនេះ រៀបចំធ្វើឡើងចំកណ្ដាលបេះដូង ក្រុងបាត់ដំបង ដើម្បីចូលរួមស្វាគមន៏ឆ្នាំថ្មី ឆ្នាំសកល ២០២៥ ។

តាមរយៈរបាយការណ៏មន្ទីរទេសចរណ៏ លោក អ៊ុច អ៊ុំភីនីស្សារ៉ា ប្រធាន នៃមន្ទីរនេះ បានឲ្យដឹងថា ក្នុង «ព្រឹត្តិការណ៏ពិព័រណ៏ម្ហូបខ្មែរ» ដើម្បីចូលរួមស្វាគមន៏ឆ្នាំថ្មី (ឆ្នាំសកល២០២៥) នាដំណាច់ឆ្នាំនេះ មានភ្ញៀវចូលរួមកើនឡើងជាងឆ្នាំមុន២,៩០% បើប្រៀងធៀបទៅនឹងឆ្នាំមុន (២០២៤) ដែលមានរយៈ០៣ដូចគ្នា។ ប៉ុន្តែនៅក្នុងរបាយការណ៏ លោកប្រធានមន្ទីរទេសចរណ៏រូបនេះ មិនបានប្រាប់ពីមូលហេតុ ដែលនាំឲ្យមានការកើនឡើង នៃភ្ញៀវចូលរួមកម្សាន្តក្នុងឪកាសឆ្លងសកលនេះទេ។

«ព្រឹត្តិការណ៏ពិព័រណ៏ម្ហូបខ្មែរ» ជារៀងរាល់ដំណាច់ឆ្នាំសកល រដ្ឋបាលខេត្តបាត់ដំបង រួមជាមួយនឹងមន្ទីរនានាក្រោមវ៉ាទ បានចូលរួមរៀបចំព្រឹត្តិការណ៏នេះឡើងនៅតាមដងវិថីនានា ចំកណ្ដាលក្រុងបាត់ដំបង។ ជាទូទៅព្រឹត្តិការណ៏នេះ រដ្ឋបាលខេត្ត តែងធ្វើឡើងរយៈពេល០៣ថ្ងៃ នាចុងខែធ្នូ (២៩, ៣០, ៣១,ធ្នូ ២០២៤) ។

នៅក្នុងពិព័រណ៏ម្ហូបខ្មែរនេះ ក្រៅពីការដាក់តាំងម្ហូបអាហារ និង នំចំណីខ្មែរ រាប់រយមុខរបស់អ្នកខេត្តបាត់ដំបង គេក៏ឃើញមានការដាក់តាំងលក់ទំនិញគ្រប់ប្រភេទរាប់រយតូបផងដែរ លើដងផ្លូវអមដងស្ទឹងសង្កែ ជាមួយនឹងការប្រគុំតន្រ្តីរបស់ក្រុមហ៊ុនផលិតផលនានាទៀតផង។

លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៏ខេត្ត បាននិយាយនៅក្នុងរបាយការណ៏ថា ក្នុង«ព្រឹត្តិការណ៏ពិព័រណ៏ម្ហូបខ្មែរ» រយៈពេល០៣ថ្ងៃ សម្រាប់ដំណាច់ឆ្នាំ២០២៤ ស្វាគមន៏ឆ្នាំថ្មី ឆ្នាំសកល ២០២៥ ស្ថិតិ​ភ្ញៀវ​ទេសចរ​ដែល​បាន​មក​កម្សាន្ត​ក្នុងពិធី​អបអរសាទរ ពិធី​បុណ្យចូលឆ្នាំ​ថ្មី ឆ្នាំ​សកល ឆ្នាំ​២០២៤-២០២៥ នា​ថ្ងៃ​ទី​២៩-៣១ ខែធ្នូ ឆ្នាំ​២០២៤ មាន​ដូច​ខាងក្រោម​៖

ស្ថិតិ​ភ្ញៀវ​ទេសចរ​ថ្ងៃ​ទី​២៩-៣១ ខែធ្នូ ឆ្នាំ​២០២៤ មាន​៖
-​ភ្ញៀវ​ជាតិ មាន​ចំនួន ៣៦៣,០២៨ នាក់ មានការ​កើនឡើង ២.៩០% បើ​ធៀប​ឆ្នាំ​២០២៣ មាន​ចំនួន ៣៥២,៧៩០ នាក់
-​ភ្ញៀវ​អន្តរជាតិ មាន​ចំនួន ១,០២៧ នាក់ មានការ​កើនឡើង ១១.៨៧% បើ​ធៀប​ឆ្នាំ​២០២៣ មាន​ចំនួន ៩១៨ នាក់
-​ភ្ញៀវ​ទេសចរ​សរុប មាន​ចំនួន ៣៦៤,០៥៥ នាក់​មានការ​កើនឡើង ២,៩៣ % បើ​ធៀប​ឆ្នាំ​២០២៣ មាន​ចំនួន ៣៥៣,៧០៨ នាក់ ។​

របាយការណ៏របស់មន្ទីរទេសចរណ៏នេះ បានបង្ហាញតែពីចំនួនភ្ញៀវទេសចរណ៏ ដែលបានចូលរួមភ្លូកទឹក ភ្លូកដី រយៈពេល០៣ថ្ងៃក្នុង «ព្រឹត្តិការណ៏ពិព័រណ៏ម្ហូបខ្មែរ» ដើម្បីស្វាគមន៏ឆ្នាំថ្មី ឆ្នាំសកល២០១៥ តែមិនបានចងញងុលបង្ហាញពីមូលហេតុ នៃការកើនឡើងរបស់អ្នកចូលរួមឆ្លងឆ្នាំនេះទេ។ ប៉ុន្តែបើតាមការពិនិត្យ និង តាមការលើកឡើងពីមន្រ្តីរដ្ឋបាលខេត្ត បាននិយាយត្រូសៗថា ក្នុង«ព្រឹត្តិការណ៏ពិព័រណ៏ម្ហូបខ្មែរ» ខាងលើនេះ ហាក់មានមនុស្សម្នាដើរលេងច្រើនគូរកត់សម្គាល់មែន តែការចាយវាយថវិការ ហាក់មានកំរិតទាបបំផុត។ ប្រភពដដែលបានបញ្ជាក់ថា ពិតមែនយើងមើលឃើញមានអ្នកដើរលេងច្រើន តែអ្នកលក់ដូរទំនិញនានា ក្នុងព្រឹត្តិការណ៏នេះ ស្ទើរគ្រប់ៗគ្នាសុទ្ធតែបានរអ៊ូរទាំថា «ខាតឡុងចុង»៕