«ពេលខ្លះ ការបញ្ចប់មិនមែនដោយសារតែអស់ស្រលាញ់ ប៉ុន្តែដោយសារតែការរស់នៅជាមួយគ្នាមិនចុះសម្រុង» នេះជាការលើកឡើងរបស់តារាភេទទីបី នាង ផេន ខេក នៅលើបណ្តាញសង្គម ដើម្បីបញ្ជាក់ប្រាប់មហាជនពីការបែកបាក់គូជាថ្មីម្តងទៀតរបស់នាង។ តាមពិតទៅ…
«ពេលខ្លះ ការបញ្ចប់មិនមែនដោយសារតែអស់ស្រលាញ់ ប៉ុន្តែដោយសារតែការរស់នៅជាមួយគ្នាមិនចុះសម្រុង» នេះជាការលើកឡើងរបស់តារាភេទទីបី នាង ផេន ខេក នៅលើបណ្តាញសង្គម ដើម្បីបញ្ជាក់ប្រាប់មហាជនពីការបែកបាក់គូជាថ្មីម្តងទៀតរបស់នាង។
តាមពិតទៅ ផេក ខេក និងគូស្នេហ៍របស់នាង គ្រោងនឹងដឹកដៃគ្នាចូលរោងការក្នុងពេលឆាប់ៗខាងមុខនេះ បន្ទាប់ពីអ្នកទាំងពីរបានស្វែងយល់ចិត្តគ្នាអស់រយៈពេលប៉ុន្មានឆ្នាំចុងក្រោយនេះ ។ យ៉ាងណា ជាអកុសល្យចំណងស្នេហ៍របស់តារាភេទទីបីនេះ មិនអាចឈានដល់ក្រាបសំពះផ្ទឹមការតាមគន្លងប្រពៃណីនោះឡើយ ពោលអ្នកនាងទាំងពីរបានសម្រេចចែកផ្លូវគ្នាវិញ ខណៈពេលដែលនេះជាថ្មីម្តងទៀត ដែល ផេន ខេក ជួបរឿងខកចិត្តពាក់ព័ន្ធនឹងដៃគូជីវិត ។ ការចេញមកបញ្ជាក់ពីការបែកបាក់ស្នេហារបស់ ផេន ខេក នាពេលនេះ បានធ្វើឡើង បន្ទាប់ពីនាងបានបញ្ចេញវីដេអូបង្ហាញពីការយំយែក ទួញសោក និងការបាក់ទឹកចិត្តយ៉ាងខ្លាំង ។
ដំបូងឡើយ តារាភេទទីបីរូបនេះ មិនបានបញ្ជាក់មូលហេតុអ្វីឡើយ នៅក្រោយវីដេអូដែលនាងយំសស្រាក់បែបនេះ ពោលនាងគ្រាន់តែភ្ជាប់ជាមួយនឹងសំណេរខ្លីថា នៅពីក្រោយមនុស្សស្រីម្នាក់ដែរតែងតែនិយាយថា «មិនអីទេ» ប៉ុន្តែក៏ជាមនុស្សស្រីម្នាក់ដែរ តែងតែយំស្ងាត់ៗ ហើយសួរខ្លួនឯងថា ហេតុអីជីវិតមួយនេះតែងតែ អយុត្តិធម៌សម្រាប់ខ្ញុំ..! ។
យ៉ាងណា ក្រោយពីមហាជន ជាពិសេស បណ្តាអ្នកគាំទ្របានសម្តែងក្តីបារម្ភ និងជជីកសួរអំពីមូលហេតុអ្វីនោះ ទីបំផុត ផេន ខេក ក៏បានដាច់ចិត្តទម្លាយរឿងរ៉ាវនៃការបែកបាក់គូស្នេហ៍ជាសាធារណៈ ។
តាមរយៈបណ្តាញសង្គម តារាភេទទីបី នាង ផេន ខេក បានលើកឡើងថា ពេលខ្លះ ការបញ្ចប់ មិនមែនដោយសារតែអស់ស្រលាញ់ ប៉ុន្តែដោយសារតែការរស់នៅជាមួយគ្នាមិនចុះសម្រុង ។
ការបញ្ចប់ មិនមែនជាការបរាជ័យទេ ប៉ុន្តែជាការជ្រើសរើសសន្តិភាព សម្រាប់ខ្ញុំ និងគាត់។
នាងបញ្ជាក់ថា ពេលខ្លះ ការលែងដៃគ្នា គឺជាវិធីតែមួយ ដែលអាចរក្សាការគោរព និងអនុស្សាវរីយ៍ល្អៗ ដែលធ្លាប់មាន ។
តាមរយៈសំណេរខាងលើនេះ គឺជាការបញ្ជាក់យ៉ាងច្បាស់ថា ចំណងស្នេហ៍របស់នាងបានឈានដល់ផ្លូវបំបែកហើយ ខណៈពេលគម្រោងការនឹងរៀបចំពិធីមង្គលការនៅក្នុងពេលខាងមុខនេះ ក៏មិនអាចចេញជារូបរាងនោះដែរ ។
ទោះជាយ៉ាង ក្រោយឮដំណឹងនេះ គេឃើញមហាជន ពិសេសមិត្តភក្តិក្នុងសិល្បៈដូចគ្នាបាននាំគ្នាចូលរួមលើកទឹកចិត្តទៅដល់ ផេន ខេក និងស្នើអោយនាងមានភាពរឹងមាំ កុំបាក់ទឹកចិត្ត និងតស៊ូដើរទៅមុខបន្តទៀត ។
ជាការកត់សម្គាល់ នេះមិនមែនជាលើកទីមួយទេ ដែលតារាភេទទីបីនាង ផេន ខេក បានពើបប្រទះនូបការបែកបាក់ស្នេហា ពោលកន្លងមកនាង ធ្លាប់ជួបស្នេហ៍បរាជ័យជាច្រើនលើកច្រើនសារមកហើយ ដោយក្នុងនោះ នាងក៏ធ្លាប់បែកបាក់ចំណងអាពាហ៍ពិពាហ៍ម្តងរួចមកហើយដែរ ៕
ចែករំលែកព័តមាននេះ