រាជធានីភ្នំពេញ៖ ថ្លែងជាថ្មី សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់បន្ថែមលើការបង្ក្រាបក្មេងទំនើងទៅអប់រំក្នុងពន្ធនាគារ គឺជាកិច្ចការមួយដែលរាជរដ្ឋាភិ បាល មិនចង់ប្រើប្រាស់ច្បាប់មកអនុវត្តឡើយ…
រាជធានីភ្នំពេញ៖ ថ្លែងជាថ្មី សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់បន្ថែមលើការបង្ក្រាបក្មេងទំនើងទៅអប់រំក្នុងពន្ធនាគារ គឺជាកិច្ចការមួយដែលរាជរដ្ឋាភិ បាល មិនចង់ប្រើប្រាស់ច្បាប់មកអនុវត្តឡើយ តែដោយសារគ្មានជម្រើស និងដើម្បីសង្គមជាតិ ត្រូវតែចាប់ឱ្យអស់ មិនត្រូវឱ្យមានសកម្មភាពក្មេងទំនើងចេញមកអុកឡុកក្នុងសង្គមឡើយ ។
ថ្លែងក្នុងក្នុងពិធីសំណេះសំណាលជាមួយសិស្សនិទ្ទេសA សម្រាប់ការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ នៅព្រឹកថ្ងៃទី២៣ ខែធ្នូ ឆ្នាំ២០២៤ សម្តេចបវតធិបតី ហ៊ុន ម៉ាណែត បានគូសបញ្ជាក់ថា «យើងមិនចង់អនុវត្តច្បាប់ទេ ក្រុមក្មេងទំនើង ថ្ងៃមុនខ្ញុំសួរ យើងដាក់ក្នុងយុទ្ធនាការ ដូចនៅក្នុងពន្ធនាគារ ដូចជាង២០០នាក់ ។ អត់ទាន់លែង ព្រោះខ្ញុំអត់អោយ ត្រូវអប់រំ មែនចាប់លែងៗ ព្រោះអ្នកឯងធ្វើបាបខ្លួនឯង ធ្វើបាបឪពុកម្តាយ ធ្វើបាបគេនាំឱ្យគេខូចទៀត តែប៉ុណ្ណឹងហើយ នៅមានចេញមកទៀត ខ្ញុំដាក់អភិបាលខេត្តទាំងអស់ ស្នងការខេត្តទាំងអស់ រាជធានី ធ្វើមិចចេញមកបង្ក្រាបៗ ទាល់តែអស់តែម្តង ទុកអ្នកដែលធ្វើការល្អ នៅព្រៀតក្នុងសង្គមនឹងទៅ»។
ជាមួយគ្នានោះដែរ សម្តេចបវរធិបតី ក៏បានណែនាំដល់សិស្សានុសិស្ស និងអាណាព្យាបាល មានមាតាបិតាសិស្ស ឬយុវជនទាំងអស់ ត្រូវពិនិត្យតាមដានកូនៗរបស់ខ្លួន កុំឱ្យក្លាយជាក្មេងទំនើង ព្រោះរាជរដ្ឋាភិបាល គ្មានបំណងចង់អនុវត្តច្បាប់ ទៅលើយុវជនក្មេងទំនើងនោះទេ តែដោយសារគ្មានជម្រើស ។
សម្តេចបវរធិបតីបានបន្ថែមថា «យើងគ្មានបំណងធ្វើបែបនេះទេ ការដាក់អនុវត្តច្បាប់យើងគ្មានជម្រើស ព្រោះធ្វើឱ្យខូចអនាគតក្មួយផង ប៉ុន្តែបើយើងមិនធ្វើគាត់នៅតែខូច ចឹងយល់ល្អកែល្អ កែខ្លួនឯងទៅ រួមគ្នាឪពុកម្តាយ សាលា រួមគ្នាកែក្មួយៗឱ្យទាន់ពេល» ។
សូមបញ្ជាក់ផងដែរថា សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្លាប់បានគូសបញ្ជាក់ថា ការចាត់វិធានការឱ្យបានម៉ឺងម៉ាត់ លើក្មេងទំនើង ឈរលើគោលដៅ ៤ចំណុច៖ ១-ជួយតម្រង់ទិសឱ្យក្មួយល្អ, ២-ជួយការពារអាយុជីវិត និងទ្រព្យសម្បត្តិរបស់ក្មួយ ទាំងអ្នកបង្ក និងអ្នករងគ្រោះ, ៣-ជួយការពារឪពុកម្តាយ និងក្រុមគ្រួសារ កុំខ្លោចផ្សាចិត្ត និងទី៤-ជួយសង្គម និងប្រជាជន ឱ្យរស់នៅដោយគ្មានភាពភ័យខ្លាច៕
ចែករំលែកព័តមាននេះ