រាជធានីភ្នំពេញ ៖ ចោរ២នាក់ បានធ្វើសកម្មភាពលួចកាច់សោ.កម៉ូតូរបស់បុរសអ្នកឡើងត្នោតម្នាក់ ដែលទុកនៅក្រោមដើមត្នោត ហើយរវល់តែឡើងទៅដាក់ទឹកត្នោតនៅលើចុង ប៉ុន្តែពេលលួចបានឡើងជិះប្រុងគេចខ្លួន ស្រាប់តែជ្រុះស្បែកជើងផ្ទាត់១ចំហៀង ។ ខណៈនោះ…
រាជធានីភ្នំពេញ ៖ ចោរ២នាក់ បានធ្វើសកម្មភាពលួចកាច់សោ.កម៉ូតូរបស់បុរសអ្នកឡើងត្នោតម្នាក់ ដែលទុកនៅក្រោមដើមត្នោត ហើយរវល់តែឡើងទៅដាក់ទឹកត្នោតនៅលើចុង ប៉ុន្តែពេលលួចបានឡើងជិះប្រុងគេចខ្លួន ស្រាប់តែជ្រុះស្បែកជើងផ្ទាត់១ចំហៀង ។
ខណៈនោះ លោកចោរក៏បានត្រឡប់ក្រោយទៅរើសស្បែកជើងនេះវិញ ក៏ត្រូវបានសិស្សសាលា៣នាក់ធ្វើដំណើរឆ្លងកាត់ទីនោះប្រទះឃើញ ហើយស្រែកឆោឡោបង្កការភ្ញាក់ផ្អើលដល់អ្នកភូមិ និងកម្មករសំណង់កំពុងធ្វើការនៅជិតនោះ ឡោមព័ទ្ធចាប់បានម្នាក់ និងរត់រួចម្នាក់ ។
ហេតុការណ៍នេះ បានកើតឡើងកាលពីវេលាម៉ោង៣រសៀល ថ្ងៃទី១២ ខែធ្នូ ឆ្នាំ២០២៤ នៅចំណុចក្រោមដើមត្នោតលើដីវាលក្បែរភូមិព្រៃទីទុយ សង្កាត់ព្រៃស ខណ្ឌដង្កោ រាជធានីភ្នំពេញ ។ ភ្លាមៗ សមត្ថកិច្ចពុំទាន់ប្រាប់ឲ្យដឹងអំពីអត្តសញ្ញាណជនសង្ស័យដែលត្រូវឃាត់ខ្លួនបានម្នាក់នេះនៅឡើយទេ ។ ចំណែកបុរសអ្នកឡើងត្នោតខាងលើឈ្មោះ អ៊ុល យីន អាយុ៤៦ឆ្នាំ ស្នាក់នៅភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
បុរសនេះបាននិយាយថា នៅមុនពេលកើតហេតុ រូបគាត់បានជិះម៉ូតូ១គ្រឿងម៉ាកឌ្រីមសេ១២៥ ពណ៌ខ្មៅ ពាក់ផ្លាកលេខ ភ្នំពេញ ១AX-៦៣០៩ ចេញពីកន្លែងស្នាក់នៅទៅឡើងត្នោតនៅទីតាំងកើតហេតុខាងលើដូចរាល់ដង ។ ពេលទៅដល់ បានទុកម៉ូតូនៅក្រោមដើមត្នោត ហើយនៅលើម៉ូតូរបស់គាត់នោះក៏មានដឹកសម្ភារៈផលិតទឹកត្នោត ដូចជាដង្កៀបកៀបផ្កាត្នោតញី និងឈ្មោល ព្រមទាំងខ្សែមួយចង្វាយផងដែរ ។
បុរសអ្នកឡើងត្នោតបាននិយាយបន្តទៀតថា លុះទុកដាក់ចាក់សោ.កម៉ូតូរួចរាល់ គាត់ក៏បានឡើងទៅដាក់ទឹកត្នោតនៅលើចុង ពេលនោះស្រាប់តែមានចោរទៅលួចកាច់កម៉ូតូគាត់ ដែលគាត់អត់បានដឹងសោះ ។ ប៉ុន្តែពេលនោះបានប្រជាពលរដ្ឋជួយដេញចាប់បានយកមកវិញ ក៏ភ្ញាក់ផ្អើលឡើងទើបគាត់ដឹង ។
គាត់ពិតជាបានត្រេកអរ និងអរគុណបងប្អូនប្រជាពលរដ្ឋខ្លាំងណាស់ ដែលបានជួយដេញចាប់ចោរ និងយកបានម៉ូតូគាត់ត្រឡប់មកវិញ ព្រោះពិបាកខ្លាំងណាស់ ទំរាំតែសន្សំលុយទិញបានម៉ូតូ១គ្រឿងនេះ សម្រាប់ជិះទៅឡើងត្នោតកន្លែងឆ្ងាយៗ បើបាត់គឺចប់ហើយ ។
ដោយឡែកកម្មករសំណង់ដែលធ្វើការជិតនោះបាននិយាយថា នៅវេលាម៉ោងខាងលើ ចោរ២នាក់នោះបានជិះម៉ូតូ១គ្រឿងឌុបគ្នាចេញដើរធ្វើសកម្មភាពលួច ហើយខណៈទៅដល់ចំណុចកើតហេតុ បានឃើញម៉ូតូអ្នកឡើងត្នោតចតទុកក្រោមដើមត្នោត ហើយម្ចាស់រវល់តែនៅលើចុងត្នោត ពួកចោរក៏ឆ្លៀតឱកាសធ្វើសកម្មភាពលួច ដោយម្នាក់នៅអង្គុយចាំនៅលើម៉ូតូ ដែលជាមធ្យោបាយជិះដើរធ្វើសកម្មភាពលួច ។ ចំណែកម្នាក់ទៀតចុះដើរទៅកាច់កម៉ូតូក្រោមដើមត្នោតនោះយ៉ាងស្ទាត់ជំនាញ ។ លុះពេលកាច់កបាន ក៏ឡើងជិះដើម្បីគេចខ្លួន ប៉ុន្តែបានជ្រុះស្បែកជើងផ្ទាត់មួយចំហៀង ទើបចោររូបនេះចុះរត់ត្រឡប់ក្រោយទៅយកស្បែកជើងវិញ ។
ប្រភពដដែលបានប្រាប់ទៀតថា ខណៈនោះ ត្រូវបានសិស្សសាលា៣នាក់ធ្វើដំណើរឆ្លងកាត់ទីនោះប្រទះឃើញស្គាល់ថា ម៉ូតូនេះជារបស់អ្នកឡើងត្នោត ព្រោះធ្លាប់ឃើញគាត់ជិះទៅឡើងត្នោត ហើយទុកនៅទីនោះរាល់ថ្ងៃ ។ ទើបសិស្សសាលាក៏ស្រែកឆោឡោ បង្កឲ្យមានការភ្ញាក់ផ្អើលដល់អ្នកភូមិ និងកម្មករសំណង់ជិតនោះនាំគ្នាឡោមព័ទ្ធ និងដេញចាប់ ហើយក៏មានអ្នកភូមិម្នាក់ជិះម៉ូតូទៅបំបុកបណ្ដាលឲ្យចោរម្នាក់នេះដួល ទើបចាប់បាន និងយកម៉ូតូបានមកវិញ ។
ពេលនោះប្រជាពលរដ្ឋក៏បានស្វាគមន៍ម្នាក់១ដៃ១ជើងជាការបញ្ចេញកំហឹង រួចទើបប្រគល់ជូននគរបាលប៉ុស្តិ៍ព្រៃសធ្វើការសាកសួរ និងចាត់ការតាមច្បាប់ ។ ចំណែកបក្ខពួកម្នាក់ទៀត ជិះម៉ូតូគេចខ្លួនបាត់ស្រមោល ៕
ចែករំលែកព័តមាននេះ