ទីក្រុងហុងកុង ៖ ជីវិតប្រែប្រួល១៨០ដឺក្រេ! លោក Tai Yiu-Ming ឬ Sunny Tai ពីតារាសម្តែងល្បីមួយរូបរបស់ហុងកុង ក្លាយជាអ្នករត់តុ និងលាងចាន បន្ទាប់ពីការងារសម្តែងមិនសូវមានទីផ្សារដូចមុន។

កាលពីថ្ងៃទី២៧ ខែវិច្ឆិកា ឆ្នាំ២០២៤ កន្លងទៅ អ្នកគាំទ្របានប្រទះឃើញ Sunny Tai ធ្វើការជាអ្នករត់តុ និងលាងចាន នៅភោជនីយដ្ឋានមួយស្ថិតក្នុងសង្កាត់ Wong Tai Sin ទីក្រុងហុងកុង។ នៅក្នុងបទសម្ភាសន៍ជាមួយនឹងសារព័ត៌មាន HK01 តារាសម្តែងរូបនេះបានបង្ហើបថា លោកចាប់ផ្តើមការងារជាអ្នករត់តុ និងលាងចាននេះ កាលពីពីរសប្តាហ៍មុន បន្ទាប់ពីជួបការលំបាកស្វែងរកការងារសម្តែង។ លោកពន្យល់ថា អាជីពរបស់លោកតែងតែមិនអាចទាយទុកមុនបាននោះទេ ជួនមាន ជួនអត់។ ប៉ុន្តែទោះជាស្ថិតក្នុងស្ថានភាពបែបណាក្តី Sunny Tai នៅតែចង់វិលត្រឡប់រកការសម្តែងវិញ នៅពេលទទួលបានឱកាសត្រឹមត្រូវមកដល់។

អំឡុងពេលធ្វើការនៅភោជនីយដ្ឋាន Sunny Tai មិនត្រឹមតែបម្រើអតិថិជនប៉ុណ្ណោះទេ ថែមទាំងកំពុងរៀនឆុងកាហ្វេ និងតែទឹកដោះគោ ដោយសង្ឃឹមថានឹងចាប់ផ្តើមអាជីវកម្មផ្ទាល់ខ្លួន នៅថ្ងៃណាមួយ។ អ្នកមិនដឹង នៅពេលមកទទួលអាហារឃើញបែបនេះគិតថា Sunny Tai កំពុងថតឈុតសម្រាប់កម្មវិធីទូរទស្សន៍ណាមួយហើយ តារាសម្តែងរូបនេះសារភាពថាមានអារម្មណ៍មិនស្រណុកចិត្តបន្តិច នៅពេលអតិថិជនសួរសំណួរបែបនេះ។ ជារឿយៗ Sunny Tai តែងញញឹម ហើយឆ្លើយថា ខ្ញុំកំពុងតែជួយការងារមិត្តភក្តិខ្ញុំ។

ទោះយ៉ាងណា បន្ទាប់ពីរូបភាពលោក Sunny Tai កំពុងធ្វើការជាអ្នករត់តុ និងលាងចាននៅភោជនីយដ្ឋាននោះ ត្រូវបានចែកចាញពេញបណ្តាញសង្គមរួចមក Sunny Tai បានលាតត្រដាងអំពីស្ថានភាពលោកនៅលើបណ្តាញសង្គមចិន Weibo ដោយបញ្ជាក់ថា «ខ្ញុំមិនខ្មាស់នឹងការងាររបស់ខ្ញុំទេ វាគឺជាការងារស្មោះត្រង់ ខ្ញុំមិនលួចប្លន់អ្នកណាម្នាក់ទេ។ ខ្ញុំគ្រាន់តែរស់នៅជាជីវិតរបស់ខ្ញុំ»។ Sunny Tai ធ្វើការជាច្រើនម៉ោង ហើយជារឿយៗ ត្រូវភ្ញាក់ពីគេងនៅម៉ោង៥ព្រឹក និងធ្វើការលើសពី១០​ម៉ោង ជួនកាលចប់ការងារនៅពាក់កណ្តាលយប់ក៏មាន។ ជាមួយនឹងការងារប្រើកម្លាំងនេះ Sunny Tai អាចរកបានចំណូលបានប្រហែល ៣៨ ទៅ ៥១ដុល្លារក្នុង១ថ្ងៃ ជាមួយនឹងប្រាក់ចំណូលប្រចាំខែលើសពី ១,២៨៥ដុល្លារអាមេរិក។

លោក Sunny Tai តារាសម្តែងវ័យ៥១ឆ្នាំ បានប្រឡូកនៅក្នុងវិស័យភាពយន្តហុងកុងអស់រយៈពេលជាង៣០ឆ្នាំរួចទៅហើយ ដោយបានបង្ហាញខ្លួនក្នុងផលិតកម្មជាង ១៥០ រួមទាំង រឿងភាគល្បីៗ និងពេញនិយមជាច្រើនរបស់ទូរទស្សន៍ TVB ផងដែរ។ ប៉ុន្មានឆ្នាំចុងក្រោយនេះ លោកបានបន្តការងារក្នុងរឿងភាគដូចជារឿង «Sinister Beings» និង «Battle of the Seven Sisters» ជាដើម៕ ប្រភព ៖ VnExpress