រាជធានីភ្នំពេញ ៖ តារារ៉េបមួយរូប ​បានស្លាប់បាត់បង់ជីវិតនៅក្នុងហេតុការណ៍គ្រោះថ្នាក់ចរាចរណ៍រវាងរថយន្តបុកម៉ូតូ បណ្តាលអោយជនរងគ្រោះ​ប៉ើង បោកផ្ទប់​នឹងកញ្ចក់រថយន្ត រួចធ្លាក់បោកក្បាលស្លាប់ ។​

ហេតុការណ៍ខាងលើ​នេះបានកេីតឡេីងកាល​ពី​វេលាម៉ោង១និង៣៥នាទីរំលងអធ្រាត្រឈានចូលថ្ងៃទី ៦ ខែ មករា ឆ្នាំ២០២៥ ស្ថិតតាមបណ្ដោយផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

​ជនរងគ្រោះ​ឈ្មោះ ដាវីត ឫទ្ធិរុទ្រ អាយុ ២៤ឆ្នាំ ហៅ RUTH KO ស្នាក់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ និង​មានស្រុកកំណើត នៅស្រុកស្វាយប៉ោ ខេត្តបាត់ដំបង ។

តាម​ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញជនរងគ្រោះ ជិះម៉ូតូមួយគ្រឿងម៉ាក CRS ពណ៌ខ្មៅ ពាក់ស្លាកលេខ បាត់ដំបង 1AL-9616 ជិះម្នាក់ឯង ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីត្បូងទៅជើងក្នុងល្បឿនមធ្យម ខណៈពេលជិះមកដល់ចំណុចកើតហេតុច្រកចូលបុរីប៉េងហ៊ួត ស្រាប់តែមានរថយន្តមួយគ្រឿងម៉ាក LexusRX330 ពណ៌ស ពាក់ស្លាកលេខ ខេមរភូមិន្ទ 09 2-4771 បើកបរដោយបុរសម្នាក់ធ្វើដំណើរតាមបណ្តោយផ្លូវ៦០ម៉ែត្រក្នុងទិសដៅបញ្រ្ចាស់គ្នាពីជើងមកត្បូងក្នុងល្បឿនលឿន ស្របពេលបើកមកដល់ចំណុចកើតហេតុខាងលើក៏បានបួងចង្កូតបត់ឆ្វេងចូលទៅក្នុងបុរីទាំងមិនបានមើលមុខ ជ្រុលទៅបុកម៉ូតូចំពីមុខយ៉ាង​ពេញទំហឹង បណ្តាលអោយប៉ើង​ជនរងគ្រោះបោកផ្ទប់នឹងកញ្ចក់រថយន្ត រួចធ្លាក់បោកក្បាល ស្លាប់ភ្លាមៗ ។ ​ចំណែកអ្នកបើករថយន្តបង្កត្រូវសមត្ថកិច្ច ឃាត់យកទៅសួរនាំ នៅប៉ុស្តិ៍នគរបាលសង្កាត់ចាក់អង្រែក្រោម ។

ក្រោយពេលកេីតហេតុ សមត្ថកិច្ចជំនាញ ចរាចរណ៍វាស់វែងយករថយន្ត និង​ម៉ូតូ ទៅ​រក្សាទុករង់ចាំការដោះស្រាយ​នៅពេល​ក្រោយ ។ ចំណែកឯសពជនរងគ្រោះ ត្រូវបានសមត្ថកិច្ច​ប្រគល់ឲ្យសាច់ញាតិយកទៅធ្វើបុណ្យតាម ប្រពៃណី ៕