ខេត្តស្វាយរៀង ៖ ប្រជាពលរដ្ឋ កម្មករ កម្មការិនី និងអាជីវករនៅចំណតទូក កាណូតប្រឡាយទាហានប្រមាណ៣០០នាក់ រួមទាំងប្រជាពលរដ្ឋភូមិព្រៃវល្លិ បានលើកគ្នាតវ៉ាទាមទារស្នើសុំដល់សម្តេចបវរធិបតី ហ៊ុន…
ខេត្តស្វាយរៀង ៖ ប្រជាពលរដ្ឋ កម្មករ កម្មការិនី និងអាជីវករនៅចំណតទូក កាណូតប្រឡាយទាហានប្រមាណ៣០០នាក់ រួមទាំងប្រជាពលរដ្ឋភូមិព្រៃវល្លិ បានលើកគ្នាតវ៉ាទាមទារស្នើសុំដល់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា សូមឲ្យអាជ្ញាធរស្រុកខេត្តមេត្តាជួយដោះ ស្រាយបញ្ហាភាគីវៀតណាមបិទច្រកទ្វារព្រំដែនផ្លូវទឹកនៃស្លាបច្រកទ្វារព្រំដែនអន្តរជាតិព្រៃវល្លិ ដែលមិនអនុញ្ញាតឲ្យអាជីវករខ្មែរនាំស្រូវចេញតាមច្រកព្រំដែនផ្លូវទឹកទៅប្រទេសវៀតណាម ។
ដែលការបិទច្រកនេះ បានបង្កឲ្យមានផលប៉ះពាល់ដល់ការងារកម្មករធ្វើការនៅផែកាណូតប្រមាណជាង៨០០នាក់ និងក្រុមអាជីវករប្រមូលទិញស្រូវ តាមបណ្តាខេត្តនានាទូទាំងប្រទេសក៏ដូចជាប្រជាពលរដ្ឋដែលជាកសិករ ត្រូវបាត់បង់ទីផ្សារ ។
ពួកគាត់បានសូមឲ្យអាជ្ញាធរគ្រប់លំដាប់ថ្នាក់ ជាពិសេសសម្តេចមហាបវរធិបតី នាយករដ្ឋមន្ត្រីកម្ពុជា មេត្តាជួយអន្តរាគមន៍ដោះស្រាយសុំឲ្យភាគីខេត្តឡុងអានប្រទេសវៀតណាម បើកព្រំដែនផ្លូវទឹកព្រៃវល្លិ(ខេត្តស្វាយរៀង) ឈមនឹងបេនហ៊ីប(ខេត្តឡុងអាន)ឡើងវិញដូចមុន ។
ការតវ៉ានេះ បានកើតឡើងនៅព្រឹកថ្ងៃទី២៨ ខែតុលា ២០២៤ នៅចំណតកាណូតប្រឡាយទាហាន ស្លាបច្រកទ្វារព្រំដែនអន្តរជាតិព្រៃវល្លិ ស្ថិតនៅភូមិព្រៃវល្លិ ឃុំថ្មី ស្រុកកំពង់រោទ៍ខេត្តស្វាយរៀង ។ ការតវ៉ានេះគឺជាលើកទី២ហើយដែលមុននេះក៏ធ្លាប់មានការតវ៉ាម្តងដែរ ។
បើតាមតំណាងប្រជាពលរដ្ឋបានលើកឡើងថា ពួកគាត់លើកគ្នាមកតវ៉ានេះ គឺមានបំណងសូមឲ្យអាជ្ញាធរមានសមត្ថកិច្ច ជាពិសេសសម្តេចមហាបវរធិបតី ហ៊ុន ម៉ាណែត មេត្តាជួយពិនិត្យអន្តរា គមន៍បើកច្រកទ្វារព្រំដែនទឹក នៃច្រកទ្វារព្រំដែនអន្តរជាតិព្រៃវល្លិនេះឡើងវិញ ដោយច្រកទ្វារព្រំដែនទឹកមានតែមួយគត់នៃខេត្តស្វាយរៀង ដែលអាជីវករខ្មែរបានបង្កើតចំណតទូក កាណូត នាំទំនិញចេញទៅប្រទេសវៀតណាម ជាពិសេស ផលិតផលស្រូវ ដែលអាជីវករបានដើរប្រមូលទិញពីបណ្តាខេត្តនានាទូទាំងប្រទេស នាំចេញទៅប្រទេសវៀតណាមតាមច្រកនេះ ។
ការបើកច្រកផ្លូវទឹកនេះ បានបង្កើតការងារឲ្យអាជីវករ និងកម្មករកម្មការិនីប្រមាណជាង៨០០នាក់ បម្រើការងារនៅទីនេះ និងបង្កងាយស្រួលដល់ប្រជាពលរដ្ឋដែលប្រកបមុខរបរធ្វើស្រែនៅក្នុងស្រុកកំពង់រោទ៍ លក់ផលិតផលស្រូវផ្ទាល់ដល់ឈ្មួញវៀតណាមតែម្តង ដោយឈ្មួញវៀតណាមចូលទូក កាណូតដល់ចំណតរថយន្តដឹកស្រូវក៏ងាយស្រួល ។
ពេលភាគីវៀតណាមបិទព្រំដែនផ្លូវទឹកប្រឡាយទាហានព្រៃវល្លិនេះធ្វើឲ្យប៉ះពាល់ដល់កម្មករ លីសែង និងអាជីវករខ្មែរយ៉ាងខ្លាំង ដោយការបិទនេះមិនដឹងពីមូលហេតុ ។ ច្រកព្រំដែនទឹកនេះបានបិទអស់រយៈពេលជិត៧ខែមកហើយ ដែលក្តីបារម្ភធំបំផុត គឺខ្លាចភាគីវៀតណាមបិទហើយបើកផែស្រូវ នៅខាងប្រទេសគេ ដែលធ្វើឲ្យអាជីវករនិងកម្មករ ដែលប្រកបមុខរបរនៅបេនកាណូតនេះមានការពិបាក កម្មករបាត់បង់ការងារ និងធ្វើឲ្យបាត់បង់ផលប្រយោជន៍រួមជាខ្លាំង ព្រោះផ្លូវទឹកព្រៃវល្លិ កន្លងមកនាំស្រូវចេញទៅប្រទេសវៀតណាមក្នុង១ថ្ងៃចន្លោះពី ៥,០០០តោន ទៅ១០,០០០តោន គឺបានជួយដល់កម្មករខ្មែរដែលបម្រើការនៅបេនកាណូតនេះចំនួនជាង៨០០នាក់ ទាំងប្រុសទាំងស្រី ពួកគាត់ម្នាក់ៗអាចរកចំណូលបានចន្លោះពី៧ម៉ឺនទៅ១០ម៉ឺនរៀល ក្នុង១ថ្ងៃ ។
នៅពេលវៀតណាមបិទច្រកនេះ ធ្វើឲ្យពួកគាត់អត់ការងារធ្វើ បង្កឲ្យមានការប៉ះពាល់ក្នុងជីវភាពគ្រួសារយ៉ាងខ្លាំង ។ តំណាងប្រជាពលរដ្ឋបន្តទៀតថា កន្លងមកពួកគាត់បានយកសំណើទៅដាក់នៅតាមមន្ទីរពាក់ព័ន្ធ ទៅដាក់នៅសភាពាណិជ្ជកម្មខេត្ត ទៅសាលាខេត្តស្វាយរៀង សុំឲ្យឯកឧត្តមអភិបាលខេត្តដោះស្រាយ ក៏ប៉ុន្តែពុំឃើញមានដំណោះស្រាយទើបនាំគ្នាមកតវ៉ាសុំឲ្យប្រមុខរាជរដ្ឋាភិបាលមេត្តាជួយអន្តរាគមន៍ដោះស្រាយវិញម្តង ។
បើតាមមន្ត្រីសាលាខេត្តស្វាយរៀងបានប្រាប់អ្នកសារព័ត៌តាមបណ្តាញតេឡេក្រាមខេត្តឲ្យដឹងផងដែរថា បញ្ហាទាំងអស់នេះ ស្ថាប័នជំនាញបានធ្វើការទំនាក់ទំនងទៅស្ថានកុងស៊ុលកម្ពុជាដែលប្រចាំការនៅទីក្រុងហូជីមិញ ដើម្បីធ្វើការប្រជុំពិភាក្សាគ្នាដើម្បីដោះស្រាយបញ្ហានេះរួចហើយ តែខាងភាគីវៀតណាមនៅពុំទាន់មានចម្លើយមកខាងកម្ពុជាទេ រហូតមកដល់ពេលនេះ ។ វាជាបញ្ហារបស់ភាគីខាងវៀតណាមដែលគេមិនអនុញាតឲ្យក្រុមអាជីវករគេចូលមកទិញស្រូវពីកម្ពុជាតាមច្រកមួយនេះ មិនមែនខាងកម្ពុជាជាអ្នកហាមឃាត់នោះទេ ។
ក្រុមអាជីវករនិងកម្មករ ព្រមទាំងប្រជាពលរដ្ឋស្រុកកំពង់រោទ៍ សូមសំណូមពរដល់សម្តេចមហាបវរធិបតី ហ៊ុន ម៉ាណែត មេត្តាជួយអន្តរាគមន៍បើកច្រកទ្វារព្រំដែនទឹកប្រឡាយទាហាននេះឡើងវិញ ដើម្បីឲ្យអាជីវករនិងកម្មករ ព្រមទាំងប្រជាពលរដ្ឋមានមុខរបរ ហើយបានដំណើរការនាំស្រូវចេញទៅប្រទេសវៀតណាមបានរលូន ជាពិសេសស្រូវមានទីផ្សារនាំចេញ ។
ទាក់ទិនករណីនេះដែរ លោកឧត្តមសេនីយ៍ ប៉ាង ឡេង នាយប៉ុស្តិ៍នគរបាលច្រកទ្វារព្រំដែនអន្តរជាតិព្រៃវល្លិ បានប្រាប់អ្នកសារព័ត៌មានយើងនៅព្រឹកថ្ងៃទី២៨ ខែតុលា ឆ្នាំ២០២៤នេះថា លោកទទួលបានព័ត៌មាននេះដែរ ហើយមិនមែនខាងខ្មែរយើងជាអ្នកបិទនោះទេ គឺខាងភាគីវៀតណាមជាអ្នកបិទ ហើយនាពេលកន្លងមក គឺខាងអភិបាលខេត្តស្វាយរៀងនិងមន្ត្រីស្ថាប័នពាក់ព័ន្ធបានទៅប្រជុំនៅវៀតណាមហើយ ក៏ប៉ុន្តែមិនទាន់មានដំណោះស្រាយ ដោយភាគីវៀតណាមគេបានបើកផែកាណូតនៅប្រទេសវៀតណាម (ខាងត្បូងច្រកទ្វារព្រំដែនអន្តរជាតិព្រៃវល្លិ(កម្ពុល៍(កម្ពុជា)-បេនហ៊ីប ប្រទេសវៀតណាម ចម្ងាយប្រមាណ១គីឡូម៉ែត្រដើម្បីប្រមូលទិញស្រូវខ្មែរយើង ។
បច្ចុប្បន្ន ខាងវៀតណាមគេអនុញ្ញាតឲ្យកម្មករខ្មែរចូលទៅលីសែង នៅផែវៀតណាមដែរ ក៏ប៉ុន្តែកម្មករខ្មែរមិនចូលទៅធ្វើការទីនោះដោយប្រាប់ថា ពិបាកចេញ-ចូលទៅប្រទេសវៀតណាម ហើយខាងវៀតណាមមិនអនុញ្ញាតឲ្យអាជីវករខ្មែរទៅរកស៊ីនៅប្រទេសវៀតណាមទេ ៕
ចែករំលែកព័តមាននេះ