ទីក្រុងកៀវ៖ អ៊ុយក្រែនចាប់ផ្ដើមគិតគូរអំពីការផលិតប្រព័ន្ធការពារដែនអាកាសស៊េរីទំនើបដើម្បីទប់ទល់នឹងគ្រាប់មីស៊ីលរយៈចម្ងាយមធ្យមសេរ៊ីថ្មីរបស់រុស្ស៊ីដែលចាប់ផ្ដើមដាក់ពង្រាយជាបណ្ដើរៗហើយ។ មេដឹកនាំអ៊ុយក្រែន លោកហ្សេឡិនស្គី ថ្លែងនៅក្នុងសុន្ទរកថាប្រចាំពេលរាត្រីថាការដែលរុស្ស៊ីបាញ់មីស៊ីលទំនើបរបស់ខ្លួននោះដើម្បីបំភិតបំភ័យប្រទេសដទៃ។ ដូច្នេះ លោកសូមអំពាវនាវមានការឆ្លើយតបជាសាកលដើម្បីកុំឱ្យរុស្ស៊ីពង្រីកសង្គ្រាមអ៊ុយក្រែនកាន់តែខ្លាំងបន្ថែមទៀត។
លោកហ្សេឡិនស្គីថ្លែងថារដ្ឋមន្ត្រីការពារជាតិអ៊ុយក្រែនតាងនាមជំនួសមុខឱ្យរូបលោកផ្ទាល់ចាប់ផ្ដើមជួបប្រជុំជាមួយក្រុមប្រទេសជាដៃគូដើម្បីពិភាក្សាគ្នាអំពីការផលិតខែលការពារដែនអាកាសស៊េរីថ្មីដែលអាចឃ្លាំមើល២៤ម៉ោងលើ២៤ម៉ោងដើម្បីទប់ស្កាត់ហានិភ័យថ្មីៗ។ លោកថ្លែងថានៅពេលនរណាម្នាក់គំរាមកំហែងទៅលើប្រទេសដទៃ ហើយយកប្រទេសនោះធ្វើជាទីតាំងសាកពិសោធគ្រាប់មីស៊ីលថ្មីៗរបស់ខ្លួនដើម្បីបំភិតបំភ័យ មានន័យថាជាឧក្រិដ្ឋកម្មអន្តរជាតិយ៉ាងពិតប្រាកដ។
លោកក៏សូមអំពាវនាវផងដែរឱ្យប្រជាជនអ៊ុយក្រែនបង្កើនការប្រុងប្រយ័ត្នខ្ពស់ចំពោះការវាយប្រហារឥតឈប់ឈរដោយគ្រាប់មីស៊ីលរបស់រុស្ស៊ី។ នៅក្នុងសង្គ្រាម យើងគ្មានជម្រើសណាផ្សេងក្រៅពីអនុវត្តវិធីបែបនេះទេ។ យើងត្រូវតែយល់ឱ្យបានច្បាស់ថាសមមិត្តពូទីននឹងបន្តបំភិតបំភ័យយើងជាបន្តទៀត។ គាត់ធ្វើបែបនេះដើម្បីប្រមូលផ្ដុំអំណាចរបស់គាត់នៅក្នុងដៃ។
ថ្មីៗនេះ លោកពូទីនប្រកាសថាប្រទេសរុស្ស៊ីនឹងបន្តធ្វើតេស្តសាកល្បងគ្រាប់មីស៊ីលលឿនជាងសំឡេង (ហាយពើសូនិច – hypersonic) ស៊េរីថ្មីរបស់ខ្លួនដែលមានឈ្មោះអូរេស្នីក (Oreshnik)។ មីស៊ីលនេះទើបតែត្រូវរុស្ស៊ីប្រើប្រាស់សម្រាប់វាយប្រហារទៅលើអ៊ុយក្រែនកាលពីថ្ងៃព្រហស្បតិ៍ក្រោយពេលអ៊ុយក្រែនបាញ់មីស៊ីលអាមេរិកកម្ទេចឃ្លាំងអាវុធរុស្ស៊ីកាលពីថ្ងៃពុធ។
លោកពូទីនក៏ពន្លឿនការផលិតគ្រាប់មីស៊ីលនេះផងដែរ។ លោកអះអាងថាមីស៊ីលនេះមានអានុភាព និងសមត្ថភាពខ្លាំងអស្ចារ្យអាចគេចផុតពីការតាមប្រមាញ់នៃខែលការពារដែនអាកាសរបស់សត្រូវ។ លោកហ៊ានធានាអះអាងថាសម្រាប់ពេលបច្ចុប្បន្ននេះគ្មានខែលការពារមីស៊ីលណាអាចទប់ទល់នឹងមីស៊ីលនេះឡើយ ហើយក៏គ្មានផ្លូវស្ទាក់ចាប់មីស៊ីលនេះបានដែរ។
អ្នកវិភាគយល់ថាការដែលលោកពូទីនបញ្ចេញមីស៊ីលហាយពើសូនិចយកមកប្រើប្រាស់ដើម្បីជាសារនយោបាយប្រាប់ទៅក្រុមបស្ចិមប្រទេសថាពួកគេត្រូវដកខ្លួនថយជាបន្ទាន់។ បើមិនដូច្នេះទេ រុស្ស៊ីក៏លែងគួរសមតទៅទៀតដែរ រុស្ស៊ីសូមរក្សាសិទ្ធិបាញ់មីស៊ីលដាក់ប្រទេសដែលផ្ដល់មីស៊ីលឱ្យអ៊ុយក្រែនបាញ់ឆ្ងាយៗចូលទឹកដីរុស្ស៊ីដូចជាអាមេរិក និងអង់គ្លេសជាដើម។
លោកពូទីនថ្លែងថាសង្គ្រាមចាប់ផ្ដើមផ្ទុះឡើងខ្លាំងក្លាយជាជម្លោះអន្តរជាតិទៅហើយ។ គ្រាន់តែលោកមិនបាននិយាយអំពីអាវុធនុយក្លេអ៊ែរតែប៉ុណ្ណោះ។ លោកបានបង្ហើបឱ្យដឹងអំពីលទ្ធភាពនៃការវាយប្រហារទៅក្រុមប្រទេសដែលអនុញ្ញាតឱ្យអ៊ុយក្រែនបាញ់មីស៊ីលចូលទឹកដីរុស្ស៊ី។ ប៉ុន្តែជាក់ស្ដែង លោកមិនទាន់បញ្ជាឱ្យវាយប្រហារប្រទេសទាំងនោះនៅឡើយទេ។
អ្នកវិភាគយល់ថាបើលោកពូទីនហ៊ានធ្វើដល់ថ្នាក់ហ្នឹងមែន (វាយប្រហារបស្ចិមប្រទេស) ពេលនោះ សង្គ្រាមរវាងអង្គការណាតូ និងរុស្ស៊ីត្រូវតែកើតឡើងដោយជៀសមិនផុត។ បើដល់ដំណាក់កាលនោះហើយទោះបីនរណាចង់ទប់ក៏ទប់លែងជាប់ដែរ។ លោកបៃដិនធ្លាប់ព្រមានថាបើរុស្ស៊ីហ៊ានប៉ះណាតូតែប៉ុនសរសៃសក់នឹងផ្ទុះសង្គ្រាមលោកលើកទី៣ជាមិនខាន៕
ចែករំលែកព័តមាននេះ