រាជធានីភ្នំពេញ ៖ កាលពីថ្ងៃទី១៩ មិថុនា លោកជំទាវជឹង សុភាព អនុប្រធានទី២ កាកបាទក្រហមកម្ពុជា អមដំណើរដោយលោកជំទាវអគ្គលេខាធិការ នាយកពិធីការ និងមន្ត្រីអ្នកមុខអ្នកការកាកបាទក្រហមកម្ពុជាជាច្រើនរូបទៀត បានអញ្ជើញទៅទទួលគណៈប្រតិភូសមាគមជាតិកាកបាទក្រហមចិន ដឹកនាំដោយលោកជំទាវហាវ លីនណា អនុប្រធានសមាគមជាតិកាកបាទក្រហមចិន នៅចំណតយន្តហោះអន្តរជាតិភ្នំពេញ ។
ក្នុងដំណើរទស្សនកិច្ចជាផ្លូវការនៅព្រះរាជាណាចក្រកម្ពុជា គណៈប្រតិភូចិននឹងចូលរួមក្នុងពិធីជប់លៀងនៅសណ្ឋាគារកាំបូឌីយ៉ាណានៅថ្ងៃទី២០ មិថុនា ក្រោមអធិបតីភាពលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។ លុះនៅថ្ងៃទី ២១ មិថុនា គណៈប្រតិភូកាកបាទក្រហមចិននឹងជួបពិភាក្សាការងារជាមួយលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងមានពិធីចុះហត្ថលេខាលើកិច្ចព្រមព្រៀងសហប្រតិបត្តិការទ្វេភាគីផងដែរ រវាងកាកបាទក្រហមកកម្ពុជា និងកាកបាទក្រហមចិន។
នៅថ្ងៃទី២១ មិថុនា នោះដែរ គណៈប្រតិភូកាកបាទក្រហមចិននឹងធ្វើដំណើរឆ្ពោះទៅកាន់ខេត្តសៀមរាបតាមរថយន្តដែលអមដំណើរដោយលោកជំទាវពុំ ចន្ទីនី អគ្គលេខាធិការកាកបាទក្រហមកម្ពុជា និងមន្ត្រីអ្នកមុខអ្នកការជាច្រើនរូបទៀត។ នៅទីនោះ គណៈប្រតិភូនឹងអញ្ជើញទស្សនាគម្រោងអភិវឌ្ឍន៍សុខភាពសហគមន៍មូលដ្ឋានរបស់សាខាកាកបាទក្រហមកម្ពុជាខេត្តសៀមរាប នៅភូមិថ្មី ឃុំខ្ចាស់ ស្រុកសូទ្រនិគម ទស្សនាប្រាសាទអង្គវត្ត និងមានពិធីជប់លៀងជូនក្រោមអធិបតីភាពលោកស៊ូ ភិរិន្ទ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ៕
ចែករំលែកព័តមាននេះ