ប្រទេសវៀតណាម ៖ ក្រុមហ៊ុនបុត្រសម្ព័ន្ធរបស់ក្រុមហ៊ុនឥណ្ឌា Adani Group ដែលជាកម្មសិទ្ធិរបស់មហាសេដ្ឋីមានបំផុតទី២របស់ប្រទេសឥណ្ឌា លោក Gautam Adani បានប្រកាសផ្តល់ជំនួយចំនួន១លានដុល្លារអាមេរិក…
ប្រទេសវៀតណាម ៖ ក្រុមហ៊ុនបុត្រសម្ព័ន្ធរបស់ក្រុមហ៊ុនឥណ្ឌា Adani Group ដែលជាកម្មសិទ្ធិរបស់មហាសេដ្ឋីមានបំផុតទី២របស់ប្រទេសឥណ្ឌា លោក Gautam Adani បានប្រកាសផ្តល់ជំនួយចំនួន១លានដុល្លារអាមេរិក ដើម្បីគាំទ្រដល់កិច្ចខិតខំប្រឹងប្រែងស្តារប្រទេសវៀតណាមឡើងវិញ បន្ទាប់ពីការបំផ្លិចបំផ្លាញបណ្តាលមកពីព្យុះសង្ឃរាយ៉ាកជី (Yagi)។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅរសៀលនេះ។
ប្រភពពីរដ្ឋាភិបាលវៀតណាមបានរាយការណ៍ថា ស្ថាបនិកក្រុមហ៊ុន Adani Group លោក Gautam Adani បានចូលរួមរំលែកទុក្ខដល់ប្រជាជនវៀតណាម ជាពិសេសអ្នក រងគ្រោះដោយសារព្យុះសង្ឃរាយ៉ាកជី និងការជន់លិចជាបន្តបន្ទាប់ បូករួមទាំងការបាក់ដីយ៉ាងរន្ធត់ ដែលបានឆក់យកជីវិតមនុស្សយ៉ាងហោចណាស់២៣៣នាក់ នៅភាគខាងជើងប្រទេសវៀតណាម កាលពីសប្តាហ៍មុន។ ជាមួយវិភាគទានចំនួន១លានដុល្លារ នឹងត្រូវបញ្ជូនទៅគណៈកម្មាធិការចលនាសង្គ្រោះមជ្ឈិម ដើម្បីជួយដល់កិច្ចខិតខំប្រឹងប្រែងសង្គ្រោះនៅទូទាំងភាគខាងជើងប្រទេសវៀតណាម ក៏ដូចជាដល់មន្ទីរពេទ្យ Viet Tiep នៅក្នុងទីក្រុងហៃហ្វុង (Hai Phong) ផងដែរ។
ក្រុមហ៊ុន Adani Group ក៏បានប្តេជ្ញាចិត្តចំពោះការវិនិយោគដែលកំពុងបន្តនៅក្នុងប្រទេសវៀតណាម ដោយមានផែនការដាក់ចេញនូវគម្រោងនានាក្នុងគោលបំណងជួយដល់សហគមន៍មូលដ្ឋាន និងការពង្រឹងសេដ្ឋកិច្ចក្នុងតំបន់។
លោក Gautam Adani គឺជាមហាសេដ្ឋីឥណ្ឌា ដែលជាស្ថាបនិក និងប្រធានក្រុមហ៊ុន Adani Group ដែលជាក្រុមហ៊ុនចម្រុះចូលរួមក្នុងការអភិវឌ្ឍន៍កំពង់ផែ អាកាសយានដ្ឋាន និងប្រតិបត្តិការផ្សេងទៀតនៅប្រទេសឥណ្ឌា។
ប្រភពពីទស្សនាវដ្តីពាណិជ្ជកម្មសហរដ្ឋអាមេរិក Forbes បានឱ្យដឹងថា បុរសវ័យ៦២ឆ្នាំរូបនេះ គឺជាមហាសេដ្ឋីទី២១លើពិភពលោក និងទី២ នៅឥណ្ឌា ក៏ដូចជាអាស៊ីផងដែរ ដែលមានទ្រព្យសម្បត្តិសរុប ៨១.១ពាន់លានដុល្លារអាមេរិក គិតត្រឹមថ្ងៃទី១៣ ខែកញ្ញា ឆ្នាំ២០២៤។
នៅពីក្រោយលោក Mukesh Ambani ដែលជាប្រធាន និងនាយកគ្រប់គ្រងក្រុមហ៊ុន Reliance Industries ដែលជាក្រុមហ៊ុនវិនិយោគចម្រុះរួមមាន ថាមពល គីមីឥន្ធនៈ ឧស្ម័នធម្មជាតិ ការលក់រាយ ទូរគមនាគមន៍ ប្រព័ន្ធផ្សព្វផ្សាយ និងវាយនភណ្ឌ។ បុរសវ័យ៦៧ឆ្នាំរូបនេះ គឺជាមហាសេដ្ឋីមានបំផុតនៅឥណ្ឌា និងអាស៊ី ជាមួយទ្រព្យសម្បត្តិសរុបចំនួន ១១៥ពាន់លានដុល្លារ៕
ចែករំលែកព័តមាននេះ