រាជធានីភ្នំពេញ ៖ តារាកំប្លែងនាយ ក្រិន បានសម្រេចបិទរោងល្ខោនផ្ទាល់ខ្លួនចោលហើយ បន្ទាប់ពីបានបើកដំណើរការអស់រយះពេលជាង៣ឆ្នាំមកនេះ ក្នុងពេលអាជីពកំប្លែងរបស់លោកក៏ហាក់នៅទ្រឹងគ្មានទីផ្សារផងដែរ ។ ចាប់តាំងពីរំសាយក្រុមកំប្លែងពីនាយ កុយ…
រាជធានីភ្នំពេញ ៖ តារាកំប្លែងនាយ ក្រិន បានសម្រេចបិទរោងល្ខោនផ្ទាល់ខ្លួនចោលហើយ បន្ទាប់ពីបានបើកដំណើរការអស់រយះពេលជាង៣ឆ្នាំមកនេះ ក្នុងពេលអាជីពកំប្លែងរបស់លោកក៏ហាក់នៅទ្រឹងគ្មានទីផ្សារផងដែរ ។
ចាប់តាំងពីរំសាយក្រុមកំប្លែងពីនាយ កុយ មក នាយ ក្រិន និងនាយ ហុងដា បានងាកមកបើកវង់ល្ខោនផ្ទាល់ខ្លួន សម្រាប់បន្តការរកប្រាក់ផ្គត់ផ្គង់ជីវភាពនៅក្នុងអាជីពសិល្បះមួយនេះ។
យ៉ាងណាដោយមិនសូវកាក់កប និងមានបញ្ហាប្រឈមមួយចំនួនផងនោះ នៅទីបំផុត នាយ ក្រិន ក៏បានសម្រេចបិទវង់ល្ខោនរបស់ខ្លួនជាស្ថាពរហើយ ។
តារាកំប្លែងមាឌល្អិត នាយ ក្រិន បានអះអាងប្រាប់កោះសន្តិភាពថា ក្រោយដំណើរបានប្រមាណជាង៣ឆ្នាំមកនេះ វង់ល្ខោនរបស់លោកបានបិទហើយ ដោយសារតែលោកជួបនូវបញ្ហាមួយចំនួន ។
លោកបញ្ជាក់ថា កាលពេលដែលបើកវង់ល្ខោនផ្ទាល់នោះគឺលោកមិនកូនក្រុមផ្ទាល់ខ្លួនឡើយ ពោលតួល្ខោនភាគច្រើនគឺមកពីបណ្តាវង់ផ្សងៗ ។
លោកថា នៅពេលមានការសម្តែងម្តងៗមានតួអង្គគេទំនេរគេចេះតែមកជួយយើង ប៉ុន្តែបើគេជាប់វង់ផ្សេងនោះគេមិនបានមក ហេតុនេះវាពិបាកសម្រាប់យើង ។ ចំណុចនេះហើយទើបយើងសម្រេចបិទរោងល្ខោននេះចោលវិញ ព្រោះយើងមិនមានលទ្ធភាព និងបញ្ហាប្រឈមមួយចំនួន ។
បើតាមនាយ ក្រិន កាលចំណាយលើការបើកវង់ល្ខោននេះគឺលោកបានបោះទុនប្រមាណជាង៥ម៉ឺនដុល្លារ ហើយវង់ល្ខោនរបស់លោកបានដំណើរការប្រមាណជាង៣ឆ្នាំនេះប៉ុណ្ណោះ មុនពេលសម្រេចបិទនាពេលនេះ ។
ដោយឡែកពាក់ព័ន្ធអាជីពកំប្លែងវិញ នាយ ក្រិន បានលើកឡើងថា នៅពេលនេះលោកមិនមានវង់សម្តែងជាមួយអ្នកណាឡើយ បន្ទាប់ពីរំសាយពីក្រុមនាយ កុយ នោះមក ។
លោកបញ្ជាក់ថា កន្លងមកដោយសារមិនមានកម្មវិធីសម្តែងកំប្លែងតាមប៉ុស្តិ៍នោះ ក្រុម នាយ កុយ ក៏បានរំសាយក្រុុម ដោយកូនក្រុមបានចេញទៅធ្វើការរៀងខ្លួន ។
យ៉ាងណាកន្លងមកលោកក៏ធ្លាប់ត្រូវបាននាយ កុយ ហៅអោយទៅសម្តែងម្តងម្កាលដែរ ប៉ុន្តែដោយសារលោកនៅឆ្ងាយ (បាត់ដំបង) ហេតុនេះលោកមិនអាចទៅកើត ។
លោកថា មិនអាចទៅកើតបដោយសារលោកនៅឆ្ងាយត្រូវចំណាយការធ្វើដំណើរ និងហូបចុកស្នាក់នៅ ខណះពេលការសម្តែងតាមប៉ុស្តិ៍ទូរទស្សន៍គឺបានកម្រៃតិចតួចប៉ុណ្ណោះ ។
ទោះជាយ៉ាងណាបើតាមនាយ ក្រិន ប្រសិនបើមានការហៅសម្តែងញឹកញាប់នោះលោកនឹងទៅ ប៉ុន្តែការហៅនោះគឺមានម្តងម្កាលប៉ុណ្ណោះ ។
នាយ ក្រិន បានលើកឡើងបន្ថែមថា បច្ចុប្បន្នលោកមិនសូវមានការសម្តែងច្រើនឡើយ ដោយសារលោកបានមករស់នៅស្រុកកំណើតនាខេត្តបាត់ដំបង ប៉ុន្តែយូរៗម្តងមានគេហៅថតជាឃ្លីបបង្ហោះតាមយូធូប និងគេហៅលេងល្ខោនម្តងម្កាល ។
លោកបញ្ជាក់ថា ដោយសារខ្សត់ទីផ្សារសម្តែង និងការបិទរោងល្ខោនផ្ទាល់ខ្លួននាពេលនេះគឺលោកបានជួបបញ្ហាជីវភាពយ៉ាងខ្លាំង ដោយសារមួយខែៗលោករកលុយសម្រាប់បង់ថ្លៃជំពាក់គេសឹងតែមិនគ្រប់ ៕
ចែករំលែកព័តមាននេះ