(អ៊ីតាលី)៖ អតីត​តារា​បាល់ទាត់​អង់គ្លេស​រូប​នេះ​កំពុង​រីករាយ​នឹង​វិស្សមកាល​រ៉ូមែនទិក​ជាមួយ Victoria ដែលជាភរិយាក្នុង​ប្រទេស​អ៊ីតាលី។

យោងតាម គេហទំព័រ The Sun បានឲ្យដឹងថា លោក David Beckham និងភរិយា​ ប្រើជីវិតអភិជន លំហែកម្សាន្តនៅលើទូកទេសចរណ៍ដ៏ប្រណិតមួយ ក្នុងប្រទេសអ៊ីតាលី។ អ្នក​ទាំង​ពីរ​កំពុង​រីករាយ​នឹង​វិស្សមកាល​ដ៏​រ៉ូមែនទិក​មួយ​បន្ទាប់​ពី​មាន​សកម្មភាព​ជា​ច្រើន​ក្នុង​ការ​ប្រារព្ធ​ខួប​អាពាហ៍ពិពាហ៍​២៥ឆ្នាំនៅ​ដើម​ខែ​កក្កដា។

តាមរយៈរូបថតដែលអ្នកប្រម៉ាញ់រូបថតបានបង្ហាញគេឃើញ អតីត​កីឡាករ​បាល់ទាត់​អង់គ្លេស​បាន​បង្ហាញ​រាង​កាយ​មាំ​មួន ទន្ទឹមនឹងនោះ Victoria សម្រាក និងហាលថ្ងៃនៅលើដំបូល។ បន្ទាប់​មក​គូស្នេហ៍​តារា​មួយ​គូ​នេះ​បាន​ញ៉ាំ​អាហារ​ថ្ងៃត្រង់​សប្បាយ​ជាមួយ​មិត្តភ័ក្តិ​ជា​ច្រើន​នាក់​លើ​ទូក​ដែល​មាន​តម្លៃ ១៦លាន​ផោន (ជាង ២០លាន​ដុល្លារ )។

កាល​ពី​ថ្ងៃ​ទី​៤ ខែ​កក្កដា កន្លង​ទៅ​នេះ គឺ​ជា​ខួប​គម្រប់​២៥​ឆ្នាំ​ដែល David Beckham និង Victoria រៀបការជាមួយគ្នា។ មកទល់នឹងពេលនេះ នៅក្នុងពិភពបាល់ទាត់ និងវិស័យកម្សាន្ត គ្រួសារ Beckham នៅតែត្រូវបានគេចាត់ទុកថាជាគ្រួសារដែលមានសុភមង្គលគំរូ។ ក្នុង​ឱកាស​ពិសេស David និង Victoria តែង​តែ​ចែក​រំលែក​អនុស្សាវរីយ៍ និង​ផ្ញើ​សារ​ស្នេហា​ឲ្យ​គ្នា​ទៅ​វិញ​ទៅ​មក។

អ្នកទាំងពីរកាន់កាប់អចលនទ្រព្យដ៏មានតម្លៃជាច្រើននៅក្នុងប្រទេសជាច្រើន យោងតាម កាសែត The Times ទ្រព្យសម្បត្តិសុទ្ធរបស់ David Beckham និង Victoria បច្ចុប្បន្នមានប្រហែល ៥៧៨ លានដុល្លារ៕