ពិតជាពីរោះណាស់ បុរសម្នាក់បង្ហើរសំឡេងយ៉ាងលន្លង់លន្លោច ធ្វើអោយមហាជនចាប់អារម្មណ៍ ក្រោយលោកចេះផ្លុំខ្លុយ និងប៉ីពកយ៉ាងស្ទាត់ជំនាញនោះ ។ ជាការពិត ខ្លុយជាឧបករណ៍ភ្លេងមួយប្រភេទដែលបានបន្សល់ទុកពីដូនតាខ្មែរ ហើយឧបករណ៍នេះមានសំឡេងបែបលួងលោម មនោសញ្ចេតនា…
ពិតជាពីរោះណាស់ បុរសម្នាក់បង្ហើរសំឡេងយ៉ាងលន្លង់លន្លោច ធ្វើអោយមហាជនចាប់អារម្មណ៍ ក្រោយលោកចេះផ្លុំខ្លុយ និងប៉ីពកយ៉ាងស្ទាត់ជំនាញនោះ ។ ជាការពិត ខ្លុយជាឧបករណ៍ភ្លេងមួយប្រភេទដែលបានបន្សល់ទុកពីដូនតាខ្មែរ ហើយឧបករណ៍នេះមានសំឡេងបែបលួងលោម មនោសញ្ចេតនា ពិរោះរណ្តំទៅតាមទំនុកបទភ្លេងនីមួយៗ ។
បើតាមយោងតាមវេចនានុក្រុមរបស់សម្តេចព្រះសង្ឃ រាជជួនណាតបានបង្ហាញថា « ឈ្មោះ គ្រឿងភ្លេងមហោស្រព សម្រាប់ផ្លុំ មានអណ្តាតជាស្នូល មានហែប» ។
តោះមកស្តាប់ពីជីវិតរបស់បុរសអ្នកផ្លុំខ្លុយ និងប៉ីពករូបនេះ ក្រោយលោកមានការអត់ធ្មត់តស៊ូ ដោយលោកមានចិត្តថែរក្សាអភិរក្សរបស់ទាំងនេះ សម្រាប់មនុស្សជំនាន់ក្រោយ និងថែរក្សាអោយគង់វង្សផងដែរនោះ ។ លោក ចាន់ ចាវ ជាអ្នកផ្លុំខ្លុយ ដែលចេះធ្វើឧបករណ៍ភ្លេងទាំងនេះ លោកមានស្រុកកំណើតនៅភូមិវះពោះ ឃុំខ្វាវ ស្រុកសំរោង ខេត្តតាកែវ ហើយបច្ចុប្បន្នលោកបើកកន្លែងលក់ខ្លុយ និងប៉ីពកនៅ ភូមិទំនប់ ឃុំទំនប់ ខណ្ឌទួលគោក រាជធានីភ្នំពេញ ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក ចាន់ ចាវ លើកឡើងថា លោកចេះផ្លុំខ្លុយប្រមាណជា១០ឆ្នាំមកហើយ ចំណែកប៉ីពក លោកទើបតែចេះបានប្រហែលជាមួយឆ្នាំនេះ ការរៀនរបស់លោកមានបទខ្លះ លោកចេះពីគ្រូ ហើយបទខ្លះទៀត លោកចេះដោយខ្លួនឯង ។ លោក ចាន់ ចាវ បន្តថា លោកក៏មានការធ្វើខ្លុយ និងប៉ីពក សម្រាប់លក់ បើគិតមកដល់បច្ចុប្បន្ននេះ មានរយៈពេល៤ឆ្នាំមកហើយ ។ លោកបន្ថែមទៀតថា ការធ្វើខ្លុយ និងប៉ីពកនេះ បើធ្វើឆាប់លឺត្រូវចំណាយពេលពី៣ទៅ៤ម៉ោងបានរួច ហើយសម្រាប់វត្ថុធាតុដើមយកមកធ្វើខ្លុយមានឬស្សីដកម៉ៃ ក្រឡើត ធ្វើពីដើមត្របែក និងដើមឈើខ្លឹមៗមួយចំនួនទៀត ចំណែកប៉ីពក ក៏ធ្វើពីឬស្សីដកម៉ៃដូចគ្នា តែអណ្តាតត្រូវធ្វើពីបន្ទះស្ពាន់ ។
លោកចាន់ ចាវបន្តថា បញ្ហាមួយចំនួននៅក្នុងការធ្វើឧបករណ៍ភ្លេងមួយប្រភេទនេះ ដូចជា ពិបាករកឬស្សីដកម៉ៃយកមកធ្វើ និងធ្វើទៅមិនលឺ ឬក៏បែកក្នុងពេលកំពុងធ្វើជាដើម ។ លោកថា កាលពីកន្លងទៅ ក៏ធ្លាប់បានចែករំលែកចំណេះជំនាញការផ្លុំ និងការធ្វើឧបករណ៍ទាំងនេះដល់កូនខ្មែរជំនាន់ក្រោយ ហើយចំណែកការលក់ឧបករណ៍ខ្លុយ និងប៉ីពកនេះ សព្វថ្ងៃលក់ដាច់មានការគាំទ្រច្រើនគួរសម្យ ។
លោក ចាន់ចាវបន្តថា មូលហេតុដែលលោកចាប់យកជំនាញមួយនេះដោយសារតែលោកស្រលាញ់ ហើយមានចិត្តអភិរក្ស សិល្បៈដូនតាដែលលោកបានរៀនសូត្រ កាលពីកន្លងទៅ ពោលចំណេះជំនាញ ផ្សារភ្ជាប់ជាមួយការថែរក្សា ដើម្បីកុំអោយបាត់បង់ទៅថ្ងៃអនាគត ។
ជាចុងក្រោយ លោក ចាន់ចាវ ចង់អោយកូនខ្មែរជំនាន់ក្រោយរៀនសូត្រជាមួយឧបករណ៍ភ្លេងខ្មែរ ជួយគ្នាអភិរក្សថែរក្សាស្នាដៃដូនតាខ្មែរកុំអោយបាត់បង់ និងត្រូវចែករំលែកផ្សព្វផ្សាយចំណេះដឹងផ្សេងៗដែលទាក់ទងជាមួយ និងសិល្បៈដូនតាខ្មែរដែលបានបន្សល់ទុកតាំងពីបុរាណ ៕ ដោយ ៖ សែ សម និងសម្រួលដោយ៖លីហួ គីមឆាយ
ចែករំលែកព័តមាននេះ