រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចុះទៅធ្វើទូតសុឆន្ទៈ ដែលភាសាអង់គ្លេសហៅថា Brand Ambassador ហើយយុវវ័យតែងហៅថា BA ឲ្យអ្នកដាំបន្លែនៅស្រុកត្រាំកក់…
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចុះទៅធ្វើទូតសុឆន្ទៈ ដែលភាសាអង់គ្លេសហៅថា Brand Ambassador ហើយយុវវ័យតែងហៅថា BA ឲ្យអ្នកដាំបន្លែនៅស្រុកត្រាំកក់ ខេត្តតាកែវ ។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានចែកចាយនៅលើបណ្តាញសង្គមរបស់លោក កាលពីថ្ងៃទី ១៩ ខែមិថុនា ឆ្នាំ២០២៤ ថា លោករដ្ឋមន្ត្រី ឌិត ទីណា បានចុះធ្វើទូតសុឆន្ទៈនេះ នៅពេលលោកធ្វើដំណើរចុះលើកទឹកចិត្ត និងគាំទ្របន្លែមានសុវត្ថិភាពដល់អ្នកដាំបន្លែ នៅភូមិសាស្ត្រខាងលើ ។
អ្នកនាំពាក្យរូបនេះបានលើកឡើងថា « BAបន្លែខ្មែរ » ៖ ឯកឧត្តមរដ្ឋមន្ត្រីមានប្រសាសន៍ថា ដើម្បីឱ្យច្បាស់ថា បន្លែអ្នកត្រាំកក់ពិតជាមានសុវត្ថិភាពមែន ទាល់តែថ្នាក់ដឹកនាំក្រសួងហ៊ានហូបឱ្យមើលភ្លាមៗមុនគេ ហើយហូបផ្ទាល់នៅហ្នឹងកន្លែងដាំ ក្នុងរោងតែម្តង ។ រដ្ឋមន្ត្រីក៏ហូប អភិបាលខេត្តក៏ហូប!» ។
លោកបានបន្តទៀតថា អនាគតទៅ គឺដូច្នេះឯង យើងចង់មានកន្លែងសហគមន៍ដាំបន្លែដ៏ធំមួយនៅត្រាំកក់ «ដាំបន្លែលក់ចេញក្នុងតម្លៃសមរម្យ ធានាថា មិនប៉ះពាល់ដល់សុខភាព ហើយអាចផ្គត់ផ្គង់បានជារៀងរាល់ថ្ងៃ»។ សំខាន់ គឺដឹងប្រភពច្បាស់លាស់ មិនបន្លំ និងអាចធានាបានថា ពិតជាដាំដោយខ្មែរ ។
កាលពីពេលថ្មីៗកន្លងទៅ ពាក់ព័ន្ធជាមួយនឹងបន្លែដែលមានសុវត្ថិភាពនេះ ខាងក្រសួងកសិកម្មក៏បានប្រកាសនូវបញ្ជីអ្នកដាំបន្លែមានសុវត្ថិភាពនៅទូទាំងប្រទេស ផងដែរ ៕
ចែករំលែកព័តមាននេះ