ចិន ៖ ទឹកជ្រោះដ៏ខ្ពស់បំផុតប្រចាំប្រទេសចិនរងការរិះគន់ថា ជាកន្លែងទេសចរណ៍ដែលបង្កើតឡើងដោយមនុស្ស បន្ទាប់ពីអ្នកឡើងភ្នំរកឃើញថា ទឹកជ្រោះនេះហូរចេញពីបំពង់ទុយោបង្កប់ក្នុងថ្ម ។
ការប្រទះឃើញបំពង់ទុយោនៅត្រង់ចំណុចកំពូលខ្ពស់បំផុតនៃទឹកជ្រោះ Yuntai កំពុងទទួលរងនូវរលកនៃការរិះគន់ដូចខ្យល់ព្យុះសង្ឃរាពីសំណាក់អ្នកនិយមលេងបណ្តាញសង្គមក្នុងប្រទេសចិន។
ទឹកជ្រោះ Yuntai ស្ថិតក្នុងខេត្តហឺណាន ជាខេត្តមួយនៅជ្រលងទន្លេលឿង ភាគកណ្តាលប្រទេសចិន ត្រូវបានគេចាត់ទុកថា ជាទឹកជ្រោះដែលមានកម្ពស់ខ្ពស់បំផុត៣១៤ម៉ែត្រ ដែលទាក់ទាញមនុស្សជាច្រើនលាននាក់ជារៀងរាល់ឆ្នាំ។
ដើមហេតុដែលនាំឱ្យផ្ទុះរឿងចម្រូងចម្រាសនោះ គឺកាលពីពេលថ្មីៗនេះ អ្នកឡើងភ្នំម្នាក់បានប្រទះឃើញរឿងដ៏ភ្ញាក់ផ្អើលថា ទឹកដែលធ្លាក់នៅក្នុងទឹកជ្រោះ Yuntaiនេះ គឺធាតុពិត មិនមែនជាទឹកដែលមានប្រភពពីធម្មជាតិនោះទេ តែទឹកដែលធ្លាក់នៅជ្រោះមួយនេះ មានប្រភពចេញពីបំពង់ទុយោមួយនៃផ្នែកខាងលើនៃទឹកធ្លាក់ ។
ក្រោយប្រទះឃើញបែបនេះ អ្នកឡើងភ្នំខាងលើ ក៏បានថតវីដេអូយកមកបង្ហោះលើ Weibo និង Douyin នៅថ្ងៃទី៣ ខែមិថុនា ដោយមានអ្នកចូលមើលរាប់លានដងបង្កើតឱ្យមានមតិវែកញែករាប់ម៉ឺនក្នុងរយៈពេលដ៏ខ្លី និងល្បីរន្ទឺដល់បណ្តាសារ ព័ត៌មានទាំងក្នុងប្រទេសចិន និងទូទាំងសកលោក រួមមាន South china morningpost, New York Post, The Guardian, BBC និង CNN ជាដើម។
ខណៈព័ត៌មានស្តីពីប្រភពដើមនៃទឹកជ្រោះ Yuntai បានសាយភាពក្លាយជាប្រធានបទក្តៅពេញបណ្តាញអ៊ីនធើរណេតនោះ ថ្នាក់ដឹកនាំខេត្តហឹណាន បានញាប់ដៃញាប់ជើងបញ្ជូនមន្ត្រីជំនាញចុះទៅស៊ើបអង្កេតករណីនេះ ហើយការពិតក៏ត្រូវបានលាតត្រដាង។
មន្ត្រីជំនាញនៃពីឧទ្យានទេសចរណ៍ Yuntai បានបកស្រាយការពិតប្រាកដពន្យល់ទៅមហាជន និងភ្ញៀវទេសចរយ៉ាងដូច្នេះតាមរយៈ សេចក្តីថ្លែងការណ៍មួយថា ៖ ភ្ញៀវទេសចររាប់លាននាក់ធ្វើដំណើរមកកាន់ទីនេះជារៀងរាល់ឆ្នាំ ក្នុងគោលបំណងបានទស្សនាដោយផ្ទាល់ភ្នែក នូវទេសភាពដ៏អស្ចារ្យ នៃទឹកជ្រោះធ្លាក់ដ៏ខ្ពស់ និងមានអាយុកាលជាងមួយពាន់លានឆ្នាំមួយនេះ។
ជាអកុសល ដោយសារតែការប្រែប្រួល អាកាសធាតុ ក្នុងរដូវប្រាំងនេះ ទឹកធម្មជាតិដែលធ្លាក់មានកម្រិតតិចតួចបំផុត សាកស្រមៃមើល បើអ្នកទស្សនាបានមកដល់ហើយ តែមិនបាន នូវអ្វីដែលខ្លួនគិតប៉ង តើពួកគេនឹងខកចិត្តប៉ុណ្ណា? ដូចនេះទើបពួកយើងសម្រេចកែសម្រួលបន្ថែមប្រភពទឹក ដើម្បីធានាថា សម្រស់ទឹកជ្រោះនៅតែស្ថិតក្នុងទម្រង់ដ៏ស្រស់ស្អាតបំផុតជាប់ជានិច្ច។
សេចក្តីថ្លែងការណ៍នោះបន្ថែមយ៉ាងដូច្នេះថា «ការកែលម្អតិចតួច» នៅរដូវប្រាំង ដើម្បីអោយអ្នកទស្សនានៅរដូវស្លឹកឈើជ្រុះមានអារម្មណ៍ថាការធ្វើដំណើររបស់ពួកគេមានតម្លៃ» សេចក្តីថ្លែងការណ៍បកស្រាយនេះបានទាក់ទាញមតិវិជ្ជមានភាគច្រើន ដោយអ្នកលេងបណ្តាញសង្គម យល់ពីហេតុផលនេះ ដោយបញ្ចេញមតិថា «ទឹកធ្លាក់បុរាណ ក៏មានរដូវប្រាំង និងរដូវទឹកជំនន់ដែរ» ខណៈម្នាក់ទៀតនិយាយថា៖ «សេចក្តីថ្លែងការណ៍នេះសរសេរបានល្អ ហើយពួកគេមិនបានបដិសេធការពិតទេ» ។ ប៉ុន្តែក៏នៅតែមានមតិមួយចំនួនស្តីបន្ទោសថា ការធ្វើបែបនេះហាក់បីដូចជា ការប្រឆាំងទៅនឹងធម្មជាតិ។
យ៉ាងណាក៏ដោយ ការកែសម្រួលប្រភពទឹកនៅទឹកជ្រោះ Yuntai មិនមែនជាទឹកជ្រោះទីមួយទេក្នុងប្រទេសចិន គេនៅចាំបានថា កាលពីឆ្នាំ២០០៦ ទឹកជ្រោះ Huangguoshu ក៏បានប្រើប្រាស់វិធីសាស្ត្រស្រដៀងគ្នានេះដើម្បីបន្ថែមបរិមាណទឹកធ្លាក់ផងដែរ។ សូមជម្រាបថា ទឹកធ្លាក់ Yuntai មានប្រវែង ៣១៤ ម៉ែត្រ ស្ថិតនៅខាងក្នុង Yuntai Mountain Geopark ដែលជាឧទ្យានភូគព្ភសាស្ត្រសកលរបស់ UNESCO៕
ចែករំលែកព័តមាននេះ