ដោយសទ្ធាជ្រះថ្លា និងដឹងគុណចំពោះមរតកស្នាដៃរបស់សិល្បករខ្មែរ លោកទេសរដ្ឋមន្ត្រី ប៉ែន វិបុល បានកសាងចេតិយធំពីរ នៅក្នុងបរិវេណវត្តតាម៉ឹម ឃុំវត្តតាម៉ឹម ស្រុកសង្កែ ខេត្តបាត់ដំបង…
ដោយសទ្ធាជ្រះថ្លា និងដឹងគុណចំពោះមរតកស្នាដៃរបស់សិល្បករខ្មែរ លោកទេសរដ្ឋមន្ត្រី ប៉ែន វិបុល បានកសាងចេតិយធំពីរ នៅក្នុងបរិវេណវត្តតាម៉ឹម ឃុំវត្តតាម៉ឹម ស្រុកសង្កែ ខេត្តបាត់ដំបង ដែលចេតិយ៍មួយសម្រាប់លោកស្រី ប៉ែន រ៉ន និងកូនៗ ឯមួយទៀតសម្រាប់លោកស្រី ហួយ មាស និងកូនៗព្រមទាំងស្វាមី ដែលបានបាត់បង់ជីវិតក្នុងរបបប្រល័យពូជសាសន៍ខ្មែរក្រហម។
ចេតិយ៍ទាំងពីរនេះ បានកសាងតាមរចនាបទបូរាណខ្មែរចំណាយពេលវេលាកសាងអស់រយះពេល៦ខែ ដោយផ្តើមកសាងកាលពីថ្ងៃទី១១ ខែសីហា ឆ្នាំ២០២៣ ហើយបានកសាងរួចរាល់ជាស្ថាពរនៅថ្ងៃទី១៨ ខែកុម្ភៈ ឆ្នាំ២០២៤ ដោយចំណាយថវិកាសរុបចំនួន ៣៤០០០ដុល្លារ ជាថវិកាផ្ទាល់របស់លោកទេសរដ្ឋមន្ត្រី ប៉ែន វិបុល និងលោកជំទាវ ។
លោកទេសរដ្ឋមន្ត្រី ប៉ែន វិបុល បានអះអាងថា គោលបំណងនៃការកសាងចេតិយនេះគឺដោយសារពេញចិត្តសំលេងរបស់ពួកគាត់ ហើយមានចិត្តអាណឹតខ្លោចផ្សាចំពោះការស្លាប់យ៉ាងអយុត្តិធម៌របស់ពួកគាត់ក្រោមស្នាដៃនៃបិសាចខ្មែរក្រហម ។
លោកបន្តថា ចំពោះលោកស្រីប៉ែន រ៉ន វិញ មានលក្ខណះពិសេសបន្ថែមទៀតគឺត្រង់ថា លោកស្រីប៉ែនរ៉ន មានស្រុកកំណើត និងត្រកូលដូចបិតាបង្កើតរបស់លោកគឺ ឯកឧត្តម ប៉ែន ណាវុឌ្ឈ ។
លោកបញ្ជាក់ថា ក្រោយពីបញ្ចប់ការកសាងចេតិយទាំងពីរនេះរួចហើយ ក្រុមការងាររបស់លោកនឹងចុះទៅយកអដិ្ឋធាតុឧបកិច្ច ពីកន្លែងចុងក្រោយរបស់តារាចម្រៀងទាំងពីរ រួចយកមកតម្កល់ទុកក្នុងវត្តសិន រង់ចាំរៀបចំកម្មវិធីឆ្លង និងដង្ហែអដិ្ឋធាតុតម្កល់ក្នុងចេតិយ៍ ហើយក្រោយពេលរៀបចំកម្មវិធីចប់សព្វគ្រប់លោក នឹងប្រគល់ចេតិយទាំងពីរនេះជូនទៅក្រុមគ្រួសារតារាចម្រៀងទាំងពីរដួងជាអ្នកថែរក្សា និងគ្រប់គ្រង ។
បើតាមលោកទេសរដ្ឋមន្ត្រីតាមរយះសមិទ្ធិផលនេះលោកក៏ចង់ឃើញអ្នកគាំទ្រស្រឡាញ់តារាចម្រៀងទាំងពីរ ពេលបានឆ្លងកាត់មកលេងទឹកដីខេត្តបាត់ដំបង អាចចូលមកអុជធូបគោរពវិញ្ញាណក្ខន្ធជូនពួកគាត់ និងចូលរួមជួយសំអាតរក្សាទីកន្លែងស្នាក់ចុងក្រោយរបស់ពួកគាត់ផង ។
ទោះជាយ៉ាងណាក្រុមគ្រួសារនៃតារាចម្រៀងទាំងពីរ ក៏ដូចជាប្រជាជនអ្នកស្នេហាវិស័យសិល្បៈជំនាន់ដើម សូមគោរពអរគុណយ៉ាងជ្រាលជ្រៅចំពោះទឹកចិត្តជ្រះថ្លាមហាសប្បុរសរបស់លោកទេសរដ្ឋមន្ត្រី ប៉ែន វិបុល និងលោកជំទាវ ក្នុងការចំណាយវេលាថវិកាគិតគូយ៉ាងចិត្តទុកដាក់ចំពោះសិល្បករខ្មែរ ដែលមានស្នាដៃឧត្តុង្គឧត្តមជាច្រើនបំរើវប្បធម៌សិល្បៈខ្មែរនាជំនាន់មុន ។
ជាការកត់សម្គាល់យោងតាមការស្រាវជ្រាវយ៉ាងលំអិតពីលោក វីរៈ វ៉ារ៉ានី ប្រធានក្រុមដំណើរខ្មែរបានអោយដឹងថា លោកស្រី ប៉ែន រ៉ន និងកូនប្រុសពីរនាក់ត្រូវបានខ្មែរក្រហមសម្លាប់នៅបរិវេណវត្តទ្រព្យគរ ភូមិត្រពាំងទឹម ឃុំត្រពាំងសាប ស្រុកបាទី ខេត្តតាកែវ នៅកំឡុងខែឧសភា ឆ្នាំ១៩៧៥ ។
ចំណែកលោកស្រី ហួយ មាស ត្រូវខ្មែរក្រហមសម្លាប់យកទៅឃុំឃាំង និងធ្វើទារុណកម្មយ៉ាងព្រៃផ្សៃនៅព្រះវិហារវត្តបុប្ផាវតី ហៅវត្តធម្មយុត្តិ ស្ថិតនៅក្នុងភូមិរាមគន់ ឃុំគារ ស្រុកមោងឬស្សី ខេត្តបាត់ដំបង ហើយសម្លាប់ចោលនៅខាងក្រោយវត្តនោះ នៅចុងខែមេសា ឆ្នាំ១៩៧៧ ៕
ចែករំលែកព័តមាននេះ