រាជធានីភ្នំពេញ ៖ លោក វ៉ាង យី (WANG Yi) សមាជិកការិយាល័យនយោបាយ និងជាប្រធានការិយាល័យគណៈកម្មការកិច្ចការបរទេសនៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិនបានមកដល់កម្ពុជា នៅថ្ងៃទី២១ ខែមេសា ឆ្នាំ២០២៤ ដើម្បីបំពេញទស្សនកិច្ចផ្លូវការរយ:ពេលបីថ្ងៃ ដែលគេជឿថា នឹងមានការពិភាក្សាដល់កិច្ចសហប្រតិបត្តិការសំខាន់ៗរវាងប្រទេសទាំងពីរ ទាំងលើទិដ្ឋភាពនយោបាយ សេដ្ឋកិច្ច និងសន្តិសុខ ។
គេរំពឹងថា លោក វ៉ាង យី នឹងធ្វើការពិភាក្សាជាមួយឥស្សរជនសំខាន់ៗរបស់កម្ពុជាពិសេសសម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជាលើកប្រធានបទជាច្រើនដូចជាទំនាក់ទំនងទ្វេភាគីបញ្ហានយោបាយ សេដ្ឋកិច្ច សន្តិសុខជាដើម ។ ទន្ទឹមនោះក៏នឹងមានការគូសបញ្ជាក់អំពីការគាំទ្រគ្នាទៅវិញទៅមករវាង ប្រទេសទាំងពីរ ។
ទស្សនកិច្ចរបស់លោកវ៉ាង យី នៅកម្ពុជាពេលនេះនឹងស្ថិតនៅក្រោមការតាមដានយ៉ាងយកចិត្តទុកដាក់របស់សារព័ត៌មានជាតិ និងអន្តរជាតិ ខណ:ដែលគម្រោងព្រែកជីកតេជោ ហ្វូណនតម្លៃ១,៧ពាន់លានដុល្លារ បានក្លាយជាប្រធានបទក្តៅសម្រាប់ការពិភាក្សាវែកញ៉ែក បន្ទាប់ពីវៀតណាមបានបង្ហាញការព្រួយបារម្ភរបស់ខ្លួនចំពោះគម្រោងនេះដោយភ័យខ្លាចថា វាអាចនឹងក្លាយជាមធ្យោបាយដែលធ្វើអោយយោធាចិនចូលកាន់តែជិតដល់ព្រំដែនវៀតណាម និងផលប៉ះពាល់ដល់ទន្លេមេគង្គ ។ ប៉ុន្តែមេដឹកនាំកម្ពុជាទាំងអស់បានបញ្ជាក់ហើយបញ្ជាក់ទៀតថា គម្រោងនេះ គឺមានលក្ខណៈសេដ្ឋកិច្ច និងសង្គមសុទ្ធសាធ ហើយក៏មិនប៉ះពាល់ដល់ទន្លេមេគង្គនោះឡើយ ចំណែករដ្ឋធម្មនុញ្ញកម្ពុជាក៏បានចែងច្បាស់ហើយថាមិនអនុញ្ញាតអោយមានវត្តមានកងទ័ពបរទេសនៅកម្ពុជាឡើយ។ ពិសេស សម្តេចតេជោហ៊ុន សែន ប្រធានព្រឹទ្ធសភាបានប្រតិកម្មយ៉ាងខ្លាំងថា វាជារឿងប្រឌិត ដែលបរទេសភ្ជាប់គម្រោងព្រែកជីក តេជោ ហ្វូណន ទៅនឹងលទ្ធភាពប្រើប្រាស់ដោយយោធាចិនចូលជិតព្រំដែនវៀតណាម ។
ជាមួយនឹងស្ថានភាពដូច្នេះ អ្នកវិភាគ និងសារព័ត៌មានចង់ដឹងថា តើ គម្រោងព្រែកជីក តេជោ ហ្វូណន នឹងស្ថិតក្នុងចំណោមរបៀបវារ:ជាច្រើន ទៀតនៃការពិភាក្សានៅក្នុងដំណើរទស្សនកិច្ចរបស់លោក វ៉ាង យី នៅកម្ពុជាឬទេ ។ ប៉ុន្តែទោះបីជាយ៉ាងណាក្តីរហូតមកទល់ពេលនេះមិនទាន់មាន ការបញ្ជាក់ពីប្រភពខាងរដ្ឋាភិបាលកម្ពុជានៅឡើយទេ ។ ខណ:ចិនកំពុងមានឥទ្ធិពលកាន់តែខ្លាំង និងប្រកួតប្រជែងជាមួយអាមេរិកនោះរាល់ជំហាន និងទស្សនកិច្ចរបស់ប្រមុខការទូតចិនតែងស្ថិតនៅក្រោមការតាមដានយ៉ាងខ្លាំងក្នុងចំណោមសារព័ត៌មាន និងអ្នកតាមដានសភាពការណ៍អន្តរជាតិ ។
ទន្ទឹមពេលជាមួយគ្នានោះ សម្តេចតេជោ ហ៊ុន សែន ដែលជាបុរសខ្លាំងនៅកម្ពុជានោះក៏ជាមេដឹកនាំមួយរូប ដែលស្ថិតក្រោមការតាមដានខ្លាំងផងដែរ ។ ដូច្នេះគេក៏ចង់ដឹងថា តើជំនួបរវាងសម្តេចតេជោ ហ៊ុន សែន និងលោក វ៉ាង យី នោះនឹងនិយាយដល់រឿងអ្វីខ្លះទាក់ទងទំនាក់ទំនងទ្វេភាគី និងបញ្ហាតំបន់ និងអន្តរជាតិ ។
ក្នុងអំឡុងទស្សនកិច្ចនេះ លោក វ៉ាង យី នឹងចូលក្រាបបង្គំគាល់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង ព្រមទាំងអញ្ជើញចូលជួបសម្តែងការគួរសមដាច់ដោយឡែកជាមួយសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
លោក វ៉ាង យី នឹងក្លាយជាប្រុមុខកាទូតដំបូងគេដែលនឹងជួបសម្តេចតេជោក្នុងនាមសម្តេច ជាប្រធាន ព្រឹទ្ឋសភា។
សេចក្តីប្រកាសព័ត៌មានរបស់ក្រសួងការបទេសកម្ពុជា កាលពីថ្ងៃទី១៨ ខែ មេសា បានអោយដឹងថា លោក វ៉ាង យី នឹងធ្វើជាសហប្រធានជាមួយ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាដឹកនាំកិច្ចប្រជុំគណៈកម្មាធិការសម្របសម្រួល អន្តររដ្ឋាភិបាលកម្ពុជា-ចិនលើកទី៧ ។ លោកក៏នឹងអញ្ជើញជួបពិភាក្សា ទ្វេភាគីជាមួយ លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិដើម្បីផ្លាស់ប្តូរទស្សនៈអំពីការពង្រឹងបន្ថែមទៀតនូវទំនាក់ទំនងដ៏ជិតស្និទ្ធ និងល្អប្រសើរដែលមាន ស្រាប់លើគ្រប់វិស័យ ។
សូមបញ្ជាក់ថា ដំណើរទស្សនកិច្ចនាពេលខាងមុខនេះធ្វើឡើងស្របពេល នឹងការប្រារព្ធឆ្នាំនៃការផ្លាស់ប្តូរប្រជាជន និងប្រជាជនកម្ពុជា-ចិន ហើយនឹងរួមចំណែកដល់ការពង្រឹងមិត្តភាពដែកថែប និងពង្រីកបន្ថែមទៀតនូវកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយធ្វើឱ្យស៊ីជម្រៅនូវការកសាងសហគមន៍វាសនារួមប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់លើកកម្ពស់ក្របខ័ណ្ឌកិច្ចសហប្រតិបត្តិការត្បូងពេជ្រ ព្រមទាំងជំរុញកិច្ចសហប្រតិបត្តិការនៅក្នុងវេទិកាតំបន់ និង អន្តរជាតិ ដើម្បីជាផលប្រយោជន៍ទៅវិញទៅមកសម្រាប់ប្រទេស និង ប្រជាជនទាំងពីរ ។
ខណៈកម្ពុជាកំពុងព្យាយាមរុញសន្ទុះកំណើនសេដ្ឋកិច្ចរបស់ខ្លួនអោយកាន់តែខ្លាំងនោះ មេដឹកនាំកម្ពុជាទំនងជានឹងបង្ហាញផងដែរពីគោលបំណងរបស់ខ្លួន ដើម្បីអោយចិនមកវិនិយោគ និងទេសចរណ៍នៅកម្ពុជាកាន់តែច្រើនថែមទៀត ហើយក៏នឹងជំរុញពាណិជ្ជកម្មរវាងប្រទេសទាំងពីរផងដែរ ។
រហូតមកដល់ពេលនេះ ចិន គឺជាប្រទេសដែលមានសារសំខាន់បំផុតសម្រាប់ការរីកចម្រើន សេដ្ឋកិច្ចនៅកម្ពុជា ទាំងវិស័យពាណិជ្ជកម្ម ទេសចរណ៍ និងវិនិយោគ៕
ចែករំលែកព័តមាននេះ