នៅក្នុងឱកាសចូលឆ្នាំថ្មីម្តងៗ កំណើនទទួលទានគ្រឿងស្រវឹងនៅកម្ពុជាកើនឡើង។ តាមស្តង់ និងកន្លែងលក់ដូរគ្រឿងស្រវឹងនានា បានត្រៀមក្នុងស្តុកជាស្រេចនូវស្រាបៀរ និងសុរា ដើម្បីលក់ចេញនៅក្នុងថ្ងៃចូលឆ្នាំថ្មីនេះ។ គេសង្កេតឃើញតាមភូមិ តាមស្រុកនីមួយៗ ពលរដ្ឋបានជួបជុំគ្នាលេងល្បែងប្រជាប្រិយ…
នៅក្នុងឱកាសចូលឆ្នាំថ្មីម្តងៗ កំណើនទទួលទានគ្រឿងស្រវឹងនៅកម្ពុជាកើនឡើង។ តាមស្តង់ និងកន្លែងលក់ដូរគ្រឿងស្រវឹងនានា បានត្រៀមក្នុងស្តុកជាស្រេចនូវស្រាបៀរ និងសុរា ដើម្បីលក់ចេញនៅក្នុងថ្ងៃចូលឆ្នាំថ្មីនេះ។
គេសង្កេតឃើញតាមភូមិ តាមស្រុកនីមួយៗ ពលរដ្ឋបានជួបជុំគ្នាលេងល្បែងប្រជាប្រិយ និងការកម្សាន្តសប្បាយ តាមទម្លាប់ភូមិឃុំរបស់ខ្លួន ។ ជាមួយគ្នានេះ គេកម្រចោលគ្រឿងស្រវឹងណាស់។សុរា ស្រាបៀរ ទឹកត្នោតជូរ គឺគ្រឿង ស្រវឹងដែលពលរដ្ឋ ពិសេសយុវជនកម្ពុជាទទួលទាន។
ដោយសារពលរេដ្ឋទទួលទានគ្រឿងស្រវឹងច្រើននៅក្នុងឱកាសចូលឆ្នាំបែបនេះ ទើបនៅពេលចូលឆ្នាំ ឬជិត ចូលឆ្នាំម្តងៗ សិល្បករ តែងតែផលិតរឿងកំប្លែងនានាមកសម្តែង ឬនិទានជូនទស្សនិកជនសប្បាយរីករាយ។
ពលរដ្ឋជាច្រើនទំនងជាបានស្តាប់និងបានទស្សនាហើយនូវការកំប្លែង ដែលឪពុកម្តាយ ដើរយកលុយសងគេ ក្រោយចូលឆ្នាំចប់ ជំនួសកូនខ្លួន។ កូនៗបានដើរជំពាក់លុយគេថ្លៃទិញស្រាបៀរមកផឹកក្នុងឱកាសចូលឆ្នាំ។ លុះចូលឆ្នាំចប់ ឪពុកម្តាយដើរសងគេជំនួស។
រឿងកំប្លែងច្រើនតំណាលថា ពេលចូលឆ្នាំកូនយកប្រាក់១០ម៉ឺនរៀលជូនម្តាយឪពុក តែចូលឆ្នាំចប់ ម្តាយ យកលុយ១០០ឬ២០០ដុល្លារ ដើរសងគេជំនួសកូនដែលបានទិញស្រាបៀរគេជំពាក់។
សាច់រឿងនេះផលិតមកដើម្បីសើចសប្បាយប៉ុន្តែទំនងអាចមានការពិត។ ការពិតដោយសារ តែពលរដ្ឋ ពិសេសយុវជនតែម្តង បានទទួលទានគ្រឿងស្រវឹងច្រើនលើសលប់នៅក្នុងឱកាសចូលឆ្នាំថ្មីម្តងៗ។
លោកណារ៉ា យុវជនម្នាក់រស់នៅខេត្តកំពង់ចាម នៅពេលសួរថាធ្លាប់ទទួលទានគ្រឿងស្រវឹង ហើយជំពាក់ គេឱ្យម្តាយជាអ្នកសងទ? យុវជនវ័យ២៥ឆ្នាំរូបនេះបានសើចនិងបដិសេធថាមិនធ្លាប់ទេ។
ណារ៉ាបានដឹងពីរឿងកំប្លែងនោះ ហើយគាត់បាននិយាយទំនងអាចជាការពិត។ ដ្បិតចូលឆ្នាំម្តងៗ ទាំងលោក ទាំងគេ គឺទទួលទានគ្រឿងស្រវឹងច្រើនណាស់។ «នៅក្នុងពេលទៅស្រុក៤ឬ៥ថ្ងៃចូលឆ្នាំនេះ ថ្ងៃណាក៏ផឹកដែរ។ ឆ្នាំខ្លះមិនបានទៅវត្តទេ គឺនាំគ្នាអង្គុយផឹកពីព្រឹកដល់យប់តែម្តង»។
តាមណារ៉ា ថាក្រុមរបស់គាត់អាចទទួលទានស្រាបៀមិនតិចជាង១០កេសនោះទេ នៅក្នុងឱកាសចូលឆ្នាំ បីឬបួនថ្ងៃនោះ។ «យូរៗពួកយើងបានជួបគ្នាម្តងដូច្នេះគ្មានអ្វីក្រៅពីអង្គុយផឹកនោះទេ។ អ្នកចូលរួមផឹក មានមិត្តភ័ក្តិ អ្នកភូមិ និងបងប្អូន»។
កាលពីពេលថ្មីៗនេះ មានរបាយការណ៍មួយបង្ហាញថាកម្ពុជាជាប់លេខរៀងទី៣ មានពលរដ្ឋផឹកស្រាច្រើន នៅក្នុង ពិភពលោក។ តាមរបាយការណ៍របស់ Wisevoter ឃើញថាកម្ពុជាឈរនៅលេខរៀងទី៣ ដែលមាន ប្រជាជនផឹកស្រាច្រើនជាងគេ និងលេខរៀងទី៣៦នៅក្នុងចំណោមប្រទេសនៅលើពិភពលោក ខណៈឡាវវិញ ឈរនៅលេខរៀងទី១ក្នុងតំបន់អាស៊ាន និងលេខរៀងទី១៨នៅលើពិភពលោក បន្ទាប់មកប្រទេសវៀតណាម ឈរនៅលេខទី២ក្នុងតំបន់អាស៊ាន និងលេខរៀងទី២៨ នៅលើពិភពលោ ក។ ចំណែកប្រទេស អាស៊ានដែលមានប្រជាជនផឹកស្រាទាបជាងគេ គឺប្រទេសព្រុយណេ បន្ទាប់មកមានសាំងហ្គាពួរ ម៉ាឡេស៊ី និងប្រទេឥណ្ឌូនេស៊ី។
កាលពីដើមឆ្នាំ ២០២៤ ក្រសួងសុខាភិបាល បានចេញ សេចក្តីប្រកាសព័ត៌មាន អំពីផលប៉ះពាល់នៃការទទួលទានគ្រឿងស្រវឹង ដែលមានហានិភ័យធ្ងន់ធ្ងរដល់សុខភាព ព្រោះការទទួលទានគ្រឿងស្រវឹង នឹងធ្វើឱ្យមានជំងឺជាច្រើន ៖ ដូចជា ក្រិនថ្លើម ប្រព័ន្ធភាពស៊ាំចុះខ្សោយ មានបញ្ហាផ្លូវចិត្ត អសមត្ថភាពផ្លូវភេទ ជំងឺសរសៃឈាម និងបេះដូង ធ្វើឱ្យទារកលូតលាស់មិនប្រក្រតី លើសឈាមលើសអាស៊ីត លើសជាតិស្ករ មហារីកបំពង់ក បំពង់អាហារ ថ្លើម ពោះវៀន សុដន់ និងមហារីកឈាមជាដើម ៕
ចែករំលែកព័តមាននេះ