ទីក្រុងញូយ៉ក៖ ពាក់ព័ន្ធនឹងករណីនាវាដឹកទំនិញបើកបុកគល់ស្ពាននៅទីក្រុងបាល់ទីម៉ ប្រទេសអាមេរិកកាលពីយប់មិញគេសន្និដ្ឋានថាមនុស្ស៦នាក់ដែលធ្លាក់ចូលទៅក្នុងទឹកបានស្លាប់អស់ទៅហើយ។ គ្រាន់តែគេរកឃើញសាកសពមិនទាន់ឃើញ។ មូលហេតុដែលគេសន្និដ្ឋានដូច្នេះដោយសារទឹកទន្លេត្រជាក់ខ្លាំង, ហើយពួកគេធ្លាក់ទៅក្នុងទឹករាប់សិបម៉ោងមកហើយ។
ដំណើរការជួយសង្គ្រោះត្រូវពន្យារពេល១៨ម៉ោងដោយសារបញ្ហាប្រឈមច្រើន។ ឥឡូវនេះ គេលែងប្រើពាក្យជួយសង្គ្រោះទៀតហើយ គេប្រើពាក្យស្វែងរកសាកសព និងស្រង់ពួកគេឡើងមកលើគោក។ អាជ្ញាធរគ្មានសង្ឃឹមថាអាចរកឃើញអ្នកនៅរស់ទេ។ រហូតដល់ថ្ងៃរះស្រួលបួលសិនគេនឹងបញ្ជូនក្រុមអ្នកមុជទឹកទៅបាតទន្លេដើម្បីស្រង់សាកសពឡើងមកលើគោក។
មុនពេលកើតហេតុ, នាវាឈ្មោះដាលី (Dali) ដែលដោតទង់ជាតិសិង្ហបុរីបានចាកចេញដំណើរពីកំពង់ផែបាល់ទីម៉សំដៅទៅប្រទេសសិរីលង្កាដោយត្រៀមប្រើប្រាស់ពេលវេលាសរុប២៧ថ្ងៃ។ ចេញដំណើរបានតែប៉ុន្មាននាទីប៉ុណ្ណោះ នាវានេះក៏រលត់ម៉ាស៊ីនកណ្ដាលទី។ អ្នកបើកនាវាក៏បញ្ជាឱ្យទម្លាក់យុថ្កាចុះទៅបាតទន្លេ និងបួងចង្កូតនាវាមួយទំហឹងមិនឱ្យបត់ទៅខាងស្ដាំ។ គាត់ថែមទាំងទាក់ទងទៅអាជ្ញាធរដែលមើលការខុសត្រូវនៅលើស្ពានដើម្បីបិទដំណើរការស្ពាននេះជាបណ្ដោះអាសន្ន។
បើគ្មានចំណាត់ការទាំងនេះទេ គេគិតថាមនុស្សដែលឆ្លងកាត់ស្ពាននេះអាចនឹងស្លាប់ច្រើនជាងនេះ។ តាមរយៈវីឌីអូឃ្លីបដែលគេបង្ហោះនៅលើបណ្ដាញសង្គម គេឃើញថានាវាដឹកទំនិញនោះបើកទៅប៉ះជើងស្ពានមួយទំហឹងនៅក្នុងស្ថានភាពងងឹត និងឃើញភ្លើងហ្វារបស់រថយន្តនៅលើស្ពានធ្លាក់ចុះទៅក្នុងទឹកទន្លេ។ បន្ទាប់មក នាវាដឹកទំនិញនោះត្រូវភ្លើងឆេះ។
អាជ្ញាធរថ្លែងថាស្ពាននេះជាច្រកផ្លូវដឹកជញ្ជូនដ៏សំខាន់។ ដូច្នេះ នៅពេលស្ពានខូចខាតដល់ថ្នាក់ប្រើការលែងកើតបែបនេះ វានឹងបង្កបញ្ហាធំសម្រាប់សង្វាក់ផ្គត់ផ្គង់ទំនិញ។ នាវាទើបតែចេញដំណើរបាន១ភ្លែតក៏រលត់ម៉ាស៊ីន។ បុគ្គលិកនៅលើនាវាក៏ទម្លាក់យុថ្កាចុះដើម្បីពន្យឺតការរត់តម្រង់ទៅរកស្ពាន។ បុគ្គលិកនៅលើនាវាសរុប២២នាក់មិនបានរងគ្រោះដល់អាយុជីវិតទេ។
លោកបៃដិនថ្លែងថាក្រុមល្បាតដែនទឹករបស់អាមេរិកបានចាត់វិធានការឆ្លើយតបជាប្រញាប់ដើម្បីបិទការធ្វើដំណើរនៅលើស្ពាន។ លោកត្រៀមធ្វើដំណើរទៅពិនិត្យមើលស្ពានដោយផ្ទាល់ ហើយចង់ឱ្យរដ្ឋាភិបាលសហព័ន្ធរ៉ាប់រងចំណាយលើការសាងសង់ស្ពាននេះឡើងវិញ។ កប៉ាល់តូចធំជាង៤០គ្រឿងត្រូវជាប់គាំងនៅក្នុងកំពង់ផែបាល់ទីម៉។ ក្នុងនោះមាននាវាដឹកទំនិញខ្នាតតូច ទូក និងក្បូនសម្រាប់ជិះកម្សាន្ត។ កប៉ាល់៣០គ្រឿងដែលប្រុងចូលចតនៅកំពង់ផែក៏ត្រូវជាប់គាំងដំណើរផងដែរ៕
ប្រភព៖ Reuters
https://www.reuters.com/world/us/16-mile-bridge-baltimore-collapses-after-ship-collision-fox-baltimore-reports-2024-03-26/
ចែករំលែកព័តមាននេះ