រាជធានីភ្នំពេញ ៖ នៅមិនយូរថ្ងៃទៀតនោះទេ ពិធីបុណ្យចូលឆ្នាំថ្មីប្រពៃណីជាតិខ្មែរនឹងចូលមកដល់ ។ សម្រាប់ឆ្នាំ២០២៤នេះ គឺជាពិធីបុណ្យចូលឆ្នាំខ្មែរ ឆ្នាំរោងឆស័ក ដែលបងប្អូនខ្មែរទាំងក្នុងនិងក្រៅប្រទេសបាននឹងកំពុងរៀបចំខ្លួនទទូលទេវតាឆ្នាំថ្មី ដែលតំណាងដោយនាគរាជ…
រាជធានីភ្នំពេញ ៖ នៅមិនយូរថ្ងៃទៀតនោះទេ ពិធីបុណ្យចូលឆ្នាំថ្មីប្រពៃណីជាតិខ្មែរនឹងចូលមកដល់ ។ សម្រាប់ឆ្នាំ២០២៤នេះ គឺជាពិធីបុណ្យចូលឆ្នាំខ្មែរ ឆ្នាំរោងឆស័ក ដែលបងប្អូនខ្មែរទាំងក្នុងនិងក្រៅប្រទេសបាននឹងកំពុងរៀបចំខ្លួនទទូលទេវតាឆ្នាំថ្មី ដែលតំណាងដោយនាគរាជ ។ ជាមួយគ្នានោះផងដែរ តាមបណ្តាវត្តអារាម និងរដ្ឋបាលខេត្ត-រាជធានី បាននិងកំពុងរៀបចំតុបតែងនូវរូបនាគរាជ ដើម្បីអបអរឆ្នាំថ្មី ឆ្នាំរោងឆស័ក។
ជាក់ស្តែងថ្មីៗនេះ ផ្ទុះការចាប់អារម្មណ៍ជាខ្លាំង ក្រោយវត្តមួយកន្លែងបានខិតខំយ៉ាងសស្រាក់សស្រ៊ាំតុបតែងវត្តរបស់ខ្លួន ជាពិសេស រូបនាគរាជតែម្តង ដែលធ្វើឡើងពីចំបើងរំលេចចេញជារូបភាពយ៉ាងស្រស់ស្អាតគួរអោយទាក់ទាញអ្នកទស្សនា ។
នេះអាចចាត់ទុកថា ជាស្នាដៃមួយដ៏គួរឱ្យទាក់ទាញ ក្រោយវត្តអារមមួយកន្លែងនេះ មានការច្នៃប្រឌិតយ៉ាងអស្ចារ្យចេញជារូបរាងនាគរាជ ធ្វើពីចំបើង។ តើបងប្អូនយល់យ៉ាងណាដែរ? ឱ្យប៉ុន្មានពិន្ទុដែរ?
ពិធីបុណ្យចូលឆ្នាំថ្មី២០២៤ នេះ សង្ក្រាននឹងចូលដល់នៅថ្ងៃសៅរ៍៥កើត ខែចេត្រ ត្រូវនឹងថ្ងៃទី១៣ ខែមេសា ឆ្នាំ២០២៤ ដោយនៅតាមបណ្តាលរាជធានីខេត្តក្រុងមួយចំនួនបានត្រៀមចំរួមជាស្រេច ដើម្បីទទួលទេវតាឆ្នាំថ្មីឆ្នាំរោង ។
គួរបញ្ជាក់ដែរថា រូបនាគធ្វើឡើងបីចំបើងនេះ ក្រោមទឹកដៃរបស់ព្រះសង្ឃ និងកូនសិស្សវត្ត នគរបាជ័យក្រៅ ស្ថិតនៅភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម ដោយបានខិតខំលះបង់កម្លាំងកាយចិត្តក្នុងការធ្វើឡើង អស់រយៈពេលជាច្រើនផងដែរនោះ។
តាមរយៈការបង្ហោះរបស់វត្តនគរបាជ័យក្រៅ បានលើកឡើងផ្សារភ្ជាប់ជាមួយនៃការធ្វើរូបនាគនេះដែរថា «សកម្មភាពព្រះសង្ឃ កូនសិស្ស និងប្អូនៗធ្វើការកន្លងមក កម្លាំងសាមគ្គីទើបចេញជារូបរាង(នាគយក្ស) មួយនេះ តែមិនទាន់កែគន់បង្ហើយទេ។ ញាតិញោមអាចមកទស្សនាដូចជាការថតលេងបានស្អាតមិនស្អាតសម្រេចលើញោមអ្នកស្ថាបនា ព្រោះធ្វើអស់លទ្ធភាពហើយប្រឹងទាំងយប់ទាំងថ្ងៃ ទើបចេញជារូបរាងបែបនេះនិងរួចជាស្ថាពរ (អរគុណទាំងអស់គ្នាសម្រាប់ការសាមគ្គី)» ។
តាមរយៈបទសម្ភាសន៍ជាមួយកម្មវិធី60Buzz នៃសារព័ត៌មានកោះសន្តិភាព គុណម្ចាស់ អ៊ន់ សំណាង មានថេដិការថា សម្រាប់រូបនាគនេះ គឺមានការរៀបចំពីវត្ត នគរបាជ័យក្រៅ ដែលជាមានព្រះសង្ឃ ព្រះចៅអធិការ គណៈគ្រប់គ្រង កូនសិស្សលោក បានសាមគ្គីជាកម្លាំង ទើបចេញរូបនាគនេះឡើងមក ។ ចំពោះរូបនាគនេះផងដែរ គុណម្ចាស់បន្តថា ព្រះសង្ឃ និងកូនសិស្សបានធ្វើអស់ពីលទ្ធផលហើយ ពោលបានប៉ុណ្ណោះ ព្រោះជាសិល្បៈច្នៃដោយដៃ មិនមែនការធ្វើឧបករណ៍អ្វីនោះឡើយ។
មែនទែនទៅ រូបនេះ ធ្វើឡើងជាង មួយសប្តាហ៍ ដោយមានចំបើងផង លាបពណ៌ផង ឬស្សី ដែកគ្រោងធ្វើឆ្គឹង ទម្រាំបានប៉ុណ្ណោះអាចថា មិនងាយឡើយរវល់ពេញមួយវត្ត គ្រាន់តែរូបនាគធ្វើឡើងពីចំបើង ដែលត្រៀមឆ្នាំថ្មីនេះ ឆ្នាំរោង ដែលតំណាងអោយនាគផងដែរ។
បើងាកមកប្រវែងវិញ នាគដែលធ្វើឡើងដោយចំបើងមានប្រវែង១១ម៉ែត្រ អាចថាធំគួរសម ដោយរំលេចចេញជាពណ៌ ក្បាច់រចនា ពណ៌ និងរូបបែបនេះចេញមក។ តើបងប្អូនអោយប៉ុន្មានពិន្ទុកដែរ? ក្រៅពីរូបនាគ វត្តមួយនេះក៏បានរៀបនៅកន្លែងផ្សេងៗ មិនថាបរិណវត្ត ក្នុងវត្ត ការតុបតែងផ្កែផ្ញីរៀបចំមួកស្លឹកត្នោតខ្មែរ និងការលេងល្បែងប្រជាប្រិយខ្មែរ នាពេលឆាប់ៗខាងមុខនេះផងដែរ។
ជាចុងក្រោយ គុណម្ចាស់ អ៊ន់ សំណាង សំណូមពរថា ក្នុងឱកាសបុណ្យប្រពៃណីខ្មែរគួរចេះអធ្យាស្រ័យគ្នាពេលធ្វើដំណើរ មិនថាជិតឬឆ្ងាយ អ្វីដែលកាន់តែពិសេស ចូលរួមថែរក្សាតម្លៃ វប្បធម៌ អរិយធម៌ របស់ខ្មែរ ដែលបុព្វបុរសបានបន្សល់ទុកអោយ រួបរួមគ្នាជាធ្លុងមួយ ដើម្បីប្រទេសជាតិ ។
គួរបញ្ជាក់ដែរ វត្តនគរបាជ័យក្រៅ ឆ្នាំនេះបានរៀបចំយ៉ាងស្រស់ស្អាត ដើម្បីត្រៀមទទួលទេវតាឆ្នាំថ្មី និងពុទ្ធបរិស័ក ក្នុងនោះដែរខាងវត្តផ្ទាល់ ក៏មានត្រៀមល្បែងប្រជាប្រិយខ្មែរ ចោលឈូក បោះអង្គុញ ទាញព្រ័ត្រលាក់កន្សែង និងល្បែងល្បាំជាច្រើនទៀតក្នុងឆ្នាំថ្មីនេះ៕ ដោយ៖លីហួ គីមឆាយ.
ចែករំលែកព័តមាននេះ