ទីក្រុងម៉ូស្គូ៖ ទោះបីលោកពូទីន និងមន្ត្រីចារកម្មរុស្ស៊ីទទួលស្គាល់ជាទូទៅ និងជាចំហថាករណីបាញ់ប្រហារបែបភេរវកម្មនៅកន្លែងប្រគំតន្ត្រីនៃទីក្រុងម៉ូស្គូកាលពីយប់ថ្ងៃសុក្រសប្ដាហ៍មុន ស្លាប់មនុស្ស១៣៩នាក់ តាមពិតជាស្នាដៃរបស់ក្រុមអាយស៊ីស ឬក្រុមឥស្លាមជ្រុលនិយមពិតមែន។ ក៏ប៉ុន្តែទន្ទឹមនឹងនោះ រុស្ស៊ីនៅតែគិតថាក្រុមនេះគ្រាន់តែអ្នកដែលគេខ្ចីដៃសម្រាប់ប្រើប្រាស់តែប៉ុណ្ណោះ។ រុស្ស៊ីយល់ថាមេខ្លោងធំជាងគេនៅពីក្រោយរឿងនេះគឺប្រទេសបី៖ អ៊ុយក្រែន អង់គ្លេស និងអាមេរិក។
កាលពីមុននេះ លោកពូទីនធ្លាប់ដាក់ជាចម្ងល់ថា «ហេតុអ្វីក្រុមអាយស៊ីសចង់វាយប្រហាររុស្ស៊ីបើរុស្ស៊ីពុំដែលធ្វើអ្វីឱ្យពួកគេ ឬក្រុមអ្នកឥស្លាមនិយមដទៃទៀតឃ្នើសចិត្តផង? រុស្ស៊ីមានតែជួយពួកគេវិញ។ ឧទាហរណ៍ រុស្ស៊ីជួយឈឺឆ្អាលការរងទុក្ខវេទនារបស់ជនស៊ីវិលប៉ាឡេស្ទីននៅតំបន់ហ្កាហ្សាជាដើម។ លោកយល់ថាគ្មាននរណាក្រៅពីអ៊ុយក្រែនទេ។
ថ្ងៃនេះ នាយកអង្គភាពស៊ើបការណ៍សម្ងាត់អែហ្វអែសប៊ី (FSB) ដែលជាទីភ្នាក់ងារស៊ើបការណ៍ធំជាងគេរបស់រុស្ស៊ី និងជាអ្នកបន្តវេនពីកាហ្សេបេ (KGB) ចេញមុខបកស្រាយ។ លោកជឿជាក់ថាប្រទេសទាំងបីឃុបឃិតគ្នាវាយប្រហារកន្លែងប្រគំតន្ត្រី។ អ៊ុយក្រែនដែលធ្លាប់ប្រកែកតាំងពីយូរមកហើយ បានច្រានចោលការចោទប្រកាន់នេះ។ អ៊ុយក្រែនយល់ថារុស្ស៊ីនិយាយបែបនេះគឺជាការភូតកុហក។ ចំណែកអង់គ្លេសចាត់ទុកថាការចោទប្រកាន់របស់រុស្ស៊ីមិនសមហេតុផលទាល់តែសោះ។
ប្រធានអែហ្វអែសប៊ី លោកអាឡិចសាន់ដឺ បតនីកោហ្វ (Alexander Bortnikov) ជឿជាក់ថាគម្រោងវាយប្រហារនេះរៀបចំដោយក្រុមឥស្លាមជ្រុលនិយម រួមដៃជាមួយភ្នាក់ងារសម្ងាត់បស្ចិមប្រទេស។ ខ្លាំងដៃជាងគេគឺក្រុមសម្ងាត់របស់អ៊ុយក្រែនតែម្ដងដែលជាអ្នកចូលរួមដោយផ្ទាល់។ តបទៅអ្នកកាសែតដែលសួរថាតើអ៊ុយក្រែន និងសម្ព័ន្ធមិត្ត (អាមេរិក និងអង់គ្លេស) ជាប់ពាក់ព័ន្ធនឹងករណីនេះទេ? លោកបតនីកោហ្វគិតថាពួកគេជាប់ពាក់ព័ន្ធ។
ទោះជានៅក្នុងលក្ខខណ្ឌបែបណាក៏ដោយ យើងកំពុងនិយាយអំពីបរិបទដែលសមហេតុផល។ នេះជាព័ត៌មានទូទៅដែលអាចយើងអាចជម្រាបជូនបាន។ លោកបតនីកោហ្វសព្វថ្ងៃនេះអាយុ៧២ឆ្នាំ លោកបានធ្វើជាប្រធានអែហ្វអែសប៊ីតាំងពីឆ្នាំ២០០៨។ លោកមិនទាន់កំណត់មុខសញ្ញាដែលបញ្ជាការវាយប្រហារនេះទេ។ ប៉ុន្តែរុស្ស៊ីនឹងចាត់វិធានការសងសឹកវិញ។
អាយស៊ីស ឬអ៊ុយក្រែន?
សារព័ត៌មានរុស្ស៊ីសត់ (SHOT) ចេញផ្សាយវីឌីអូឃ្លីបមួយឈុតបង្ហាញពីការសន្ទនាគ្នារវាងអ្នកកាសែត និងលោកនីកូឡាយ ប៉ាទ្រូសេវ (Nikolai Patrushev) ដែលជាអគ្គលេខាធិការក្រុមប្រឹក្សាសន្តិសុខជាតិរុស្ស៊ី។ អ្នកកាសែតសួរថាតើនេះជាស្នាដៃរបស់នរណាឱ្យពិតប្រាកដ អាយស៊ីស ឬអ៊ុយក្រែន? លោកថ្លែងថាជាស្នាដៃអ៊ុយក្រែនច្បាស់ណាស់។ លោកនិយាយបន្តទៀតថាមានតម្រុយជាច្រើនបង្ហាញថាអ៊ុយក្រែនជាប់ពាក់ព័ន្ធនឹងរឿងនេះ។
ប្រធានអែហ្វអែសប៊ី លោកបតនីកោហ្វ ទទួលស្គាល់ថាវ៉ាស៊ីនតោនពិតជាបានបញ្ជូនព័ត៌មានសម្ងាត់ពាក់ព័ន្ធនឹងគម្រោងវាយប្រហារនេះតាំងពីដើមខែមីនាមែន។ ប៉ុន្តែព័ត៌មានដែលផ្ដល់ឱ្យនោះមានលក្ខណៈច្បោលៗមិនច្បាស់លាស់ទាល់តែសោះ។ ឥឡូវនេះ រុស្ស៊ីមិនគិតអ្វីច្រើនទេ។ លោកពូទីនសច្ចាថានឹងដាក់ទោសអ្នកទាំងឡាយណាដែលជាប់ពាក់ព័ន្ធនឹងការវាយប្រហារនេះ។ «យើងដឹងថាក្រុមឥស្លាមជ្រុលនិយមជាអ្នកប្រព្រឹត្តទង្វើនេះ។ ប៉ុន្តែយើងក៏ចង់ដឹងដែរថាតើអ្នកណាជាអ្នកបញ្ជាពួកគេ»៕
ប្រភព៖ Reuters
https://www.reuters.com/world/europe/putins-hawks-say-ukraine-was-involved-deadly-moscow-concert-attack-2024-03-26/
ចែករំលែកព័តមាននេះ