ទីក្រុងម៉ូស្គូ៖ លោកពូទីនប្រកាសទទួលស្គាល់ថាករណីបាញ់ប្រហារនៅកន្លែងប្រគំតន្ត្រីនៃទីក្រុងម៉ូស្គូកាលពីយប់ថ្ងៃសុក្រដែលសម្លាប់មនុស្ស១៣៩នាក់ និងរបួសជាង១០០នាក់នោះជាស្នាដៃរបស់ពួកអាយស៊ីស។ ប៉ុន្តែលោកនៅតែចង់រករឿងអ៊ុយក្រែនជាបន្តទៀត។ នេះជាលើកទីមួយដែលលោកពូទីនទទួលស្គាល់ថានេះជាស្នាដៃរបស់ក្រុមឥស្លាមជ្រុលនិយម។
«យើងដឹងថាអំពើឧក្រិដ្ឋនេះប្រព្រឹត្តឡើងដោយក្រុមឥស្លាមជ្រុលនិយម»។ លោកពូទីនថ្លែងដូចនេះតាមកញ្ចក់ទូរទស្សន៍បន្ទាប់ពីលោកជួបជាមួយមន្ត្រីថ្នាក់មូលដ្ឋាន្, ភ្នាក់ងារពិសេស និងមន្ត្រីអនុវត្តច្បាប់។ ប៉ុន្តែនៅទីបញ្ចប់ លោកពូទីននៅតែឆ្លៀតវាត់កន្ទុយដាក់អ៊ុយក្រែន។ «រុស្ស៊ីកំពុងចង់ដឹងថាតើនរណានៅពីក្រោយខ្នងរឿងនេះ។ អ៊ុយក្រែនអាចជាប់ពាក់ព័ន្ធ»។
លោកដាក់ជាសំណួរថានៅពេលមានហេតុការណ៍នេះកើតឡើងតើនរណាជាអ្នកចំណេញ? (Who benefits from this?) «អំពើឃោរឃៅនេះអាចជាស្រឡាយ១ផ្នែកតូចនៅក្នុងចំណោមការប៉ុនប៉ងជាច្រើនករណីទៀតដែលរៀបចំឡើងដោយអ្នកដែលកំពុងធ្វើសង្គ្រាមជាមួយយើងចាប់តាំងពីឆ្នាំ២០១៤។ ពួកគេធ្វើតាមបញ្ជារបស់ពួកណាហ្ស៊ីជំនាន់ថ្មីនៅទីក្រុងកៀវ»។
កាលពីឆ្នាំ២០១៤ រុស្ស៊ីលើកទ័ពតំបន់គ្រីម៉េ និងដាក់បញ្ចូលជាទឹកដីរុស្ស៊ី។ ក្រោយមកទៀត ពួកឧទ្ទាមបំបែកទឹកដីដែលលម្អៀងទៅខាងប្រទេសរុស្ស៊ីក៏ឆ្លៀតបំបែកទឹកដីអ៊ុយក្រែននៅភាគខាងកើតបន្ថែមទៀត។ ឆ្នាំ២០២២ រុស្ស៊ីលើកកងទ័ពវាយចូលអ៊ុយក្រែនតែម្ដង។ ចំពោះសំណួរថាតើរុស្ស៊ីបរាជ័យដែរឬទេដែលមិនអាចទប់ស្កាត់អំពើបាញ់ប្រហារនេះបានទោះបីស្ថានទូតអាមេរិកនៅទីក្រុងម៉ូស្គូបានផ្ដល់សញ្ញាព្រមានតាំងពីដើមខែមីនាអំពីលទ្ធភាពនៃការវាយប្រហារនៅទីក្រុងម៉ូស្គូ?
លោកពូទីនមិនចង់បកស្រាយអ្វីច្រើនទេ។ លោកទម្លាក់កំហុសដាក់អ៊ុយក្រែនតែម្ដង។ ប៉ុន្តែដោយសារគ្មានភស្តុតាងបញ្ជាក់ថាអ៊ុយក្រែនជាប់ពាក់ព័ន្ធនឹងរឿងនេះ។ ម៉្យាងទៀត ក្រុមអាយស៊ីសប្រកាសទទួលស្គាល់ថាជាស្នាដៃរបស់ខ្លួន ខណៈដែលក្រុមបស្ចិមប្រទេសផ្ទៀងផ្ទាត់ទៅឃើញថាពិតជាស្នាដៃរបស់អាយស៊ីសមែន លោកពូទីនក៏ប្រកាសតាមគេតាមឯងតែម្ដង។
ប៉ុន្តែលោកនៅតែមិនទាន់អស់ចិត្តទាល់តែសោះ។ លោកយល់ថារុស្ស៊ីមានទំនាក់ទំនងល្អជាមួយក្រុមហាម៉ាស់ ហើយតែងតែប្រឆាំងនឹងយុទ្ធនាការវាយប្រហាររបស់អ៊ីស្រាអែលនៅតំបន់ហ្កាហ្សា។ ឃើញថារុស្ស៊ីដូចជាមិនបានធ្វើអ្វីឱ្យល្អក់កករចំពោះទឹកចិត្តរបស់ក្រុមឥស្លាមទេ។ ហេតុអីរុស្ស៊ីជាផ្ទាំងស៊ីបវាយប្រហាររបស់ក្រុមអាយស៊ីសទៅវិញ? គាត់ឆ្ងល់ត្រង់ចំណុចហ្នឹង។
លោកពូទីនដាក់ជាសំណួរថាតើមានហេតុផលអ្វីដែលក្រុមឥស្លាមជ្រុលនិយម ឬក្រុមឥស្លាមភេរវកម្មចង់វាយប្រហាររុស្ស៊ី ខណៈដែលរុស្ស៊ីចង់រកយុត្តិធម៌ឱ្យពួកប៉ាឡេស្ទីននៅមជ្ឈិមបូព៌ា? លោកយល់ថាក្រុមអាយស៊ីសគ្មានកម្លាំងនៅប្រទេសរុស្ស៊ីទេ។ ទោះបីលោកពូទីនបកស្រាយបែបនេះក្ដី ប៉ុន្តែគេមិនត្រូវភ្លេចទេថាលោកពូទីនធ្លាប់គាំទ្ររបបដឹកនាំរបស់លោកអាល់អាសាតនៅប្រទេសស៊ីរី។ របបនេះត្រូវក្រុមអាយស៊ីសចង់ផ្ដួលរំលំចោលតាំងពីយូរមកហើយ។
កាលពីខែកញ្ញា ឆ្នាំ២០២២ ក្រុមអាយស៊ីសប្រកាសថាខ្លួនជាអ្នកវាយប្រហារស្ថានទូតរុស្ស៊ីនៅទីក្រុងកាប៊ុល ប្រទេសអាហ្វហ្កានីស្ថាន។ សូម្បីតែនៅលើទឹកដីរុស្ស៊ីក៏មានបក្សពួករបស់ក្រុមអាយស៊ីសដែរ។ ដូចជានៅតំបន់កូកាស់នៃតំបន់ឆេចឈ្នី (Chechnya) ដែលក្រុមផ្ដាច់ខ្លួនធ្វើសកម្មភាពប្រឆាំងនឹងរដ្ឋាភិបាលទីក្រុងម៉ូស្គូជាច្រើនឆ្នាំមកហើយ។
ឥឡូវនេះ អ៊ុយក្រែនប្រកែកដាច់អហង្ការថាខ្លួនគ្មានជាប់ពាក់ព័ន្ធនឹងការវាយប្រហារនេះទេ។ អ៊ុយក្រែនចោទបកទៅវិញថាលោកពូទីននិយាយមួលបង្កាច់ដើម្បីបានលេសវាយប្រហារអ៊ុយក្រែនកាន់តែខ្លាំង៕
ប្រភព៖ Politico
https://www.politico.eu/article/putin-acknowledges-radical-islamists-carried-out-moscow-terrorist-attack/
ចែករំលែកព័តមាននេះ