ខេត្តមណ្ឌលគិរី ៖ បន្ទាប់ពីផ្ទុះករណីដីព្រៃរាប់ពាន់ហិកតា ត្រូវគេកាប់រានយកជាកម្មសិទ្ធិ ព្រោះតែអាជ្ញាធរ ជាពិសេស មន្ទីរបរិស្ថានខេត្តមណ្ឌលគិរី ដែលត្រូវគេដឹងថា មានសមត្ថកិច្ចលើការគ្រប់គ្រងថែរក្សាដីព្រៃក្នុងតំបន់ស្រុកពេជ្រាដា គ្មានសមត្ថភាពទប់ស្កាត់សកម្មភាពបំផ្លាញព្រៃឈើដ៏មហាសាលនេះ…
ខេត្តមណ្ឌលគិរី ៖ បន្ទាប់ពីផ្ទុះករណីដីព្រៃរាប់ពាន់ហិកតា ត្រូវគេកាប់រានយកជាកម្មសិទ្ធិ ព្រោះ
តែអាជ្ញាធរ ជាពិសេស មន្ទីរបរិស្ថានខេត្តមណ្ឌលគិរី ដែលត្រូវគេដឹងថា មានសមត្ថកិច្ចលើការគ្រប់គ្រងថែរក្សាដីព្រៃក្នុងតំបន់ស្រុកពេជ្រាដា គ្មានសមត្ថភាពទប់ស្កាត់សកម្មភាពបំផ្លាញព្រៃឈើដ៏មហាសាលនេះ ស្រាប់តែមានសេចក្តីជូនដំណឹងមួយទើបចេញ កាលពីថ្ងៃទី២០ ខែមីនា ឆ្នាំ២០២៤ ប្រកាសការមោឃភាពឯកសារកាន់កាប់ដីធ្លី ឬលិខិតផ្ទេរសិទ្ធិកាន់កាប់ប្រើប្រាស់ដីធ្លី
ស្ថិតនៅក្នុងរដ្ឋបាលភូមិឡាំម៉េះ និងភូមិពូលុ (ចំណុចអូរតូយ) ក្នុងឃុំប៊ូស្រា ។
លិខិតជូនដំណឹងមានខ្លឹមសារថា យោងសេចក្តីសម្រេចរបស់រាជរដ្ឋាភិបាលកម្ពុជា លេខៈ១៩ សសរ ចុះថ្ងៃទី២២ ខែមករា ឆ្នាំ២០២៤ ស្តីពីការបង្កើតគណៈកម្មាធិការជាតិ ដើម្បីទប់ស្កាត់លុបបំបាត់ និងបង្ក្រាប ការកាប់រាន ដុត ឈូស ឆាយ និងហ៊ុមព័ទ្ធដីព្រៃឈើ ដើម្បីវាតយកដីធ្វើជាកម្មសិទ្ធិ នៅតាមបណ្តាខេត្តមួយចំនួននៃព្រះរាជាណាចក្រកម្ពុជា ។សេចក្តីជូនដំណឹង របស់ក្រសួងបរិស្ថាន លេខៈ ១១២៧/០៣២៤ សជណ ប.ស្ថ ចុះថ្ងៃទី១៤ ខែមីនា ឆ្នាំ២០២៤ ស្តីពីវិធានការទប់ស្កាត់ លុបបំបាត់ និងបង្ក្រាបការកាប់គាស់ រុករាន ឆ្ការដុត ឬការ ឈូសឆាយដីព្រៃក្នុងតំបន់ការពារធម្មជាតិធ្វើជាកម្មសិទ្ធិ ។
រដ្ឋបាលឃុំប៊ូស្រា សូមអនុញ្ញាតគោរពជូនដំណឹង រដ្ឋបាលស្រុក រដ្ឋបាលខេត្ត ស្ថាប័នពាក់ព័ន្ឋ និងជូនដល់សាធារណៈជនជាម្ចាស់ដី ឬជាអ្នកទទួលសិទ្ធិកាន់កាប់បន្ត សូមគោរពជូនជ្រាប និងមេត្តាជ្រាបថា ដើម្បីចូលរួមគោរពតាមលិខិតបទដ្ឋានគតិយុតនានារបស់ថ្នាក់ដឹកនាំរាជរដ្ឋាភិបាលកម្ពុជា ក្នុងការទប់ស្កាត់ការកាប់រុករានដីព្រៃរបស់រដ្ឋយកធ្វើជាកម្មសិទ្ធិ រដ្ឋបាលឃុំប៊ូស្រា សូមធ្វើការ មោឃភាព រាល់ឯក សារកាន់កាប់ដីធ្លី ឬលិខិតផ្ទេរសិទ្ធិកាន់កាប់ដីធ្លី ដែលមានលក្ខណះ ១-ឯកសារដែលមិនមានការចុះត្រួតពិនិត្យត្រឹមត្រូវ ដោយរដ្ឋបាលឃុំ និងលោក/លោកស្រី ដែល ជាមន្ត្រីជំនាញរបស់ការិយាល័យភូមិបាលស្រុក និងតាមនីតិវិធីរដ្ឋបាល ។
២-រាល់ឯកសារកាន់កាប់ដីធ្លី ឬលិខិតផ្ទេរសិទ្ធិកាន់កាប់ របស់បងប្អូនដែលស្នើសុំឲ្យរដ្ឋបាលឃុំ ចុះហត្ថលេខាដោយសារកន្លងមករដ្ឋបាលឃុំ មានការធ្វេសប្រហែស មិនបានត្រួតពិនិត្យបន្ថែមថាដីនោះស្ថិតនៅ ទីតាំងដីព្រៃរបស់រដ្ឋ ដីសមូហភាពរបស់សហគមន៍ជនជាតិដើមភាគតិច ចាប់ពីចំណុចអូរកាល់ ដល់ព្រំប្រទល់ រវាងឃុំប៊ូស្រា និងឃុំដាក់ដាំ និងចាប់ពីចំណុចភ្នំយោគឡក អូរតូយ រហូតដល់ព្រំប្រទល់រវាងឃុំប៊ូស្រា និងឃុំ ដាក់ដាំ ។
៣-ឯកសារទាំងឡាយណាដែលមានការបញ្ជាក់ទទួលស្គាល់ដោយអាជ្ញាធរ ភូមិ-ឃុំ និងបានប្រថាប់ ត្រារដ្ឋបាលឃុំ មិនថាយូឆ្នាំក្តី ឬថ្មីៗក្តី ដែលមានឯកសារនេះហើយ តែមិនមានការអាស្រ័យផល-ដាំដំណាំ ផ្សេងៗ ទុកដីឲ្យមានព្រៃដុះឡើងវិញ ឬទុកដីទំនេរចោល ។
អាស្រ័យដូចបានជម្រាបជូនខាងលើ រដ្ឋបាលឃុំប៊ូស្រា សូមគោរពជូន រដ្ឋបាលស្រុក រដ្ឋបាលខេត្ត ស្ថាប័នពាក់ព័ន្ធ និងជូនដល់សាធារណៈជនឲ្យបានជ្រាបថា រដ្ឋបាលឃុំសូមធ្វើការមោឃៈភាព មិនទទួល ខុសត្រូវរាល់ឯកសារដីធ្លី ដែលមិនបានអាស្រ័យផល ដាំដំណាំផ្សេងៗ ស្ថិតនៅក្នុងទីតាំងដែលបានគោរព ជម្រាបជូនខាងលើនេះទេ គឺឯកសារនោះមិនត្រូវបានអនុញ្ញាតឲ្យប្រើប្រាស់ គិតចាប់ពីថ្ងៃចុះហត្ថលេខានេះ តទៅ ។
សូមរំលឹកថា កម្លាំងសមត្ថកិច្ចចម្រុះខេត្តមណ្ឌលគិរី បានចុះប្រតិបត្តិការបង្ក្រាបបទល្មើសរុករានដីព្រៃរដ្ឋ យកជាកម្មសិទ្ឋផ្ទាល់ខ្លួន កាលពីព្រឹកថ្ងៃទី២០ មីនា ២០២៤ ដែលដឹកនាំបញ្ជាដោយលោក ស៊ាវ ងីឈាន់ ព្រះរាជអាជ្ញាររងអយ្យការអមសាលាដំបូងខេត្តមណ្ឌលគិរី ។
សេចក្តីរាយការណ៍បានឲ្យដឹងថា សមត្ថកិច្ចបានរកឃើញទីតាំងដីព្រៃរបស់រដ្ឋរាប់សិបកន្លែងក្នុងទំហំច្រើនពាន់ហិកតា ត្រូវគេអារកាប់ផ្តួលព្រៃឈើរដូករណែល រួចដុតឆេះផ្សែងហុយពេញអាកាសគួរឲ្យសង្វែកបំផុត។ទីតាំងដែលកម្លាំងប្រតិបត្តិការបង្ក្រាប រកឃើញមានសកម្មភាពកាប់រានដីព្រៃដ៏មហាសាលខាងលើ ដែលអាចហៅបានថា ជាវិនាសសកម្មព្រៃឈើនាដើមឆ្នាំ២០២៤នេះ គឺស្ថិតនៅភូមិសាស្ត្រឃុំប៊ូស្រា ស្រុកពេជ្រាដា ខេត្តមណ្ឌលគិរី ដែលទំនងទទួលបានភ្លើងខៀវពីអាជ្ញាធរមូលដ្ឋាន ដ្បិតទីតាំងកាប់រានដីព្រៃរដ្ឋធ្វើកម្មសិទ្ឋបុគ្គលនេះ ស្ថិតមិនឆ្ងាយពីប្រជុំជនស្រុកពេជ្រាដា ដែលបណ្តុំទៅដោយស្ថាប័នកម្លាំងសមត្ថកិច្ចចម្រុះរបស់គណៈបញ្ជាការឯកភាពស្រុក ប៉ុន្តែសកម្មភាពល្មើសច្បាប់ទាំងនោះ បែរជាគ្មានការបង្ក្រាបឬទប់ស្កាត់ទេនាពេលកន្លងមក ។
លុះត្រាមានព័ត៌មានបែកធ្លាយដល់ថ្នាក់ខេត្ត ទើបមានកម្លាំងសមត្ថកិច្ច ដឹកនាំដោយតំណាងអយ្យការអមសាលាដំបូងចុះបង្ក្រាបស្ទើរមិនទាន់ពេល ព្រោះដីព្រៃមួយភាគធំបានរងការកាប់បំផ្លាញសល់តែផេះរួចទៅហើយ ៕
ចែករំលែកព័តមាននេះ