ទីក្រុងព្យុងយ៉ាង៖ នៅសុខៗ នាយករដ្ឋមន្ត្រីជប៉ុន លោកគីស៊ីដា ចង់ជួបមុខផ្ទាល់ជាមួយប្រមុខដឹកនាំកូរ៉េខាងជើង។ តើមកពីមូលហេតុអ្វី? នេះជាសំណួរដ៏ធំ១ដែលមជ្ឈដ្ឋានទូទៅកំពុងយកចិត្តទុកដាក់ និងចង់ដឹង។ ថ្មីៗនេះ ប្អូនស្រីលោកគីមជុងអ៊ុន គឺលោកស្រីគីមយ៉ូជុង (Kim Yo Jong) ដែលជាស្ត្រីដ៏មានឥទ្ធិពលនៅកូរ៉េខាងជើងបង្ហើបឱ្យដឹងថាប្រមុខដឹកនាំជប៉ុនរូបនេះចង់ជួបបងប្រុសរបស់លោកស្រីនៅពេលឆាប់ៗនេះ។ នេះបើតាមការផ្សាយរបស់ទូរទស្សន៍កូរ៉េខាងជើង (KCNA)។
ប៉ុន្តែលោកស្រីគីមយ៉ូជុងសូមបញ្ជាក់ថារាល់ការចង់កែសម្រួលទំនាក់ទំនងរវាងប្រទេសជប៉ុន និងកូរ៉េខាងជើងអាចធ្វើទៅបានអាស្រ័យលើប្រទេសជប៉ុន។ កូរ៉េខាងជើងរង់ចាំមើលឥរិយាបថនយោបាយរបស់រដ្ឋាភិបាលជប៉ុនអនុវត្តជាក់ស្ដែងជាមុនសិន។ ទូរទស្សន៍កូរ៉េខាងជើងដកស្រង់ពាក្យសម្ដីរបស់លោកស្រីគីមយ៉ូជុងមកចុះផ្សាយថា «លោកគីស៊ីដាគួរដឹងថាបើត្រឹមតែគាត់ចង់ជួប និងសម្រេចចិត្តចង់ជួបលោកគីមជុងអ៊ុន មិនមែនលោកគីមជុងអ៊ុនអនុញ្ញាតឱ្យជួបដោយងាយៗទេ»។
លោកស្រីចង់មានន័យថាបើជប៉ុននៅតែចាត់ទុកកូរ៉េខាងជើងជាសត្រូវ និងរំលោភសិទ្ធិអធិបតេយ្យភាពជាតិរបស់កូរ៉េខាងជើង ពេលនោះកូរ៉េខាងជើងក៏ត្រូវចាត់ទុកជប៉ុនជាសត្រូវវិញដែរ ហើយជប៉ុនក្លាយជាគោលដៅដែលត្រូវកម្ចាត់ចោល។ តបទៅនឹងសារនយោបាយនេះ នាយករដ្ឋមន្ត្រីជប៉ុនបញ្ជាក់ថាលោកពិតជាចង់ជួបមុខលោកគីមជុងអ៊ុនមែន។ លោកថាមានតែការជួបគ្នាទេទើបអាចដោះស្រាយបញ្ហាចម្រូងចម្រាសនៅក្នុងទំនាក់ទំនងទ្វេភាគីរវាងប្រទេសទាំង២។ ឧទាហរណ៍ ការចរចាគ្នាដើម្បីនាំយកជនជាតិជប៉ុនដែលត្រូវកូរ៉េខាងជើងចាប់ពង្រត់តាំងពីរាប់ទសវត្សមុនត្រឡប់ទៅប្រទេសជប៉ុនវិញ។
លោកយល់ថាលុះត្រាតែជួបគ្នាកម្រិតកំពូលទើបអាចដោះស្រាយបញ្ហាចាប់ពង្រត់ និងបញ្ហាដទៃទៀតបាន។ ដូចដែលលោកជម្រាបជូនរួចហើយ ជប៉ុនកំពុងបោះដៃទៅកូរ៉េខាងជើងតាមរយៈខ្សែបណ្ដាញជាច្រើនក្រោមការចង្អុលបង្ហាញដោយផ្ទាល់ពីរូបលោក។ អ្នកនាំពាក្យជប៉ុនថ្លែងថាខ្លួនមិនអាចទទួលយកបានទេនៅពេលកូរ៉េខាងជើងថ្លែងថាបានដោះស្រាយរួចរាល់ហើយសំណុំរឿងចាប់ពង្រត់មនុស្ស។ ដូច្នេះ ការខិតខំជួសជុលទំនាក់ទំនងឡើងវិញអាចនឹងជួបឧបសគ្គ។
លោកគីស៊ីដាថ្លែងថាលោកចង់ជួបមុខលោកគីមជុងអ៊ុនដោយគ្មានលក្ខខណ្ឌ។ លោកកំពុងតាមដានលទ្ធផលនៃកិច្ចខិតខំប្រឹងប្រែងនេះ។ បើអាចធ្វើបានសម្រេច វានឹងក្លាយជាជំនួបកំពូលដំបូងនៅក្នុងរយៈពេលម្ភៃឆ្នាំចុងក្រោយ។ មន្ត្រីរដ្ឋាភិបាលកូរ៉េខាងត្បូងនៅក្រសួងការបរទេសដែលស្នើសុំមិនបញ្ចេញឈ្មោះថ្លែងថាកូរ៉េខាងត្បូងកំពុងទាក់ទងគ្នាយ៉ាងជិតស្និទ្ធជាមួយរដ្ឋាភិបាលជប៉ុនដើម្បីជជែកគ្នាអំពីបញ្ហាជាច្រើនរួមទាំងគម្រោងទាក់ទងគ្នារវាងប្រទេសជប៉ុន និងកូរ៉េខាងជើងផងដែរ។
ប្អូនស្រីលោកគីមជុងអ៊ុនធ្លាប់ព្រលយពាក្យថាថ្ងៃណាមួយ លោកគីស៊ីដានឹងបំពេញទស្សនកិច្ចនៅទីក្រុងព្យុងយ៉ាង។ «បើជប៉ុនសម្រេចចិត្តផ្នែកនយោបាយថានឹងបើកច្រកផ្លូវថ្មីមួយដើម្បីកែសម្រួលទំនាក់ទំនងនេះឡើងវិញតាមគោលការណ៍គោរព និងឱ្យតម្លៃគ្នាទៅវិញទៅមក លោកស្រីយល់ថាប្រទេសទាំង២ (ជប៉ុន និងកូរ៉េខាងជើង) អាចបើកទំព័រសករាជថ្មីនាពេលអនាគត»។ នេះបើយោងតាមទូរទស្សន៍កូរ៉េខាងជើង (KCNA) ដែលបានដកស្រង់ពាក្យសម្ដីរបស់លោកស្រីមកផ្សាយ៕
ប្រភព៖ Reuters
https://www.reuters.com/world/asia-pacific/north-korea-says-japans-kishida-showed-intention-meet-kim-jong-un-recently-2024-03-25/
ចែករំលែកព័តមាននេះ