ទីក្រុងម៉ូស្គូ៖ ប្រមុខដឹកនាំរុស្ស៊ី លោកពូទីន សច្ចាថាការស្លាប់មនុស្សជាង១០០នាក់ដោយសារអំពើភេរវកម្មដែលប្រព្រឹត្តឡើងដោយក្រុមអាយស៊ីសខេ (ISIS-K) មិនអាចស្លាប់ទទេៗទាំងអសារឥតការបានឡើយ។ លោកសច្ចាថានឹងសងឈាមឱ្យជនរួមជាតិរបស់លោកយ៉ាងទាន់ចិត្ត។ កាលពីយប់មិញ រុស្ស៊ីអះអាងថាជនប្រដាប់អាវុធដែលចូលទៅបាញ់រះយ៉ាងអនាធិបតេយ្យនៅកន្លែងប្រគំតន្ត្រីនោះត្រូវអាជ្ញាធរចាប់បានទាំងអស់មានគ្នាបួននាក់។
ពួកគេបាញ់ប្រហាររួចឡើងជិះឡានម៉ាករ៉េណូ (Renault) ពណ៌ស១គ្រឿង ប៉ុន្តែត្រូវសមត្ថកិច្ចក្របួចជាប់។ ចាប់ខ្លួនមនុស្សប៉ុណ្ណឹងមិនគ្រប់គ្រាន់ទេ។ លោកពូទីនសច្ចាថាត្រូវតែបន្តរកមេខ្លោងដែលជាអ្នកបញ្ជាជនដៃដល់។ ក្រោយការបាញ់ប្រហារនេះ ក្រុមអាយស៊ីស (ISIS) បង្ហោះតាមតេឡេក្រាមថាជាស្នាដៃរបស់ខ្លួន។ ប៉ុន្តែរុស្ស៊ីនៅតែមិនទាន់ជឿជាក់ថាអាយស៊ីសទេ។
រុស្ស៊ីចង់ម៉ៃទៅអ៊ុយក្រែនច្រើនជាង។ ទោះបីទីក្រុងកៀវបញ្ជាក់ថាខ្លួនមិនពាក់ព័ន្ធនឹងរឿងនេះ ប៉ុន្តែរុស្ស៊ីនៅតែចង់រករឿងអ៊ុយក្រែន។ ចៅហ្វាយក្រុងម៉ូស្គូថ្លែងថាគេរកឃើញសាកសពជនរងគ្រោះសរុប១៣៣នាក់។ ក្រៅពីនេះ មនុស្ស១០៧នាក់រងរបួសធ្ងន់ មិនដឹងថាអាចឆ្លងផុតពីសេចក្ដីស្លាប់ ឬយ៉ាងណាទេ។ គ្រូពេទ្យកំពុងជួយសង្គ្រោះពួកគេយ៉ាងដុតដៃដុតជើង។
លោកពូទីនថ្លែងថារុស្ស៊ីចាប់ខ្លួនជនសង្ស័យសរុប១១នាក់។ នៅក្នុងចំណោមនោះក៏មានជនប្រដាប់អាវុធបួននាក់ដែលបាញ់ប្រហារនៅកន្លែងប្រគំតន្ត្រីផងដែរ។ លោកថ្លែងថាអ្នកទាំងនេះប្រុងរត់ទៅអ៊ុយក្រែន។ នៅទីនោះ ពួកគេមានច្រកផ្លូវទុកសម្រាប់ជម្លៀសខ្លួនរួចជាស្រេចដើម្បីឆ្លងចូលទឹកដីអ៊ុយក្រែន។ លោកចង់មានន័យថាអ៊ុយក្រែនបានរៀបចំទទួលពួកគេ។
ទីភ្នាក់ងារស៊ើបការណ៍សម្ងាត់រុស្ស៊ីថ្លែងថាពួកជនប្រដាប់អាវុធទាំងនេះមានទំនាក់ទំនងជាមួយអ៊ុយក្រែន ហើយត្រូវអាជ្ញាធរស្ទាក់ចាប់បាននៅពេលធ្វើដំណើរជិតដល់ព្រំដែនរុស្ស៊ី-អ៊ុយក្រែន។ ឥឡូវនេះ ត្រូវចាប់បញ្ជូនទៅសួរចម្លើយនៅម៉ូស្គូ។ ប្រមុខដឹកនាំអ៊ុយក្រែនយល់ថារុស្ស៊ីកំពុងលេងល្បែងស្វាស៊ីបាយលាបមាត់ពពែ។ លោកថ្លែងថាចរិតរបស់លោកពូទីន និងបក្សពួករបស់គាត់មានទម្លាប់បែបហ្នឹង។ កាលណាមានរឿងអ្វីមួយចោទចាក់អ៊ុយក្រែនសិនដើម្បីបានលេសវាយប្រហារ។
អ្នកនាំពាក្យអ៊ុយក្រែន លោកអានឌ្រី យូសោហ្វ (Andriy Yusov) ថ្លែងថាអ៊ុយក្រែនគ្មានជាប់ពាក់ព័ន្ធនឹងការបាញ់ប្រហារនេះទេ។ អ្វីដែលអ៊ុយក្រែនកំពុងធ្វើសព្វថ្ងៃនេះគឺខិតខំការពារទឹកដីរបស់ខ្លួនទល់នឹងការឈ្លានពានរបស់រុស្ស៊ី ខិតខំរំដោះទឹកដីដែលបានបាត់បង់ និងខិតខំប្រយុទ្ធទល់នឹងពួកទាហានរុស្ស៊ី។ អ៊ុយក្រែនគ្មានគោលដៅវាយប្រហារជនស៊ីវិលទេ។
ស្ដាប់មួយភ្លែតហាក់ដូចជាមិនសមទំនងដែលក្រុមអាយស៊ីសវាយប្រហាររុស្ស៊ី។ ប៉ុន្តែបើពិនិត្យឱ្យស៊ីជម្រៅទើបដឹងថាពួកអាយស៊ីសក៏ជាសត្រូវធំរបស់រុស្ស៊ីដែរ។ រុស្ស៊ីជាអ្នកការពាររបបអាល់អាសាតនៅប្រទេសស៊ីរី ខណៈដែលក្រុមអាយស៊ីសចិញ្ចឹមចិត្តជាយូរមកហើយដើម្បីផ្ដួលរំលំរបបនេះ។ កាលពីឆ្នាំ២០១៥ ក្រុមអាយស៊ីសធ្លាប់ដាក់គ្រាប់បែកបំផ្ទុះយន្តហោះដឹកអ្នកដំណើររុស្ស៊ី ស្លាប់២២៤នាក់។
សុន្ទរកថាដ៏មុតស្រួចរបស់លោកពូទីន
សម្រែកទាមទាររកយុត្តិធម៌របស់លោកពូទីន និងការសច្ចាសងឈាមជូនជនរួមជាតិរបស់លោកពិតជាមិនធម្មតាទេ។ លោកប្ដេជ្ញាថាត្រូវតែដាក់ទោសឱ្យខាងតែបានអ្នកសមគំនិត, អ្នករៀបចំផែនការ និងអ្នកបញ្ជាការបាញ់ប្រហារនេះ។ ទោះបីពួកគេជានរណា ពួកគេទទួលបញ្ជាពីនរណាក៏ដោយគឺមិនអាចរួចខ្លួនជាដាច់ខាត។
អ្នកតំណាងរាស្ត្ររុស្ស៊ីម្នាក់ឈ្មោះអានដ្រេ ខាថាប៉ូឡោហ្វ (Andrei Kartapolov) ថ្លែងថាបើអ៊ុយក្រែនជាប់ពាក់ព័ន្ធនៅក្នុងការបាញ់ប្រហារនេះ អីចឹងស្រួលហើយ។ រុស្ស៊ីត្រូវតែឆ្លើយតបយ៉ាងម៉ឺងម៉ាត់នៅលើសមរភូមិប្រយុទ្ធតែម្ដង។
សេតវិមានថ្លែងថារដ្ឋាភិបាលរបស់ខ្លួនបានបញ្ជូនព័ត៌មានសម្ងាត់ទៅឱ្យរុស្ស៊ីតាំងពីដើមខែមីនាពាក់ព័ន្ធនឹងគម្រោងវាយប្រហារបែបភេរវកម្មនៅទីក្រុងម៉ូស្គូ។ តាំងពីថ្ងៃទី៧ ខែមីនា អាមេរិកបានណែនាំពលរដ្ឋរបស់ខ្លួននៅរុស្ស៊ីឱ្យប្រុងប្រយ័ត្ន។ ដូច្នេះ អាមេរិកយល់ថាក្រុមអាយស៊ីសជាអ្នកទទួលខុសត្រូវទាំងស្រុងចំពោះរឿងនេះ (sole responsibility)។ គ្មានសញ្ញាបង្ហាញថាអ៊ុយក្រែនជាប់ពាក់ព័ន្ធនឹងការបាញ់ប្រហារនេះទាល់តែសោះ។ នេះបើយោងតាមទីប្រឹក្សាសន្តិសុខជាតិអាមេរិក។
តាមរយៈវីឌីអូឃ្លីបដែលគេថតបាន គេឃើញជនប្រដាប់អាវុធទាំងនោះប្រើប្រាស់កាំភ្លើងស្វ័យប្រវត្តិបាញ់កន្លែងប្រគំតន្ត្រីក្រូខឺស ស៊ីធី ហល (Crocus City Hall) ជិតទីក្រុងម៉ូស្គូ។ នៅក្នុងវីឌីអូនោះ គេឃើញជនរងគ្រោះខ្លះខំរត់ពួននៅក្រោមកៅអី។ រួចរត់ទៅរកច្រកចេញ។ អ្នកខ្លះស្លាប់ដោយសារគ្រាប់កាំភ្លើង, អ្នកខ្លះស្លាប់ដោយសារភ្លើងឆេះអគារដែលរីករាលដាលយ៉ាងឆាប់រហ័ស។ ពួកជនប្រដាប់អាវុធបានប្រើប្រាស់សាំងដែលដាក់ក្នុងបំពង់ដើម្បីដុតអគារនោះឱ្យឆេះយ៉ាងសន្ធោសន្ធៅ៕
ប្រភព៖ Reuters
https://www.reuters.com/world/europe/two-suspects-moscow-attack-detained-after-car-chase-lawmaker-2024-03-23/
ចែករំលែកព័តមាននេះ