ខេត្តបាត់ដំបង ៖ ជនជាតិវៀតណាមម្នាក់បានស្លាប់នៅកន្លែងកើហេតុ នៅពេលជិះម៉ូតូរអិលហើយជ្រុលទៅបុកបង្គោលថ្មនៅក្បែរមាត់លូរ នៅលើផ្លូវជាតិលេខ៥ កាលពីរសៀលថ្ងៃទី ១៥ មីនា នៅចំណុចភូមិថ្នល់បត់ ឃុំឬស្សីក្រាំង ស្រុកមោងឬស្សី ដែលគេសង្ស័យងុយដេកមួយភាំង។
ជនរងគ្រោះឈ្មោះ NGOYEN VUHAI ប្រុសអាយុ៣៦ឆ្នាំ រស់នៅប្រទេសវៀតណាម ជិះម៉ូតូម៉ាក YAMAHA ពាក់ស្លាកលេខ PG.1 67-K2154-24។ សមត្ថកិច្ចបានរាយការណ៏ថា បុរសរូបនេះបានជិះបុកបង្គោលថ្ម ដែលគេដាក់ជាសញ្ញាសម្គាល់នៅក្បែរលូរ ហើយបានដួលបោកក្បាលស្លាប់ភ្លាមៗនៅកន្លែងកើតហេតុ។
បើតាមសមត្ថកិច្ចបានរាយការណ៏ថា ជនរងគ្រោះទំនងជាងងុយដេកមួយភាំងទើបជិះសុខៗ រអិលជ្រុលទៅបុកបង្គោលថ្មក្បែរមាត់លូរបែបនេះ។ សមត្ថកិច្ចបានបញ្ជាក់ថា មានជនជាតិវៀតណាមម្នាក់ទៀត ដែលបានទៅជួយយកសាកសពជនរងគ្រោះ បានប្រាប់ថា «ជនរងគ្រោះ ធ្វើការអត់ងងុយចំនួន០៥ថ្ងៃកន្លងមកហើយ ទើបបានជាជិះម៉ូតូងក់រហូតមានគ្រោះថ្នាក់បែបនេះ»។
ទោះយ៉ាងណា សាកសពជនរងគ្រោះ ត្រូវបានសមត្ថកិច្ចប្រគល់ជូនទៅក្រុមការងារដែលជាជនជាតិវៀតណាមដូចគ្នា ដឹកចេញពីកន្លែងកើតហេតុហើយ៕
ចែករំលែកព័តមាននេះ