ពលរដ្ឋកម្ពុជាមួយចំនួនអាចកំពុងតែជួញដូរ Bitcoin ហើយមួយចំនួនកំពុងតែស្រើបស្រាល ស្របពេលដែលមានសេចក្តីរាយការណ៍នៅលើសារព័ត៌មានបរទេសធំៗបានរាយការណ៍ពីការកញ្ជ្រោលឡើងនូវតម្លៃនៃការជួញដូរនូវឧបករណ៍ទូទាត់ថ្មីមួយរបស់ពិភពលោកមួយនេះ ។ ប៉ុន្តែនៅកម្ពុជា វានៅមិនទាន់ស្របច្បាប់នៅឡើយទេ។
តម្លៃនៃការជួញដូរ Bitcoin នៅលើទីផ្សារអន្តរជាតិត្រូវបានគេរាយការណ៍ថា បានកើនឡើងជាបន្តបន្ទាប់រហូតដល់១ Bitcoin មានតម្លៃរហូតដល់ទៅជាង៦ម៉ឺនដុល្លារ កាលពីចុងខែកុម្ភៈ ហើយនៅដើមខែមីនា នេះនិន្នាការរបស់វាកំពុងតែឡើងបន្តទៀត ក្រោយពេលដែលវាបានឡើងដល់ ១Bitcoin មានតម្លៃដល់ទៅ ៦៨.៩៩១ ដុល្លារកាល ពីខែវិច្ឆិកា ឆ្នាំ២០២១ ហើយបានស្រុតចុះវិញនៅក្រោយពេលផ្ទុះវិបត្តិធនាគារ នៅសហរដ្ឋ អាមេរិកកាលពីចុងឆ្នាំ២០២២ ។ នៅពេលនេះ វាកំពុងតែមាននិន្នាការកើនឡើងវិញ ។
Bitcoin ត្រូវបានគេដឹងថា គឺជាឧបករណ៍នៃការជួញដូរថ្មី ដែលបង្កើតឡើងកាលពីឆ្នាំ ២០០៨ ប៉ុន្តែគេនៅមិនទាន់ដឹងច្បាស់ថា នរណា ឬក្រុមណាជាអ្នកបង្កើតវាឡើងពិតប្រាកដនៅឡើយទេ ។ ប៉ុន្តែទោះបីជាយ៉ាងណាក៏ដោយមកដល់ពេលនេះប្រទេសមួយចំនួនចាប់ផ្តើមទទួលស្គាល់ឧបករណ៍នៃការជួញដូរហិរញ្ញវត្ថុថ្មីមួយនេះជាបន្តបន្ទាប់ ដែលធ្វើឲ្យតម្លៃរបស់វាឡើងតាំងពី១ Bitcoin ស្មើនឹង១សែនដុល្លាររហូតដល់ ជាង ៦ម៉ឺនដុល្លារដល់សព្វថ្ងៃនេះ ។ សម្រាប់ស្រុកគេដែលមានច្បាប់មានប្រព័ន្ធអនុវត្តច្បាប់ច្បាស់លាស់ ហើយយន្តការស៊ើបអង្កេតក៏ដូចជា ទប់ស្កាត់បទល្មើសមានសុក្រិត្យភាព និងប្រសិទ្ធភាព ការជួញដូរ Bitcoin អាចមិនអីនោះទេ ។ ប៉ុន្តែនៅក្នុងសម្រាប់ប្រទេសយើងវាហាក់ដូចជា នៅមិនទាន់មានសុវត្ថិភាពនៅឡើយ ទោះបីជាតម្លៃនៃការជួញដូររបស់វា គឺពិតជាទាក់ទាញសម្រាប់ការបណ្តាក់ទុនក៏ដោយចុះ ប៉ុន្តែសូមកុំប្រថុយប្រថាន ។
មកដល់ពេលនេះ នៅក្នុងចង្កោមអ្នកនៅក្នុងវិស័យហិរញ្ញវត្ថុ គឺពិតជាស្គាល់ Bitcoin នេះ ហើយក៏កំពុងតែតាមដានវាច្រើនគួរសម ហើយនៅក្នុងនោះខ្លះក៏បានលេងវាផងដែរ ប៉ុន្តែអាចមិនមែនលេងនៅក្នុងស្រុកទេ គឺអាចជួញដូរតាមការបណ្តាក់ទុននៅក្រៅប្រទេសដោយសារតែប្រព័ន្ធទូទាត់ និងវេសាច់ប្រាក់វិនិយោគបែបនេះមានច្រើនច្រកតាំងពីវីសាកាត ម៉ាស្ទ័រកាត …ជាដើម ។ សម្រាប់អ្នកជំនាញមានធនធានអាចសាកល្បងក៏សាកល្បងទៅចុះ ប៉ុន្តែសូមប្រុងប្រយ័ត្ន ហើយកុំលោភលន់ ប្រយ័ត្នសល់សំបកខ្លួន ហើយសម្រាប់អ្នកដែលមិនមែនជំនាញ និងមិនស្គាល់ Bitcoin ក៏ដូចជាយន្តការនៃការទូទាត់ និងជួញដូរច្បាស់លាស់ទេនោះកុំប្រថុយអី ។
ពាក់ព័ន្ធនឹង Bitcoin នេះ តាមអត្ថបទសារព័ត៌មាននៅក្នុងស្រុកមួយចំនួនបានឲ្យដឹងថា Bitcoin មិនទាន់ស្របច្បាប់នៅកម្ពុជានៅឡើយទេ ។ លោកស្រី ជា សិរី ទេសាភិបាលធនាគារជាតិនៃកម្ពុជាបានត្រូវសារព័ត៌មានដកស្រង់សម្តីកាលពីពេលថ្មីៗកន្លងទៅនេះថា ធនាគារជាតិនៃកម្ពុជាមិនអនុញ្ញាតឱ្យគ្រឹះស្ថានធនាគារ និងហិរញ្ញវត្ថុធ្វើប្រតិបត្តិការទាក់ទងនឹងវានៅឡើយ ដើម្បីការពារហានិភ័យដល់សាធារណជនដែលអាចងាយរងគ្រោះពីការក្លែងបន្លំ និងការបាត់បង់ ។
លោកស្រី ទេសាភិបាលមានប្រសាសន៍ថា វាជាឧបករណ៍នៃការជួញដូឌីជីថលដែលគ្មានប្រភពច្បាស់លាស់ និងហានិភ័យខ្ពស់ ហើយធនាគារជាតិនៃកម្ពុជាមិនអនុញ្ញាតឱ្យគ្រឹះស្ថានធនាគារ និងហិរញ្ញវត្ថុធ្វើប្រតិបត្តិការទាក់ទងវាឡើយ ដើម្បីការពារហានិភ័យសាធារណៈ ដោយសារតែក្តីបារម្ភថា អាចងាយរងគ្រោះនឹងការក្លែងបន្លំក៏ដូចជា ការប្រឈមនឹងការខាតបង់ផ្សេងៗ ។
តាមប្រសាសន៍របស់លោកស្រីទេសាភិបាល កម្ពុជាកំពុងតែយកចិត្តទុកដាក់ណាស់លើបច្ចេកវិទ្យាទំនើបដែលយើងអាចប្រើប្រាស់ ដើម្បីអភិវឌ្ឍប្រព័ន្ធទូទាត់ប្រកបដោយប្រសិទ្ធភាព សុវត្ថិភាព និងតម្លៃទាប ដូចជាបាគងដែលបានក្លាយជាប្រព័ន្ធទូទាត់សម្រាប់សម្រួលដល់ការទូទាត់អន្តរធនាគារ និងហិរញ្ញវត្ថុ ។ ប្រព័ន្ធទូទាត់របស់កម្ពុជាបាននឹងកំពុងចាប់យកឱកាស និងសក្តានុពលពីការរីកចម្រើននៃបច្ចេកវិទ្យាឌីជីថល ដែលធ្វើឲ្យការទូទាត់កាន់តែមានប្រសិទ្ធភាព សុវត្ថិភាព និងតម្លៃសមរម្យ ក៏ដូចជា ការរួមចំណែកយ៉ាងសំខាន់ក្នុងការកែលម្អបរិយាកាសហិរញ្ញវត្ថុ និងការជំរុញសេដ្ឋកិច្ច ឌីជីថល ស្របតាមយុទ្ធសាស្ត្ររបស់មន្ទីរបញ្ចកោណរបស់រាជរដ្ឋាភិបាល ។ ប៉ុន្តែក៏ត្រូវតែប្រុងប្រយ័ត្ន ដើម្បីរួមចំណែកធ្វើឱ្យប្រសើរឡើងនូវបរិយាកាសហិរញ្ញវត្ថុ ប្រសិទ្ធភាពនៃប្រព័ន្ធទូទាត់ និងសមាហរណកម្មក្នុងតំបន់ និងពិភពលោក ដើម្បីរួមចំណែកលើកកម្ពស់ពាណិជ្ជកម្ម ការវិនិយោគ ទេសចរណ៍ និងសកម្មភាពផ្ទេរប្រាក់ពីបរទេស ។
ផ្អែកតាមមូលដ្ឋាននេះ យើងសង្ឃឹមថា ពលរដ្ឋកម្ពុជានឹងមានការប្រុងប្រយ័ត្នខ្ពស់ចំពោះការយកខ្លួនទៅសាកល្បងនឹងការជូញដូរ Bitcoin ក៏ដូចជា ឧបករណ៍នៃការជូញដូរថ្មីៗផ្សេងៗទៀតដែលអាចនឹងមានឈ្មួញកណ្តាលមកព្យាយាមពន្យល់មកបញ្ចុះបញ្ចូលមកអន្ទងអស់លោក/លោកស្រី ឲ្យសាកល្បង ។ បើចាប់អារម្មណ៍អាចបន្តតាមដាន ហើយសិក្សាវា ដើម្បីប្រមូលព័ត៌មានសិនទៅបានហើយ ។ ជាធម្មតាទេ Bitcoin និងឧបករណ៍នៃការជូញដូរផ្សេងទៀតវាអាចល្អ និងអាក្រក់ ដូច្នេះត្រឹមតែសិក្សា និងស្វែងយល់មិនទាស់ខុសអ្វីឡើយ ប៉ុន្តែកុំអាលសាកល្បង ៕ ដោយៈ ហេង ចេស្តារ
ចែករំលែកព័តមាននេះ