ក្រុមហ៊ុនឡានអគ្គិសនីដ៏ធំរបស់វៀតណាម កើបចំណូលជាង១ពាន់លានដុល្លារ កាលពីឆ្នាំមុន
ប្រទេសវៀតណាម ៖ ក្រុមហ៊ុនផលិតរថយន្តអគ្គិសនីដ៏ធំរបស់ប្រទេសវៀតណាម VinFast បានរាយ
ប្រទេសវៀតណាម ៖ ក្រុមហ៊ុនផលិតរថយន្តអគ្គិសនីដ៏ធំរបស់ប្រទេសវៀតណាម VinFast បានរាយការណ៍ពីប្រាក់ចំណូល ២៨.៦ទ្រីលានដុង ដែលស្មើនឹង ១.១៦ពាន់លានដុល្លារអាម៉េរិក កាលពីឆ្នាំមុន ពោលកើនឡើងរហូតដល់ ៩១% ធៀបនឹងឆ្នាំ ២០២២ ដោយក្នុងត្រីមាសចុងក្រោយ ការលក់កើនឡើងដល់ ១៣៣% ពោលក្នុងតម្លៃជាង ១០.៤ទ្រីលានដុង ដែលស្មើនឹងជាង ៤២២លានដុល្លារ។
VinFast ក្រុមហ៊ុនបុត្រសម្ព័ន្ធរបស់ក្រុមហ៊ុន Vingroup ដែលជាកម្មសិទ្ធិរបស់លោក Pham Nhat Vuong មហាសេដ្ឋីមានទ្រព្យច្រើនបំផុតរបស់ប្រទេសវៀតណាម បានលក់រថយន្តសរុប ៣៤,៨៥៥គ្រឿង ពោលកើនឡើង៥ដង ធៀបនឹងឆ្នាំ ២០២២ ជាមួយការលក់ម៉ូតូសរុប ៧២,៤៦៨គ្រឿង កាលពីឆ្នាំ ២០២៣ ប៉ុន្តែដោយសារតែការចំណាយផ្នែកហិរញ្ញវត្ថុ និងរដ្ឋបាលដ៏ច្រើន ក្រុមហ៊ុនបានខាតបង់ទឹកប្រាក់សរុបជាង ១៣ទ្រីលានដុង ដែលស្មើនឹងជាង ៥២៧លានដុល្លារ។ ទោះជាយ៉ាងណាក៏ ជាមួយនឹងប្រាក់ចំណេញនេះ ក្រុមហ៊ុនបានមើលឃើញថា ប្រសើរឡើងយ៉ាងខ្លាំង បើធៀបនឹងឆ្នាំ ២០២២។
Vingroup ដែលជាក្រុមហ៊ុនមេរបស់ VinFast បានគ្រប់គ្រងលើការរកប្រាក់ចំណេញ បើទោះបីជាការខាតបង់ដ៏ច្រើនរបស់ VinFast យ៉ាងណាក៏ដោយ ដោយសារតែប្រាក់ចំណេញប្រមាណ ៣២.៦ទ្រីលានដុង ដែលស្មើនឹងជាង ១.៣២ពាន់លានដុល្លារបានមកពីអង្គភាពអចលនទ្រព្យរបស់ខ្លួនគឺ ក្រុមហ៊ុនអភិវឌ្ឍន៍អចលនទ្រព្យ Vinhomes និងប្រតិបត្តិករផ្សារទំនើប Vincom Retail បូកនឹងប្រាក់ចំណេញ ១៣ពាន់លានដុង ដែលស្មើនឹងជាង ៥២៧លានដុល្លារបានមកពីក្រុមហ៊ុនបុត្រសម្ព័ន្ធផ្សេងទៀត កាលពីឆ្នាំ ២០២៣។
កាលពីឆ្នាំមុន VinFast បានដាក់ចេញយុទ្ធសាស្ត្រពហុទិសដៅរួមមាន ការផ្លាស់ប្ដូរ និងការពង្រីកបណ្ដាញលក់រាយនៅទូទាំងពិភពលោក ក៏ដូចជាការធ្វើចម្រុះភាពលើផលិតផលរបស់ខ្លួន និងការបង្កើនសមត្ថភាពផលិតកម្មផងដែរ។ បន្ថែមលើសពីនេះ ក្រុមហ៊ុនបានផ្លាស់ប្ដូរពីគំរូចែកចាយដោយផ្ទាល់ទៅជាគំរូចែកចាយសម្រាប់ប្រតិបត្តិការអន្តរជាតិរបស់ខ្លួន។ បច្ចុប្បន្នក្រុមហ៊ុនមានហាងលក់ចំនួន ១៣ នៅក្នុងរដ្ឋកាលីហ្វ័រញ៉ា និងហាងចែកចាយចំនួន ៦ នៅរដ្ឋ North Carolina, ញូវយ៉ក រដ្ឋតិចសាស់ ផ្លរីដា និងកានសាស ហើយគ្រោងនឹងមានការលក់រាយចំនួន១៣០ទីតាំងផ្សេងទៀត នៅសហរដ្ឋអាម៉េរិក និង៤០០ទីតាំង នៅទូទាំងពិភពលោកចុងឆ្នាំ ២០២៤។
នៅឆ្នាំនេះ ក្រុមហ៊ុនផ្តោតខ្លាំងលើតុល្យភាពរវាងកំណើនប្រាក់ចំណូល និងការបង្កើនប្រសិទ្ធភាពចំណាយ។ ក្រុមហ៊ុនមានគោលបំណងក្នុងការលក់រថយន្តចំនួន ១០ម៉ឺនគ្រឿង ដោយប្រើប្រាស់ទុនលើបណ្ដាញចែកចាយផ្សេងៗ និងប្រើប្រាស់បណ្ដាញចែកចាយរបស់ខ្លួន នៅក្នុងទីផ្សារបរទេស។
នៅក្នុងលក្ខខណ្ឌនៃការកាត់បន្ថយលើការចំណាយ ក្រុមហ៊ុនបានអះអាងថា ខ្លួនបានកាត់បន្ថយថ្លៃដើមសម្ភារៈចំនួន ៤០% សម្រាប់ម៉ូដែលរថយន្តនីមួយៗក្នុងរយៈពេល២ឆ្នាំ ចាប់តាំងពីការចេញលក់តាមរយៈដំណោះស្រាយបច្ចេកទេសដូចជា ការរៀបចំឡើងវិញនូវធាតុផ្សំ និងការធ្វើឱ្យប្រព័ន្ធរបស់រថយន្តអគ្គិសនី និងខ្សែសង្វាក់ផ្គត់ផ្គង់កាន់តែប្រសើរឡើង៕ (ប្រភព ៖ VNExpress)
ចែករំលែកព័តមាននេះ