ដំណើរការនៃការទូទាត់តាម QR ដែលកម្ពុជាបានដាក់ចេញជាបន្តបន្ទាប់ គឺកំពុងតែធ្វើ ដំណើរទៅមុខ ប៉ុន្តែប្រតិបត្តិករ និងអ្នកទេសចរក្រៅប្រទេសបានអះអាងថា ប្រតិបត្តិការ នៃ ការទូទាត់នេះរលូនតែនៅក្នុងកម្រិតគោលនយោបាយនៅឡើយ ។
ប្រតិបត្តិករមួយរូបដែលមិនបញ្ចេញអត្តសញ្ញាណបានឲ្យដឹងថា ការជំរុញឲ្យមានការទូទាត់ ប្រាក់តាម QR នៅក្នុងតំបន់នៅពេលបច្ចុប្បន្នដែលដាក់ចេញដោយធនាគារជាតិនៃកម្ពុជា នឹងជួយអោយវិស័យទេសចរណ៍រីកចម្រើន និងសម្រួលដល់ពលរដ្ឋកម្ពុជា និងបរទេសច្រើនពេលយើងចេញទៅប្រទេសគេ ហើយអ្នកទេសចរគេចូលមកប្រទេសយើង ។ ប៉ុន្តែមកដល់ពេលនេះ អ្វីដែលយើងបានប្រកាស គឺវារលូនតែនៅក្នុងកម្រិតគោលនយោបាយនៅឡើយទេ រីឯប្រតិបត្តិការជាក់ស្តែង គឺនៅមានបញ្ហាច្រើន ហើយមិនទូលំទូលាយទេ ។
ប្រតិបត្តិកររូបនោះបានបង្ហើបថា ការអនុវត្តនៅមិនទាន់ឃើញទូលំទូលាយដូចការដែល យើងបានចុះអនុស្សារណៈជាមួយនឹងភាគីវៀតណាម និងថៃជាដើម ។ លោកបានបន្តថា កន្លងមកយើងបានលឺថា លុយរៀលយើងអាចមាននៅតាមបញ្ជដូរប្រាក់ នៅអាកាសយាន្តដ្ឋានៅបាងកក ហើយយើងអាចទូទាត់តាម QR បានស្រួលនៅពេលដែល យើងមានកុងជាលុយរៀល ប៉ុន្តែករណីដូចជា នៅថៃ ឬនៅវៀតណាម ដែលចុះអនុស្សារណៈ យោគយល់ហើយនោះ គឺនៅមិនទាន់រលូន និងទូលំទូលាយឡើយ ។
លោកបានជំរុញឲ្យអ្នកជំនាញកម្ពុជាការធ្វើទំនាក់ទំនងការទូតជាមួយ និងទំនាក់ទំនងការប្រតិបត្តិអោយស៊ីគ្នា ហើយនៅលើទីផ្សារ សូមទទួលប្រាក់រៀលរបស់ខ្មែរដូចជា ប្រទេសថៃ ដែលប្រាក់រៀលមិនទាន់បានទូលំទូលាយ ។ ក្រសួងស្ថាប័នគួរតែពង្រឹងក្នុងតំបន់អាស៊ានជាមុនឈានទៅពង្រីកទីផ្សារផ្សេងៗទៀតទើបទទួលបានផលប្រយោជន៍ដល់សង្គមជាតិ ។
មន្ត្រីធនាគារជាតិមិនអាចទំនាក់ទំនងបាន ប៉ុន្តែពាក់ព័ន្ធនឹងបញ្ហានេះលោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានអោយដឹងថា ការជំរុញការចាយវាយប្រាក់ តាមប្រព័ន្ធទំនើបគួរពង្រឹងនៅក្នុងតំបន់ ។
លោក ហូ វណ្ឌី បានអោយកម្មវិធីលុយនៃសារព័ត៌មានកោះសន្តិភាពដឹងថា «ការជំរុញការចាយវាយប្រាក់ តាមប្រព័ន្ធទំនើប ជាពិសេស QR code គួរពង្រឹងនៅក្នុងតំបន់អោយបានល្អសិន ជាពិសេសក្នុងសហគមន៍អាស៊ានដែលមាន១១ប្រទេស» ។
លោក ហូ វណ្ឌី បានបន្តថា ក្នុងដើមឆ្នាំ២០២៤នេះ ការជំរុញចរន្តទេសចរណ៍ក្នុងស្រុក កាន់តែកើនមានដែលជួយដល់អ្នកផ្គត់ផ្គង់សេវាកម្មទាំងអស់នៅក្នុងវិស័យពាក់ព័ន្ធ សម្រាប់បង្កើនចំណូលដល់ប្រជាពលរដ្ឋ ។
សព្វថ្ងៃនេះ ប្រតិបត្តិការនៃការទូទាត់តាមប្រព័ន្ធ QR code គឺកម្ពុជាបានឈានដល់ការប្រកាសដាក់ឲ្យប្រើប្រាស់នៅប្រទេសមួយចំនួន រួមមានចិន ថៃ វៀតណាម និងឡាវ ហើយនៅពេលនេះ ធនាគារជាតិនៃកម្ពុជាក៏បានកំពុងតែពង្រឹងយន្តការការទូត កម្រិតគោល នយោបាយជាមួយនឹងដៃគូផ្សេងៗទៀតរួមទាំងឥណ្ឌាផងដែរ ៕ ដោយៈ ស នីត
ចែករំលែកព័តមាននេះ