រាជធានីភ្នំពេញ ៖ ពិតណាស់ ប្រជាជនយើងបច្ចុប្បន្នមានការពេញនិយមជាខ្លាំងទៅលើការទទួលទានគ្រឿងស្រវឹង នៅពេលជួបជុំគ្នា មិនថា បុណ្យទាន ឬមានពិធីអបអរ តូចធំនានា ។ នៅកម្ពុជា មានគ្រឿងស្រវឹងផ្សេងៗ ដែលប្រជាពលរដ្ឋមួយចំនួនប្រើប្រាស់ដូចជា ស្រា ស្រាបៀរ ស្រាស ស្រាថ្នាំ និងទឹកត្នោតជូរជាដើម ។ មនុស្សមួយចំនួន ចូលចិត្តប្រើប្រាស់គ្រឿងស្រវឹង ព្រោះវាអាចធ្វើឲ្យពួកគេ មានអារម្មណ៍សប្បាយ បានរសាយពីភាពមួរហ្មង ឬទុក្ខកង្វល់ ភ្លេចអស់នូវទុក្ខព្រួយ និងបញ្ហាស្មុគស្មាញនានា ។ យ៉ាងណាមិញ ការទទួលទានភេសជ្ជៈស្រវឹងទាំងនោះរាល់ថ្ងៃ អាចបង្កឲ្យពួកគេប្រឈមនឹងគ្រោះថ្នាក់ជាច្រើន ។
បើនិយាយពីផ្លូវលោកវិញ ការទទួលទានសុរា ឬគ្រឿងស្រវឹងខ្លាំងពេក ឬទទួលទានជាប់ជាប្រចាំ នោះលោកអ្នកងាយនឹងប្រឈមមុខនឹងបញ្ហាសុខភាពខ្លាំងណាស់ ។ សម្រាប់ក្ដីបារម្ភមួយចំនួនទៀតនាពេលអនាគត ពោលការទទួលទានគ្រឿងស្រវឹងនេះ ពិតជាផ្ដល់ផលប៉ះពាល់ច្រើនទាំងសុខភាពផ្ទាល់ខ្លួន បញ្ហាក្នុងគ្រួសារ និងបង្កជាផលវិបាកដល់សង្គមជាតិផងដែរ ។
ជាក់ស្តែង កាលពីពេលថ្មីៗកន្លងមកនេះ ព្រះភិក្ខុ វជិរប្បញ្ញោ គូ សុភាព ក៏បានបញ្ចេញសារដាស់តឿន ដល់បងប្អូនទាំងឡាយនៅលើបណ្តាញសង្គមហ្វេសប៊ុករបស់ព្រះអង្គ ៖ «ធ្វើបុណ្យ ដាក់ស្រាទទួលភ្ញៀវ អស់ប្រាក់ហើយបានបាបទៀត ឈ្មោះថាជាទានរបស់អសប្បុរស ។ មិនងាយបានធ្វើបុណ្យធំទេ គួរធ្វើប្រកបដោយបញ្ញា ។»
បើយើងនិយាយទៅ ឃើញថា វប្បធម៌ទទួលទានស្រាបៀកំពុងមានសន្ទុះកើនឡើងខ្លាំងមែនទែន ក្នុងប្រទេសមួយចំនួន ជាពិសេសតំបន់អាស៊ីអាគ្នេយ៍ ។ ដោយឡែកកម្ពុជាឈរនៅលេខរៀងទី៣ ដែលមានប្រជាជនផឹកស្រាច្រើនជាងគេនៅក្នុងតំបន់អាស៊ាន និងឈរនៅលេខរៀងទី៣៦ នៅលើពិភពលោក ពោល គឺប្រជាជនកម្ពុជាម្នាក់អាចផឹកស្រាបាន ២១.៧លីត្រ ។ នេះបើយោងតាមរបាយការណ៍របស់ Wisevoter។ របាយការណ៍នេះ អ្នកធ្វើកិច្ចការងារសង្គមលើកឡើងថាអាចឆ្លុះបញ្ចាំងការពិតដែរ ដោយសារតែកម្ពុជាគ្មានច្បាប់កំណត់អាយុនៃការផឹកស្រា។
យ៉ាងណាមិញ ការបរិភោគជាតិអាល់កុលញឹកញាប់ និងច្រើនហួសប្រមាណ អាចបង្កជាជំងឺ ព្រមទាំងគ្រោះថ្នាក់ផ្សេងៗ ។ បញ្ហាប្រឈមទាំងនេះ អាចធ្វើឲ្យអ្នកបរិភោគវាត្រូវខាតអាយុចំនួន១ឆ្នាំជាមធ្យម ។ នេះ គឺជាការសន្និដ្ឋានក្នុងរបាយការណ៍នៃអង្គការOCDE ដែលបានធ្វើការអង្កេតជាមួយប្រជាជននៅតាមប្រទេសសមាជិកទាំង៥២ កាលពីឆ្នាំ២០២១ ។
ការធ្វើបុណ្យ មិនចាំបាច់ដល់ខ្លួនចាស់ទើបអាចធ្វើបាននោះទេ ព្រោះថា ជីវិតរបស់យើងមិនទៀង មិនដឹងថាស្លា.ប់ថ្ងៃណា មិនដឹងថាយើងរស់ដល់ចាស់ដែរឬក៏អត់…. ហើយក៏មានចាស់ ដែលមិនបានធ្វើបុណ្យឲ្យទានចូលវត្តរក្សាសីលក៏មានច្រើនដែរ ដូច្នេះប្រសិនបើមានឱកាសល្អហុចឲ្យហើយគួរខំធ្វើទៅ ។
ដូច្នេះហើយ ជីវិតមនុស្សកើតមក គឺមានអាយុកាលខ្លីណាស់ ដូច្នេះចូរប្រើប្រាស់ពេលវេលា និងធ្វើបុណ្យទាន់ឲ្យបានច្រើនតាមដែលអ្នកអាចធ្វើទៅបាន ។ ម្ល៉ោះហើយយើងគួរធ្វើបុណ្យឱ្យបានច្រើន ដើម្បីជម្រះនូវអកុសលធម៌ សម្អាតចិត្តបាបចេញពីខន្ធសន្តានរបស់យើង ហើយប្រមូលយកសេចក្តីល្អមកទុកជំនួសវិញ កុសលធម៌ណាដែលជម្រះសន្តានចិត្តឲ្យស្អាតផូរផង់ កុសលធម៌នោះឯងឈ្មោះថាជាតួបុណ្យ ។ ដូចនេះយើងគួរខំសាងកុសលធម៌ ដុះខាត់អប់រំចិត្តឲ្យស្អាតផូរផង់ដូចប្រក្រតីដើមឡើងវិញដោយពិធីឲ្យទាន រក្សាសីល ចម្រើនមេត្តា ភាវនា នេះហើយជាបុណ្យ ឬសេចក្តីល្អនោះ ។
ដោយឡែក បុណ្យ និងបាបពិតជាមានមែន គ្រាន់តែថា ខ្សែបុណ្យ និងខ្សែបាបនោះ មើលមិនឃើញ ចាប់ពាល់មិនបាន និងមិនស្ថិតនៅមួយកន្លែងទេ គឺតែងប្រព្រឹត្តទៅជារឿយៗ ផ្លាស់ប្តូរតាមសម័យកាល ដែលសត្វបានប្រព្រឹត្តនោះឯង តែយើងមិនអាចចង្អុលបង្ហាញថា បាប និងបុណ្យស្ថិតនៅត្រង់នេះ ឬត្រង់នោះឲ្យឃើញច្បាស់នឹងភ្នែកបានឡើយព្រោះវាជាសភាវៈដ៏អាថ៌កំបាំងបំផុត ។
មួយវិញទៀត បាប និងបុណ្យ ឱ្យផលផ្ទុយគ្នាស្រឡះ បាបបានដល់អំពើលាមក អំពើអាក្រក់ពុំគាប់ប្រសើរ ឱ្យផលជាទុក្ខក្តៅក្រហាយ ចិត្តសៅហ្មងគ្រប់វេលា ចំណែកបុណ្យបានដល់គុណជាតិជាគ្រឿងជម្រះសន្តានចិត្តឱ្យផូរផង់រីករាយ ស្រស់ស្រាយសប្បាយរាល់ថ្ងៃ ៕
ចែករំលែកព័តមាននេះ