រាជធានីភ្នំពេញ ៖ រឿង សោភ័ណ្ឌ មកពីក្លឹបខេមរកីឡាណាត់ជួបសេក គឹមផាន មកពីក្លឹបសឹករងខេត្តសៀមរាបនៅលើសង្វៀន CTN ថ្ងៃសុក្រ ទី៣ ខែមិថុនា ។
សោភ័ណ្ឌ មិនមែនជាជើងខ្លាំងដែលពិបាកទប់ទល់ណាស់ណាទេ ដូច្នេះការដែលគេមកចង់សាកកំលាំងជាមួយគឹមផាន លើកនេះគឺពិតជាមិនធម្មតាឡើយ។ ម្យ៉ាងវិញទៀតថ្វីដ្បិតតែគឹមផានទើបតែជ្រុះចេញពីការប្រកួតដណ្តើមប្រាក់ពីក្នុងធនាគារក្តីក៏គេមិនញញើតសោភ័ណ្ឌដែរ ។ សោភ័ណ្ឌពូកែស្នៀតជើង និងស្នៀតដៃ តែអន់កំលាំងចិត្ត។ ចំណែកគឹមផាន ចិត្តរបស់គេតូចដូចគ្នា តែកំលាំងខ្លាំង ល្បិចប្រយុទ្ធក្រាស់ជាង ។ ប៉ុន្តែបើមិនទាន់ជួបគ្នា គឺមិនអាចដឹងពីលទ្ធផលមុនបានឡើយ ដូច្នេះទាល់តែសាកគ្នាមើលសិន។
យ៉ាម រ៉េត មកពីក្លឹបរស្មីកុមារកំព្រាជួបហេង ប៊ុនលឹម មកពីក្លឹបព្រៃទទឹង។ គូនេះប្រវត្តិនៃការឈានជើងឡើងសង្វៀនក៏មិនសូវជាយូរប៉ុន្មានដែរ រីឯល្បិចប្រយុទ្ធ គឺប្រហាក់ប្រហែលគ្នាអាចសីុសងគ្នាបាន។ យ៉ាម រ៉េត ប៉ិនប្រសប់ខាងប្រើស្នៀតជើង រីឯស្នៀតដៃវាយចេញមិនសូវជាបានល្អប៉ុន្មានឡើយ ប៉ុន្តែចិត្តរបស់គេសឿងគួរសម ចរិតរបស់យ៉ាម រ៉េត គឺមិនងាយចាញ់សំឡុតគេដោយងាយទេ។ ចំណែកហេង ប៊ុនលឹម កេរ្តិ៍ឈ្មោះរបស់គេមិនសូវជាល្បីល្បាញប៉ុន្មានទេ តែកុំមើលស្រាលលើស្នៀតប្រយុទ្ធរបស់គេឱ្យសោះយ៉ាងហោចណាស់ក៏គេអាចធ្វើឱ្យយ៉ាម រ៉េត ជួបការលំបាកខ្លះៗដែរ។ ស្នៀតជើង និងស្នៀតកណ្តាប់ដៃរបស់គេមិនអាចនៅស្ងៀមបណ្តោយឱ្យគូប្រកួតរបស់គេធ្វើអ្វីតាមតែចិត្តបានឡើយ។
ឈិន ធារ៉ា មកពីក្លឹបអន្លង់វែងជួបជ័យ ប៊ុនសុង មកពីក្លឹបខេមរិន្ទមានរឹទិ្ធ។ ខឹម បូរា៉ មកពីក្លឹបរស្មីភូមិគាបជួបខុន សីហា មកពីក្លឹបកងពលធំអន្តរាគមន៍លេខ៣ ព្រះវិហារ។ ពេជ្រ តុលា មកពីក្លឹបអារុណរះជួបយឹម វិចិត្រ មកពីក្លឹបរស្មីកុមារកំព្រា ៕
ចែករំលែកព័តមាននេះ