សណ្ឋាគារនៅលើពិភពលោកនេះមានរាប់មិនអស់ ហើយត្រូវបានដាក់ចំណាត់ថ្នាក់ផ្សេងៗគ្នាទៅតាមទំហំសេវាកម្ម និងសម្ភារៈ ប៉ុន្តែសណ្ឋាគារដែលធំជាងគេបង្អស់នៅលើពិភពលោកនៅពេលបច្ចុប្បន្ននេះត្រូវបានគេដឹងថា មានទីតាំងនៅប្រទេសម៉ាឡេស៊ី ។ ក្រៅពីនោះសណ្ឋាគារដែលមានទំហំធំលំដាប់ទី២ ដល់ទី៤ គឺមានទីតាំងនៅសហរដ្ឋអាមេរិក ខណៈដែលលំដាប់សណ្ឋាគារដែលធំជាងគេទី៥…
សណ្ឋាគារនៅលើពិភពលោកនេះមានរាប់មិនអស់ ហើយត្រូវបានដាក់ចំណាត់ថ្នាក់ផ្សេងៗគ្នាទៅតាមទំហំសេវាកម្ម និងសម្ភារៈ ប៉ុន្តែសណ្ឋាគារដែលធំជាងគេបង្អស់នៅលើពិភពលោកនៅពេលបច្ចុប្បន្ននេះត្រូវបានគេដឹងថា មានទីតាំងនៅប្រទេសម៉ាឡេស៊ី ។
ក្រៅពីនោះសណ្ឋាគារដែលមានទំហំធំលំដាប់ទី២ ដល់ទី៤ គឺមានទីតាំងនៅសហរដ្ឋអាមេរិក ខណៈដែលលំដាប់សណ្ឋាគារដែលធំជាងគេទី៥ គឺនៅប្រទេសថៃ ។ សណ្ឋាគារទាំងនេះមានចំនួនបន្ទប់ស្នាក់នៅ រហូតដល់ទៅជាង៤០០០បន្ទាប់ឡើង ។
នៅក្នុងចំណោមកំពូលសណ្ឋាគារធំៗទាំង៥ នៅលើពិភពលោកនេះ មានសណ្ឋាគារមួយ ដែល សូម្បីតែពលរដ្ឋកម្ពុជាជាច្រើននាក់ គឺបានស្គាល់ និងធ្លាប់បានស្នាក់នៅទីនោះផងដែរនៅពេល ដែលពួកគេបានធ្វើដំណើរតាមក្រុមហ៊ុនទេសចរណ៍ទៅកម្សាន្តនៅក្នុងប្រទេសម៉ាឡេស៊ី ។
តើសណ្ឋាគារដែលធំទាំង៥ នៅលើពិភពលោកនេះមានឈ្មោះអ្វីខ្លះ? ហើយវាមានលក្ខណៈពិសេសអ្វីខ្លះ? កម្មវិធីលុយនៃសារព័ត៌មានកោះសន្តិភាព សូមចែករំលែកនូវព័ត៌មានទាំងនេះទុកជាចំណេះដឹងទូទៅដូចខាងក្រោមៈ
១.សណ្ឋាគារ the First World Hotel
The First World Hotel ជាសណ្ឋាគារលំដាប់ផ្កាយប្រាំប្រណិតក្នុងរដ្ឋ ប៉ាហាង (Pahang )នៃប្រទេសម៉ាឡេស៊ី ។ សណ្ឋាគារនេះ ត្រូវបានបង្កើតឡើងក្នុងឆ្នាំ ២០០១ នៅលើខ្ពង់រាបហ្គេនធីង ហើយជាទូទៅអ្នកទេសចរមកពីកម្ពុជាយើងស្គាល់ភាគច្រើនថា គឺភ្នំហ្គេនធីង ។ សណ្ឋាគារនេះបានទទួលកំណត់ត្រាពិភពលោក Guinness ជា សណ្ឋាគារធំជាងគេបំផុតរបស់ពិភពលោក ដែលមានបន្ទប់សរុបចំនួន ៧.៣៥១ បន្ទប់ ដែលសាងសង់ឡើងមានកម្ពស់ ២៨ជាន់ ។
ទីនោះគឺជារីសតដែលមិនមែនមានតែសណ្ឋាគារនោះទេ គឺមានកាស៊ីណូ និងមជ្ឈមណ្ឌល កម្សាន្ត ព្រៃប្រឹក្សា ហើយអ្វីដែលសំខាន់ គឺក្រៅពីអ្នកទេសចរត្រូវជិះរថយន្តទៅដល់ចំណុច ខ្ពស់បំផុតហើយនោះ ដើម្បីទៅដល់សណ្ឋាគារនេះ គឺត្រូវបន្តជិះកន្ត្រក ខ្សែកាបបន្ថែមជាច្រើននាទីទៀតបានទៅដល់ ។
២.សណ្ឋាគារ និងកាស៊ីណូ Venetian Resort and the Palazzo:
សណ្ឋាគារ និងកាស៊ីណូ Venetian Resort and the Palazzo បានបើកដំណើរការនៅឆ្នាំ២០០៧ ដោយបន្ទប់សរុបមានចំនួន៧.១១៧បន្ទប់ និងមានកម្ពស់សរុប៥៣ជាន់ ។ សណ្ឋាគារ និងកាស៊ីណូប្រណីតនេះ មានទីតាំងស្ថិតនៅសង្កាត់ ផារ៉ាដាយ( Paradise ) ឡាស វេហ្គាស រដ្ឋណេវ៉ាដា (Nevada ) ។ Venetian Resort and the Palazzo ជាកន្លែងស្នាក់នៅដ៏មានផាសុខភាពលំដាប់ផ្កាយ៥ ដែលមានលក្ខណៈបរិស្ថានល្អ ។ សណ្ឋាគារប្រណីតនេះមានសេវាកម្មស្ប៉ា និងក្លឹបសុខភាពពេញលេញ អាងហែលទឹកដ៏ទាក់ទាញ និងកាស៊ីណូទំនើបទាន់សម័យ។
៣.សណ្ឋាគារ MGM Grand Las Vegas និង the Signature
ជាប់ចំណាត់ថ្នាក់ជាសណ្ឋាគារធំជាងគេទីបីនៅទូទាំងពិភពលោក ។ MGM Grand Las Vegas និង The Signature ជាមជ្ឈមណ្ឌលសេវាកម្មស្នាក់នៅឈរលំដាប់ទីពីរនៅឡាសវេហ្គាស ។ សណ្ឋាគារនេះត្រូវបានបង្កើតឡើងនៅឆ្នាំ១៩៩៣ ជាមួយនឹងបន្ទប់ដ៏អស្ចារ្យចំនួន ៦.៨៥២ រួមទាំងបន្ទប់ធំទូលាយដែលមានបង្អួចពីជាន់ដល់ពិដាន និងមានកម្ពស់៣៨ ជាន់ ។ សណ្ឋាគារនេះផ្តល់នូវបទពិសោធន៍នៃការស្នាក់នៅដ៏ប្រណីតដោយមានបន្ទប់លេងល្បែង និងកន្លែងរៀបចំព្រឹត្តិការណ៍ក៏ដូចជា ការប្រគុំតន្ត្រីធំៗជាច្រើន ។
៤.សណ្ឋាគារ Luxor
សណ្ឋាគារ Luxor នៅ Las Vegas សាងសង់ឡើងក្នុងឆ្នាំ ១៩៩៣ កម្ពស់៣៦ជាន់នេះមាន៤.៤០៨ បន្ទប់ដែលធ្វើឱ្យវាក្លាយជាសណ្ឋាគារដ៏ធំបំផុតទីបួននៅក្នុងពិភពលោក ។ វាជាសណ្ឋាគារ ផ្កាយ៣កន្លះ ហើយចំណាយតិចក្នុងការស្នាក់នៅ បើធៀបនឹងសណ្ឋាគារធំៗផ្សេងទៀតនៅ Las Vegas ។ សណ្ឋាគារនេះមានភាពលេចធ្លោខុសពីសណ្ឋាគារធំៗផ្សេងទៀត ដោយសារការរចនារបស់វា ។ សណ្ឋាគារនេះត្រូវបានរចនាក្នុងរចនាបទអេហ្ស៊ីបដែលមានរាងដូចពីរ៉ាមីតដែលមានរូបចម្លាក់អេហ្ស៊ីប ។
៥ សណ្ឋាគារ Ambassador City Jomtien
សណ្ឋាគារដែលធំបំផុតទីប្រាំនៅលើកពិភពលោក និងជាសណ្ឋាគារធំទីពីរនៅអាស៊ីគឺ Ambassador City Jomtien ដែលមានទីតាំងនៅប៉ាតាយ៉ា ប្រទេសថៃ ។ វាបានបើក ដំណើរការនៅឆ្នាំ១៩៨៧ ដោយមាន៤.២១០ បន្ទប់ និងកម្ពស់៤២ ជាន់ លំដាប់ផ្កាយ៤ និងជាសណ្ឋាគារឆ្នេរមួយដែលមានឆ្នេរឯកជនផ្ទាល់ខ្លួន ហើយនៅជិតកន្លែងទាក់ទាញ និងឧទ្យានជាច្រើន ៕
ចែករំលែកព័តមាននេះ