សង្វេគណាស់! លោកម្ចាស់តាព្រះជន្ម៨៥វស្សា ត្រូវកូនៗបោះបង់ចោ.ល
- កំពង់ឆ្នាំង
ខេត្តកំពង់ឆ្នាំង ៖ លោកម្ចាស់តាមួយព្រះអង្គ ព្រះជន្ម៨៥វស្សា ស្ថិតក្នុងស្ថានភាពវង្វេង កំពុង គង់
ខេត្តកំពង់ឆ្នាំង ៖ លោកម្ចាស់តាមួយព្រះអង្គ ព្រះជន្ម៨៥វស្សា ស្ថិតក្នុងស្ថានភាពវង្វេង កំពុង គង់នៅវត្តខ្សាច់ស ភូមិអណ្តូងស្នាយ ឃុំអណ្តូងស្នាយ ស្រុករលៀប្អៀរ ខេត្តកំពង់ឆ្នាំង ។ ការដែលព្រះអង្គមកបួសនេះ គឺដោយហេតុថា ត្រូវបានកូនៗបោះបង់ចោល ។ នេះបើតាមការបង្ហោះវីដេអូរបស់ព្រះវិរិយធម្មញាណ ពៅ ស៊ត នៅថ្ងៃទី១៦ កុម្ភៈ ឆ្នាំ២០២៤ ។
តាមរយៈការនិមន្តយកអំណោយមកប្រគេនលោកម្ចាស់តាមួយព្រះអង្គខាងលើនេះ ព្រះវិរិយធម្មញាណ ពៅ ស៊ត បានសាកសួរព័ត៌មានពីព្រះចៅអធិការវត្តខ្សាច់ស ពាក់ព័ន្ធនឹងរឿងលោកម្ចាស់តា ត្រូវកូនៗបោះបង់ចោល ថាតើរឿងនេះជាការពិតឬយ៉ាងណា ។
ព្រះចៅអធិការវត្តខ្សាច់ស ព្រះនាមវង្ស ច័ន្ទរិទ្ធី បានមានថេរដីកាឱ្យដឹងថា រឿងនេះគឺជារឿងពិត ដោយសារតែលោកតាព្រះចៅអធិការវត្តជំនាន់មុន លោកឃើញលោកម្ចាស់តាអាណិត ក៏យកមកបំបួស ដោយសារត្រូវកូនបោះបង់ចោល ហើយលោកម្ចាស់តាគង់នៅទីនេះមុនអាត្មាទៀត ។ នៅពេលដែលលោកតាព្រះចៅអធិការវត្តជំនាន់មុននិមន្តចេញទៅ អាត្មាត្រូវបានក្រសួងធម្មការ និងសាសនា និងព្រះតេជគុណចាត់តាំងមក ក៏ឃើញលោកម្ចាស់តានៅទីនេះ ក៏មើលថែលោកទៅ ។ ណាមួយបើថា លោកម្ចាស់តាសឹកទៅ ក៏មិនដឹងជានិមន្តទៅណាដែរ ។
ព្រះចៅអធិការវត្ត បានមានថេរដីកាបន្តទៀតថា ក្មួយរបស់លោកម្ចាស់តា ដែលនៅភូមិខាងមុខនេះក៏បានមកហាមព្រះអង្គថា កុំឱ្យលោកម្ចាស់តាទៅផ្ទះគេ ព្រោះគេអត់មានអីចិញ្ចឹមទេ ហើយលោកម្ចាស់តាលួចទៅ អាត្មាមិនបានដឹង បើដឹង មិនឱ្យ និមន្តទៅទេ ។
នៅពេលព្រះវិរិយធម្មញាណសួរព្រះចៅអធិការវត្តថា មូលហេតុអ្វីបានជាកូនចៅបោះបង់លោកម្ចាស់តាចោល? ព្រះចៅអធិការវត្តបានមានថេរដីកាថា អាត្មាមិនបានដឹងដែរ ព្រោះជារឿងក្រុមគ្រួសាររបស់លោកម្ចាស់តា ក៏ប៉ុន្តែអាត្មាដឹងច្បាស់ថា លោកម្ចាស់តា មានកូនចំនួន៣នាក់ ក៏ប៉ុន្តែមិនដែលមកអើតមើលលោកទេ។
ព្រះចៅអធិការវត្តខ្សាច់ស បានបន្តថា ព្រះអង្គនិយាយនេះ គឺចង់ឱ្យកូនចៅរបស់លោកម្ចាស់តាដឹងឮដែរ ព្រោះរឿងនេះគឺជារឿងពិត លោកម្ចាស់តាត្រូវកូនបោះបង់ចោល ។
តាមរយៈវីដេអូនេះ ព្រះវិរិយធម្មញាណពៅ ស៊ត សូមផ្តាំផ្ញើទៅកូនៗទាំងអស់គ្នាផងដែរថា បើសិនជាគាត់ជាឪពុក ជាម្តាយរបស់យើង ហើយយើងបំបោះបង់គាត់ចោល នៅក្នុងផ្លូវព្រះពុទ្ធសាសនា គឺព្រះអង្គឱ្យយើងជឿទៅលើកម្ម ហើយនឹងផល ។ មិនយូរមិនឆាប់ទេ យើងដែលជាកូន ពេលដែលយើងចាស់ទៅ កម្មពារនឹងធ្លាក់មកលើខ្លួនឯងហើយ ។ ក្នុងទ្រឹស្តីព្រះពុទ្ធសាសនា ព្រះអង្គឱ្យយើងជឿទៅលើកម្ម ហើយនឹងផល ។ អញ្ចឹងបើកម្មណាយើងធ្វើប្រព្រឹត្តបែបម៉េច ផលនោះនឹងបានមកលើយើងនៅថ្ងៃណាមួយជាក់ជាមិនខានឡើយ ៕
ចែករំលែកព័តមាននេះ