ខេត្តប៉ៃលិន ៖ គេសង្កេតឃើញភ្ញៀវទេសចរដែលធ្វើដំណើរមកពីតាមបណ្តាខេត្តនានា ដូចជាខេត្តបាត់ដំបង, បន្ទាយមានជ័យ, ពោធិ៍សាត់ និងរហូតដល់រាជធានីភ្នំពេញ ពេលជួបជាមួយភ្នាក់ងារសារ ព័ត៌មានពួកគាត់ម្នាក់ៗពោលសរសើរពីទេសភាពរមណីយដ្ឋានធម្មជាតិនៅទឹកធ្លាក់ភ្នំខៀវថា មានទេសភាព…
ខេត្តប៉ៃលិន ៖ គេសង្កេតឃើញភ្ញៀវទេសចរដែលធ្វើដំណើរមកពីតាមបណ្តាខេត្តនានា ដូចជាខេត្តបាត់ដំបង, បន្ទាយមានជ័យ, ពោធិ៍សាត់ និងរហូតដល់រាជធានីភ្នំពេញ ពេលជួបជាមួយភ្នាក់ងារសារ ព័ត៌មានពួកគាត់ម្នាក់ៗពោលសរសើរពីទេសភាពរមណីយដ្ឋានធម្មជាតិនៅទឹកធ្លាក់ភ្នំខៀវថា មានទេសភាព ស្រស់ស្អាតជាងគេនៅទូទាំងខេត្តប៉ៃលិន ជាពិសេស មានទឹកជ្រោះច្រើនជាន់អំណោយផលឱ្យពួកគាត់ អាចនាំគ្នាចុះទៅងូតលេងយ៉ាងត្រជាក់កាយសប្បាយចិត្ត ជាពិសេស នាឱកាសបុណ្យចូលឆ្នាំចិន ឆ្នាំ២០២៤នេះតែម្តង ។
ទោះបីជាភ្ញៀវទេសចរទាំងនោះ បានចូលមកទស្សនា និងដើរលេងកំសាន្តនៅតាមរមណីយដ្ឋាននានាក្នុងខេត្តប៉ៃលិន ដូចជា រមណីយដ្ឋានម្លប់សាវម៉ាវ រមណីយដ្ឋានចំការខ្នុរ រមណីយដ្ឋាន ស្ទឹងត្រជាក់ចិត្ត ព្រមទាំងរមណីយដ្ឋានមួយចំនួនដែលទើបនឹងបង្កើតថ្មីក៏ដោយ គឺរមណីយដ្ឋានទឹកធ្លាក់ភ្នំខៀវ ទទួលបានភ្ញៀវទេសចរច្រើនជាងគេ ខណ:ដែលអាជ្ញាធរខេត្តប៉ៃលិន បានធ្វើការរៀបចំតុបតែងយ៉ាងស្រស់ស្អាតគួរឱ្យកោតសរសើរ ទើបធ្វើឱ្យរមណីយដ្ឋានមួយនេះ ប្រែក្លាយទៅជាកន្លែងដ៍៏ទាក់ទាញបំផុត និងមានភាពស្រស់ត្រកាលគួរឱ្យចង់គយគន់ ព្រោះមានអំណោយផលធម្មជាតិដើមឈើដុះត្រឈឹងត្រឈៃនៅសងខាងផ្លូវ និងជុំវិញកន្លែងកម្សាន្តតែម្តង ។
បើតាមការរៀបរាប់ពីភ្ញៀវទេសចរ ឈ្មោះ សុខ ណាវី ភេទស្រី អាយុ២៨ឆ្នាំ និងឈ្មោះ កែវ រចនា ភេទស្រី អាយុ២៥ឆ្នាំ មកពីខេត្តបាត់ដំបងបានឱ្យភ្នាក់ងារយើងដឹងថា ក្រោយពេលសែនចិនថ្ងៃដំបូងរួច ពួកគាត់ក៏បានបបួលបងប្អូនមិត្តភក្តិ នាំគ្នាបើករថយន្តចូលមកលេងទឹកដីខេត្តប៉ៃលិន ព្រោះ ខានចូលមកលេងជាច្រើនមកហើយដែរ ខណ:ពេលដែលពួកគាត់ភាគច្រើនគឺនាំគ្នាទៅលេងតាមតំបន់ សមុទ្រ។ តែពេលមក លេងកម្សាន្តនៅរមណីយដ្ឋានទឹកធ្លាក់ភ្នំខៀវនេះភ្លាម កត់សម្គាល់ឃើញថា ខេត្តប៉ៃលិន រមណីយដ្ឋានធម្មជាតិទឹកធ្លាក់ភ្នំខៀវពិតជាស្រស់ស្អាត ដោយមានទឹកជ្រោះហូរពីលើមកយ៉ាង ថ្លាឈ្វេង ដែលធ្វើឱ្យពួកគាត់មិនអាចសម្ងំនៅស្ងៀម គឺក្រោយពេលទទួលទានអាហារថ្ងៃត្រង់រួច ក៏នាំគ្នា ចុះងូតលេង ធ្វើឱ្យត្រជាក់កាយសម្បាយចិត្ត ។
ពួកគាត់បន្តទៀតថា នៅពេលក្រោយៗទៀត នាឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ ពួកគាត់នឹងបបួលបងប្អូនមិត្តភក្តិ ឱ្យចូលមកលេងក្នុងខេត្តប៉ៃលិនកាន់តែច្រើនកុះករ ព្រោះមានរមណីយដ្ឋានល្អ ជាពិសេសគឺទឹកធ្លាក់ភ្នំខៀវ ដែលបានឆក់ទាញបេះដូងរបស់ពួកគាត់ឱ្យនឹកចាំមិនភ្លេចតំបន់ទេសចរណ៍ក្នុងខេត្តប៉ៃលិននេះឡើយ។
បើតាមប្រភពព័ត៌មានពីលោក លឹម វាសនា ប្រធានមន្ទីរទេសចរខេត្តប៉ៃលិនបានឱ្យដឹងថា ៖ នាឱកាសបុណ្យចូលឆ្នាំចិនវៀតណាម ដែលជាឱកាសមាសដ៏មានតម្លៃបំផុត ដែលផ្តល់ឱ្យប្រជាពលរដ្ឋ និងភ្ញៀវទេសចរគ្រប់ៗ គ្នាមានពេលវេលា ក្នុងការដើរលេងកម្សាន្តតាមតំបន់រមណីយដ្ឋាននានាក្នុងប្រ ទេសកម្ពុជា ជាពិសេសខេត្តប៉ៃលិនតែម្តង ។
លោកបានបន្តទៀតថា នាឱកាសបុណ្យចូលឆ្នាំចិនវៀតណាមនេះ ភ្ញៀវទេសចរមកទស្សនាខេត្តប៉ៃលិនច្រើន ក្នុងនោះភ្ញៀវទេសចរដែលបានមកទស្សនាតាមរមណីយដ្ឋាននានា ដូចជារមណីយ៍ដ្ឋានប្រវត្តិសាស្ត្រភ្នំយ៉ាត រមណីយដ្ឋានម្លប់សាវម៉ាវ រមណីយដ្ឋានទឹកធ្លាក់អូរអែម រមណីយដ្ឋានចំការខ្នុរ រមណីយដ្ឋានគល់ស្ពានតារៀប និងរមណីយដ្ឋានទឹកធ្លាក់ភ្នំខៀវជាដើម ៕
ចែករំលែកព័តមាននេះ