នៅលើពិភពលោកនេះកន្លែងដែលមានលំនៅស្ថានច្រើនជាងគេ គឺនៅទ្វីបអាស៊ី អាហ្វ្រិក អឺរ៉ុប អាមេរិកខាងត្បូង និងអាមេរិកខាងជើង ប៉ុន្តែកន្លែងដែលមានលំនៅស្ថានថ្លៃបំផុតនៅលើពិភពលោក គឺភាគច្រើននៅអឺរ៉ុប ។
តើនៅកន្លែងណាខ្លះដែលមានលំនៅស្ថានដែលមានតម្លៃថ្លៃបំផុតនៅលើពិភពលោក? ថ្ងៃនេះកម្មវិធីលុយនៃសារព័ត៌មានកោះសន្តិភាព សូមចែករំលែកចំណេះដឹងនេះខ្លះៗថា កន្លែងដែលមានលំនៅស្ថានថ្លៃបំផុតកសាង គឺភាគច្រើននៅអឺរ៉ុប ដោយឡែកអាស៊ីក៏មិនអត់នោះដែរ ។
១. វិមានបាកឃីងហាំ ( Buckingham ) នៅចក្រភពអង់គ្លេស
វិមាននេះមានតម្លៃប្រមាណជា៤,៩ ពាន់លានដុល្លារ ដែលធ្វើឱ្យវាក្លាយជាលំនៅស្ថាននៅក្នុងបញ្ជីដែលមានតម្លៃថ្លៃបំផុតនៅលើពិភពលោក ហើយគេដឹងថា ជារតនៈសម្បត្តិរបស់គ្រួសាររាជវង្សអង់គ្លេស ។ វិមានដ៏ស្កឹមស្កៃនេះមានបន្ទប់សរុប៧៧៥បន្ទប់ នៅក្នុងនោះបន្ទប់ប្រជុំ១៩បន្ទប់ ក៏ដូចជា អាងហែលទឹក ។ ក្រៅពីនេះវាមានសួនច្បារ ហើយគេជឿជាក់ថា ក៏នៅមានបន្ទប់សម្ងាត់មួយចំនួនទៀត ស្ថិតនៅជុំវិញវិមានដ៏ប្រណិតលាតសន្ធឹងលើផ្ទៃដីប្រហែល ៧៧.០០០ ម៉ែត្រការ៉េ ។
២. ខុនដូ Antilia ប្រទេសឥណ្ឌា
ជាលំនៅដ្ឋានឯកជនថ្លៃបំផុតនៅលើពិភពលោកដែលមានទីតាំងស្ថិតនៅទីក្រុងបុមបៃ ប្រទេសឥណ្ឌា ។ លំនៅស្ថាននេះកំពុងតែត្រូវបានគ្រប់គ្រងដោយ លោក មូកេស អាំបានី (Mukesh Ambani ) ដែលជាអ្នកមានបំផុតនៅក្នុងប្រទេសឥណ្ឌា ហើយត្រូវបានគេដាក់ឈ្មោះតាមកោះទេវកថាមួយនៅមហាសមុទ្រអាត្លង់ទិក មានតម្លៃប្រមាណ២ពាន់លានដុល្លារ ។ អគារទំហំ ៤០០.០០០ ម៉ែត្រការ៉េនេះជាសំណង់ទំនើបដែលមាន២៧ ជាន់ តែវាត្រូវបានបង្កើតឡើងដើម្បីទប់ទល់នឹងការរញ្ជួយដីបាន ។
៣. វីឡា Leopolda ប្រទេសបារាំង
ជាលំនៅឋានឯកជនថ្លៃបំផុតនៅអឺរ៉ុបដែលគេកសាងឡើង ស្ថិតនៅចន្លោះផ្នែក ដ៏មានកិត្យានុភាពបំផុតនៃពិភពលោកពីរ គឺ Monaco និង Nice ដែលមានតម្លៃប្រមាណជា៧៥០លានដុល្លារ ជាលំនៅដ្ឋានដែលថ្លៃបំផុតទី៣ នៅលើពិភពលោក ។ ភាពអស្ចារ្យ និងទាន់សម័យ វាជាអចលនទ្រព្យដ៏ប្រណីតមួយនៅ French Riviera ជាមួយនឹងអតីតកាលដ៏រុងរឿង ហើយដំបូងបង្អស់ជាកម្មសិទ្ធិរបស់ស្តេច Leopold II នៃប្រទេសបែលហ្ស៊ិក ។ ចាប់តាំងពីពេលនោះមក វាត្រូវបានឆ្លងកាត់ការគ្រប់គ្រងដោយម្ចាស់ផ្សេងៗដែលផ្ទេរពីមួយទៅមួយជាបន្តបន្ទាប់ ។
៤. វីឡា Les Cèdres ប្រទេសបារាំង
ជាលំនៅស្ថានសាងសង់ប្រហែលក្នុងឆ្នាំ១៨៣០ ដោយមានទំហំ ៣៥ ហិចតានៅ Saint-Jean-Cap-Ferrat ភាគខាងត្បូងនៃប្រទេសបារាំង ។ ទីនោះជាវិមានប្រណីតមានតម្លៃជាប្រវតិ្តសាស្ត្រ ហើយក៏ធ្លាប់ជាកម្មសិទ្ធិរបស់ស្តេច Leopold II នៃប្រទេសបែល ហ្ស៊ិកដែរ ។ វីឡាប្រណីតនេះមានតម្លៃប្រមាណជា៤៥០លានដុល្លារ ដោយវាមានអាងហែលទឹក ទំហំប៉ុនស្តង់ដាអាងហែលទឹកអូឡាំពិក សាលបាល់បោះដ៏គួរឱ្យភ្ញាក់ផ្អើល និងទេសភាពគួរជាទីមោទនៈ និងមនោរម្យ ។
៥.វិមាន Les Palais Bulles ប្រទេសបារាំង
ជាលំនៅស្ថាន ប្រណីតបំផុតនៅ French Rivieraដែលមានតម្លៃប្រមាណជា ៤២០លានដុល្លារ ។ វិមានប្រណីតនេះត្រូវបានរចនាឡើងដោយស្ថាបត្យករហុងគ្រី គឺ លោក Antti Lovag និងមានបន្ទប់ចំនួនដប់ ដែលតុបតែងដោយវិចិត្រករ សហសម័យផ្សេងៗគ្នា ។ វិមានដ៏ប្រណីតនេះក៏ជាកន្លែងសម្រាប់មហោស្រពធំ៥០០កៅអី បើកចំហរនៅលើទីវាលនៃតំបន់ភ្នំជាមួយនឹងទេសភាពដែលអាចមើលឃើញសមុទ្រមេឌីទែរ៉ាណេ ។ វិមាននេះ គឺជាកម្មសិទ្ធិចុងក្រោយរបស់អ្នកច្នៃម៉ូដជនជាតិបារាំង Pierre Cardin ដែលបានទិញវិមានប្រវត្តិសាស្ត្រក្នុងឆ្នាំ១៩៩២ ជាផ្ទះវិស្សមកាលដ៏ប្រណីត និងជាផ្ទៃខាងក្រោយសម្រាប់ព្រឹត្តិការណ៍ម៉ូដ និងតារាល្បីជាច្រើន ៕ ដោយ ៖ ស ផាត់
ចែករំលែកព័តមាននេះ