រាជធានីភ្នំពេញ ៖ ទន្ទឹមនឹងការបង្ក្រាបដូចភ្លៀងរលឹមរបស់កម្លាំងសមត្ថកិច្ចទៅលើម្ចាស់យានយន្តគ្រប់បប្រភេទដែលចូលចិត្តបំពាក់អំពូលភ្លើង និងឧបករណ៍កែច្នៃខុសលក្ខណៈបច្ចេកទេសនោះជាក់់ស្តែង កម្លាំងក៏បានរកឃើញបងប្អូនអ្នករត់(PassApp)មួយចំនួន ក្នុងនោះ តម្រូវឱ្យពួកគាត់ត្រូវដោះចេញវិញដោយខ្លួនឯង ដើម្បីចូលរួមការការពារគ្រោះថ្នាក់ណាមួយដែលអាចកើតមានឡើងដោយយថាហេតុ ។
យោងតាមផេកស្នងការដ្ឋាននគរបាលរាជធានីភ្នំពេញបានឱ្យដឹងថា កម្លាំងចុះអនុវត្តរឹតបន្តឹងច្បាប់ចរាចរណ៍ផ្លូវគោក ខណ្ឌទួលគោក បានធ្វើការឃាត់ PassApp ដែលបំពាក់ភ្លើងហ្វាកែច្នៃខុសលក្ខណៈបច្ចេកទេសចំនួន០២គ្រឿង នៅយប់ថ្ងៃទី០២ ខែកុម្ភៈ ឆ្នាំ២០២៤ ។
ដោយអនុវត្តតាមបទបញ្ជាដ៏ម៉ឺងម៉ាត់របស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងអធិការដ្ឋាននគរបាលខណ្ឌទួលគោកចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹងបានធ្វើការឃាត់ PassApp បំពាក់ភ្លើងហ្វាកែច្នៃខុសលក្ខណៈបច្ចេកទេស ហើយសមត្ថកិច្ចបានឱ្យម្ចាស់ PassApp ដោះចេញដោយខ្លួនឯង និងធ្វើកិច្ចសន្យាបញ្ឈប់បំពាក់ភ្លើងហ្វា កែច្នៃខុសលក្ខណៈបច្ចេកទេសដោយខុសច្បាប់ ។
សូមរំលឹកដែរថា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាដល់កម្លាំងសមត្ថកិច្ចចុះអនុវត្តរឹតបន្តឹងច្បាប់ចរាចរណ៍ផ្លូវគោកទាំង១៤ខណ្ឌ និងកម្លាំងជំនាញការិយាល័យនគរបាលចរាចរណ៍ផ្លូវគោក ធ្វើការត្រួតពិនិត្យអំពូលភ្លើង ឧបករណ៍ កែច្នៃខុសលក្ខណៈបច្ចេកទេសបង្កឱ្យប៉ះពាល់ដល់សណ្តាប់ធ្នាប់សាធារណៈ ជាពិសេស ប៉ះពាល់ដល់ការធ្វើដំណើររបស់អ្នកដទៃ ។
ចែករំលែកព័តមាននេះ