អាហារ និងភេសជ្ជៈពិតជាមានច្រើនប្រភេទហើយប្លែកៗពីគ្នាដោយនៅក្នុងចំណោមអាហារ និងភេសជ្ជៈទាំងនោះវាមានរសជាតិឆ្ងាញ់ និងមិនឆ្ងាញ់ទៅតាមការនិយម និងទម្លាប់នៃការទទួលទានរបស់ជាតិសាសន៍នីមួយៗ ។ ប៉ុន្តែទោះបីជាយ៉ាងណាក៏ដោយ នៅក្នុងចំណោមអាហារ និងភេសជ្ជៈទាំងនេះមានអាហារ និងភេសជ្ជៈ៥ប្រភេទ ដែលគេចាត់ទុកថា គួរឲ្យខ្ពើមបំផុត ។
តើអាហារ និងភេសជ្ជៈដ៏គួរឲ្យខ្ពើមបំផុតនៅលើពិភពលោកនេះ គឺជាអ្វីខ្លះហើយវាមានប្រភព និងកំពុងតែទទួលទាននៅទីណាខ្លះទៅ ? កម្មវិធីលុយនៃសារព័ត៌មានកោះសន្តិភាពថ្ងៃនេះ សូមណែនាំអាហារ និងភេសជ្ជៈទាំងនេះជូនជាចំណេះដឹងទូទៅដូចខាងក្រោម ៖
១. GOMUTRA ប្រទេសឥណ្ឌា
Gomutra ត្រូវបានគេដឹងថា គឺជាភេសជ្ជៈដែលគ្រឿងផ្សំចម្បងរបស់វា គឺទឹកនោមគោ ។ ភេសជ្ជៈប្រភេទនេះ គឺមានប្រភពនៅក្នុងប្រទេសឥណ្ឌាជាយូររហូតដល់រាប់ពាន់ឆ្នាំហើយ ជាធម្មតាវាត្រូវបានប្រើប្រាស់សម្រាប់គោលបំណងព្យាបាលជំងឺ ។
ភេសជ្ជៈដែលផ្សំដោយទឹកនោមគោនេះត្រូវបានចាត់ទុកថា មានប្រយោជន៍ ជាពិសេស គឺទឹកនោមរបស់គោដែលកំពុងផើម ។ ទឹកនោមគោបែបនេះត្រូវបានគេចាត់ទុកថាជា ភេសជ្ជៈដែលសម្បូរដោយអ័រម៉ូន និងសារធាតុរ៉ែ ។ Gomutra ត្រូវបានគេអះអាងថា អាចព្យាបាលជំងឺស្បែករបកក្រហម ជំងឺឃ្លង់ គ្រុនក្តៅ ថ្លើម និងមហារីកផងដែរ ។
២. ស្រា TTONGSUL នៅប្រទេសកូរ៉េខាងត្បូង
Ttongsul ជាឱសថបុរាណកូរ៉េ ដែលមានជាតិអាល់កុល៩ ដឺក្រេ ។ ស្រាពិសេសនេះ ត្រូវបានគេដឹងថា វាផ្សំឡើងដោយស្រាបិតពីអង្ករ ដែលគេត្រាំលាមករបស់កុមារដែលមានអាយុចន្លោះពី៤ ទៅ៧ឆ្នាំលាយទឹកហើយដាក់ទុកក្នុងទូរទឹកកករយៈពេលពី៣ទៅ៤ថ្ងៃ ។ ស្រាប្រភេទនេះត្រូវបានគេដឹងថា ថ្វីត្បិតតែវាមានក្លិនស្អុយខ្លាំងក៏ពិតមែន ប៉ុន្តែវាមានលក្ខណៈសម្បត្តិប្រឆាំងការរលាក និងបំបាត់ការឈឺចាប់ ព្រមទាំងបង្កើនរសជាតិ ។ វាក៏ត្រូវបានគេជឿថា ជាភេសជ្ជៈដែលជួយកំចាត់បាក់តេរីអាក្រក់បង្កើតបាក់តេរីល្អ មានប្រយោជន៍នៅក្នុងខ្លួនមនុស្ស ។
៣. ស្រាកណ្ដុរស្រវឹង ក្វាងចូវ ប្រទេសចិន
អាចជាអាហារហើយក៏អាចជាភេសជ្ជៈពីព្រោះស្រានេះ គឺគេយកកូនកណ្តុរតូចៗដែលទើបតែកើតមិនទាន់ដុះរោម មិនទាន់បើកភ្នែកយកមកត្រាំហើយទុករហូតដល់មួយឆ្នាំទើបយកមកពិសា ។ ស្រាកណ្ដុរស្រវឹងនេះជាថ្នាំប៉ូវកម្លាំង និងជំនួយសុខភាពសម្រាប់អ្នកជំងឺហឺត និងជំងឺថ្លើមជាដើម ។ ស្រាកណ្ដុរស្រវឹងនេះភាគច្រើនគេផលិតនៅភាគខាងត្បូងប្រទេសចិន ប៉ុន្តែគេក៏ជឿជាក់ថា មានការពេញនិយមខ្លះដែរនៅកូរ៉េ ។
៤. ខួរក្បាលស្វា ប្រទេសចិនបុរាណ
អាហារនេះ គឺធ្លាប់ឃើញគេថតនៅក្នុងភាពយន្ត ប៉ុន្តែគេជឿជាក់ថា វាមាននៅចិន និងឥណ្ឌា ។ អាហារទាំងនេះគេអះអាងថា គឺចាប់ស្វាដាក់នៅក្នុងប្រអប់ហើយគេចោះយកតែខួរស្រស់ៗទទួលទាន ។
៥. ស៊ុតស្ងោរទឹកនោមក្មេងបរិសុទ្ធនៅប្រទេសចិន
ទឹកនោមកុមារាត្រូវបានប្រមូលពីតាមសាលារៀន និងផ្សារនានាជុំវិញទីក្រុង ហើយត្រូវបានគេយកទៅដាំហើយយកស៊ុតទៅស្ងោនឹងទឹកនោមនោះរហូតដល់រីង ។ ស៊ុតត្រូវបានគេបកហើយបន្តស្ងោររយៈពេលជាច្រើនម៉ោង ដើម្បីឱ្យទឹកនោមត្រាំចូលជាតិក្នុងស៊ុត ។ នៅពេលទទួលទានគេអះអាងថា ស៊ុតនេះមានក្លិនទឹកនោមខ្លាំង ប៉ុន្តែរសជាតិត្រូវបានពិពណ៌នាថា ឆ្ងាញ់ ប្រៃ និងញៀន ។ ស៊ុតស្ងោរក្នុងទឹកនោមរបស់កុមារា អាយុក្រោមដប់ឆ្នាំនេះត្រូវបានគេដាក់ឈ្មោះថា «តុងហ្ស៊ីដាន» ។
សូមជម្រាបថា នេះជាព័ត៌មានដើម្បីជាការយល់ដឹងប៉ុណ្ណោះ វាមិនមានការគាំទ្រផ្នែក វេជ្ជសាស្ត្រទេ។ ដូច្នេះមិនត្រូវយកវាជាក្បួនព្យាបាលជំងឺឡើយ ។ សូមទៅរកគ្រូពេទ្យ បើសិនជាអ្នកមានជំងឺ ៕
ចែករំលែកព័តមាននេះ