សម្រាប់យើងជាពលរដ្ឋដែលមានប្រាក់ចំណូលជាមធ្យមត្រឹមតែ២០០០ដុល្លារនៅក្នុងមួយឆ្នាំ ការទទួលទានអាហារពេលល្ងាចមួយពេលថ្លៃចាប់ពីជិត១.០០០ដុល្លារទៅ២.២០០ដុល្លារ គឺពិតជាថ្លៃខ្លាំងណាស់។ ប៉ុន្តែកម្ពុជា ក៏មានអ្នកដែលមានលទ្ធភាពទទួលទានអាហារមានតម្លៃទាំងនេះ
សម្រាប់យើងជាពលរដ្ឋដែលមានប្រាក់ចំណូលជាមធ្យមត្រឹមតែ២០០០ដុល្លារនៅក្នុងមួយឆ្នាំ ការទទួលទានអាហារពេលល្ងាចមួយពេលថ្លៃចាប់ពីជិត១.០០០ដុល្លារទៅ២.២០០ដុល្លារ គឺពិតជាថ្លៃខ្លាំងណាស់។ ប៉ុន្តែកម្ពុជា ក៏មានអ្នកដែលមានលទ្ធភាពទទួលទានអាហារមានតម្លៃទាំងនេះ ក៏មិនតិចនាក់នោះដែរ ។
តើការទទួលទានអាហារពេលល្ងាចដែលមានតម្លៃចាប់ពី១.០០០ដុល្លារ ទៅ២.២០០ដុល្លារ នៅក្នុងមួយពេល មានបម្រើសេវាកម្មនេះនៅទីណា?
កម្មវិធីលុយនៃសារព័ត៌មានកោះសន្តិភាព សូមជូនឈ្មោះភោជនីដ្ឋានចំនួន៥ សម្រាប់ជាជម្រើសនៅក្នុងការស្វែងយល់ ហើយប្រសិនបើមានលទ្ធភាពក៏អាចសាកល្បងទទួលទានអាហារនៅភោជនីយដ្ឋានដ៏ប្រណីតទាំង៥នេះបានដែរ នៅពេលទៅដើរលេងនៅប្រទេសទាំងនេះ ក្នុងពិភពលោក។
១- ភោជនីយដ្ឋាន Alchemist ៖
ស្ថិតនៅក្នុងទីក្រុងខូបផេនហេហ្គេន ប្រទេសដាណឺម៉ាក។ វាគឺជាភោជនីយដ្ឋានដ៏ប្រណីតមួយកន្លែង ដែលមានតែ៥បន្ទប់តែប៉ុណ្ណោះ ហើយបន្ទប់នីមួយៗអាចទទួលភ្ញៀវសរុប១៥នាក់។
ភោជនីយដ្ឋាននេះ ត្រូវបានគេសន្មត់ថា ជាភោជនីយដ្ឋានដ៏ប្រណីត និងមានតម្លៃថ្លៃជាងគេ ដោយសារភ្ញៀវម្នាក់ត្រូវចំណាយអស់រហូតដល់ទៅ២.២០០ដុល្លារ ហើយពួកគេអាចមានជម្រើសនៅក្នុងការទទួលទានអាហារចំនួន៥០មុខម្ហូប។ ភោជនីយដ្ឋាននេះ មានទីតាំងនៅក្នុងអគារដ៏ប្រណីត ដែលមានបរិយាកាសគួរជាទីមោទនៈ សម្រាប់អ្នកដែលមានលុយ និងមានអំណាច។
២- ភោជនីយដ្ឋាន Sublimotion នៅប្រទេសអេស្ប៉ាញ
ភោជនីយដ្ឋាននេះ ត្រូវបានគេចាត់ទុកជាភោជនីយដ្ឋានដែលថ្លៃបំផុតលំដាប់ថ្នាក់ទី២ នៅលើពិភពលោក ដោយសារភ្ញៀវអាចទទួលទានអាហារថ្ងៃត្រង់ ដែលមានបញ្ជីកំពូលមុខម្ហូបដ៏មានឱជារស ចំនួន១២មុខម្ហូប។
តែភ្ញៀវអាចទទួលទាននៅក្នុងតម្លៃប្រមាណជា ១.៨០០ ដុល្លារ ក្នុងមួយពេល ។ ភោជនីយដ្ឋាននេះ វាមានតម្លៃថ្លៃបែបនេះ ដោយសារតែបន្ទប់នីមួយៗ គឺបំពាក់ដោយឧបករណ៍ទំនើបៗ និងមានប្រព័ន្ធសំឡេងដ៏ល្អបំផុត។
៣- ភោជនីយដ្ឋាន The French Laundry ស្ថិតនៅក្នុងសហរដ្ឋអាមេរិក
ជាភោជនីយដ្ឋានដែលមានទីតាំងកសាងឡើងពីថ្មទន្លេ និងឈើកម្រ ហើយត្រូវបានគេចាត់ទុកថា ជាភោជនីយដ្ឋានលំដាប់ពិភពលោកទី៣ ។
ភោជនីយដ្ឋាននេះ មានទីតាំងស្ថិតនៅភាគខាងជើងនៃជ្រលងភ្នំណាប៉ា ហើយមុខម្ហូបនីមួយៗនៅក្នុងភោជនីយដ្ឋាននេះ គឺសុទ្ធតែជារបស់ប្រណីតដែលមានការសម្រិតសម្រាំងយ៉ាងត្រឹមត្រូវហ្មត់ចត់បំផុត ។ ដើម្បីទទួលទានអាហារនៅហាងនេះ គឺអាចនឹងត្រូវចំណាយចាប់ពី ៥៥០ដុល្លារ ទៅ១.២០០ដុល្លារ ។
៤- ភោជនីយដ្ឋាន Piazza Duomo ស្ថិតនៅប្រទេសអ៊ីតាលី
ភោជនីយដ្ឋាននេះ មានបម្រើសេវាកម្មហូបចុកតាមបញ្ជីមុខម្ហូបដែលមានតម្លៃ និងរសជាតិសមរម្យទេ ប៉ុន្តែសេវាកម្ម គឺលំដាប់កំពូល ។
ការដែលគេបានជ្រើសរើសភោជនីយដ្ឋាននេះ ជាភោជនីយដ្ឋានលំដាប់ពិភពលោកបែបនេះ ដោយសារតែនៅក្នុងបញ្ជីមុខម្ហួបទាំងនេះ មានមុខម្ហូប១០មុខ ដែលមានតម្លៃថ្លៃ ដោយមួយពេលម្នាក់ គឺត្រូវចំណាយដល់ទៅ១.១០០ដុល្លារ។
៥- ភោជនីយដ្ឋានម៉ាសា ស្ថិតនៅក្រុងញ៉ូវយ៉ក សហរដ្ឋអាមេរិក
ភោជនីយដ្ឋានល្អបំផុត និងថ្លៃជាងគេលំដាប់ទី៥ នៅលើពិភពលោក គឺភោជនីដ្ឋាន ម៉ាសា ដោយនៅក្នុងបញ្ជីម្ហូបមានមុខម្ហូប២៦មុខ ដែលតម្រូវឱ្យភ្ញៀវត្រូវចំណាយដល់ទៅ ៩៥០ដុល្លារ ដើម្បីទទួលទានអាហារនៅភោជនីយដ្ឋាននេះមួយពេល ។
ភោជនីយដ្ឋាននេះ គឺជាភោជនីយដ្ឋានជប៉ុនមួយ ដែលមានទីតាំងនៅក្នុងទីក្រុងញ៉ូវយ៉ក សហរដ្ឋអាមេរិក ។
អត្ថបទដោយ ៖ ស ផាត់
ចែករំលែកព័តមាននេះ