ADផ្ទាំងផ្សព្វផ្សាយពាណិជ្ជកម្ម

Picture

ទីផ្សារ​ដំឡូង​មី​មាន​តម្លៃ មន្ត្រី​កសិកម្មផ្តល់​បច្ចេកទេស​ដើម្បី​ទទួល​បាន​ទិន្នផល​ខ្ពស់

4 ខែ មុន
  • ស្ទឹងត្រែង

ខេត្តស្ទឹងត្រែង​៖​មន្ត្រី​ជំនាញ​កសិកម្ម​ជំរុញ ឱ្យ​ប្រជា​សហគមន៍​រួម​គ្នា​ផ្តល់​បច្ចេកទេស​និង​ជួយ​

ខេត្តស្ទឹងត្រែង​៖​មន្ត្រី​ជំនាញ​កសិកម្ម​ជំរុញ ឱ្យ​ប្រជា​សហគមន៍​រួម​គ្នា​ផ្តល់​បច្ចេកទេស​និង​ជួយ​ចែករំលែក​ពូជ​ដំឡូង​មី​ជូន​គ្នា​ទៅ​វិញ​ទៅ​មក ដើម្បី​ពង្រឹងសមត្ថភាព មាន​លទ្ធភាព​សម្រាប់ សហគមន៍​ឈាន​ទៅ​លើកកម្ពស់​ជីវភាព​រស់នៅ ដែល​ទទួល​បាន​ពី​ការ​ដាំ​ដុះ​ដំណាំ​កសិកម្ម​នៅ​មូលដ្ឋាន ។

ជួប​ប្រជា​សហគមន៍​កសិកម្ម​សាមគ្គី​អភិវឌ្ឍ​ចំការលើ​នៅ​ភូមិ​រំដេង ឃុំ​ចំការលើ​ស្រុក​ថា​ឡា​បរិ​វ៉ា​ត់​ខេត្ត​ស្ទឹងត្រែង នា​ថ្មី​ៗ​នេះ លោក​ទុំ នី​រ៉ូ ប្រធានមន្ទីរ​កសិកម្ម​រុក្ខា​ប្រមាញ់​និង​នេសាទ​បាន​បញ្ជាក់​ថា​នៅ​ឆ្នាំ​២០២៤​ប្រជាកសិករ​បាន​នាំ​គ្នា​ប្រឹងប្រែង​ដាំ​ដុះ​បន្ថែម​នូវ​ស្វាយចន្ទីរ ស្វាយកែវ​ល្មៀត និង​ដំឡូង​មី​ច្រើន​ជាងគេ ហើយ​ដំណាំ​ទាំង​៣​ប្រភេទ​នេះ​កំពុង​ដើរតួ​នាទី​សំខាន់​នៅ​ខេត្តស្ទឹងត្រែង ដើម្បី​ឈាន​ទៅ​បង្កើត​សហគមន៍​បន្ថែម​សម្រាប់​ពង្រឹង​ផ្នែក​ទីផ្សារ ក្នុង​ការ​ទិញ​លក់​ផលិតកម្ម ។

លោក​បន្ត​ថា​បច្ចុប្បន្ន​នេះ​រាជរ​ដ្ឋាភិ​បាល ក៍​ដូច​ជា​អាជ្ញាធរ​ពាក់ព័ន្ធ​នៅ​ក្នុង​ខេត្ត បាន​ជួយ​ដល់​កសិករ តាំងពី​ការ​ផ្តល់​ដី​កសិកម្ម ការ​ផ្តល់​ពូជ ការ​បណ្តុះបណ្តាល​បច្ចេកទេស​ដាំ​ដុះ ដើម្បី​បង្កើន​ជីវភាព​រស់នៅ​របស់​ប្រជាពលរដ្ឋ​ឱ្យ​កាន់តែ​បាន​ធូរធារ​ឡើង ។​លោក​បន្ថែម​ថា​រាជរដ្ឋាភិបាល​មាន​មន្ទីរ​កសិកម្ម​ជា​សេនាធិ​ការ ដើម្បី​ជួយ​បងប្អូន បើ​ខ្វះ​ចំណេះដឹង​បច្ចេកទេស​យើង​បណ្តុះបណ្តាល​បងប្អូន ឬ​យក​ទៅ​ទស្សនកិច្ច​សិក្សា ហើយ​បើ​មាន​លទ្ធភាព​ជាមួយ​អង្គការ​នៅ​ពេល​នេះ មានពូជ​មានអី​ទៀត យើង​ផ្តល់​ជូន​បងប្អូន​យើង​បន្ថែម​ដើម្បី​ឱ្យ​បងប្អូន​រឹង​ដៃ​រឹង​ជើង​ចេះ​ធ្វើការងារ​ជា​ក្រុម បង្កើត​នូវ​ផលដំណាំរបស់​ខ្លួន​។

លោក​ប្រុ​ញ​ ពិសី ប្រធាន​សហគមន៍​កសិកម្ម សាមគ្គី​អភិវឌ្ឍ​ចំការលើ បាន​បញ្ជាក់​ថា​បច្ចុប្បន្ន​ប្រជា​កសិករ​មាន​ជីវភាព​ធូរធារ​ច្រើន បន្ទាប់​ពី​បាន​ដាំ​ដុះ​ដំឡូង​មី ទៅ​តាម​បច្ចេកទេស ព្រោះ​នៅ​ពេល​ប្រមូល​ផល ក្នុង​មួយ​ហិកតា​ទទួល​បាន​ទិន្នផល ចាប់ពី​២០​តោន​ឡើង​ទៅ ចាត់ជា​ចំណាត់ថ្នាក់​ល្អ​។
លោក​បន្ត​ថា កសិករ​នៅ​ភូមិ​ឃុំ​យើង​ទាំងមូល​ដែល​មាន​ផ្ទៃដី​សេសសល់ យើង​ចង់ឱ្យ​គាត់​ដាំ​ដុះ​បន្ថែម​ទៀត ដើម្បី​កុំឱ្យ​ពួក​គាត់​ទុក​ដី​ទំនេ​ចោ​យ​ហើយ​ទៅ​ចំណាកស្រុក ធ្វើ​ការងារ​នៅ​ក្រៅប្រទេស ឬក៍​ទៅ​ធ្វើ​ជា​កម្មករ​គេ ។

លោកស្រី សិត សាយ កសិករ​នៅ​ភូមិ​ឃុំ​ចំការលើ​នេះ​ដែរ​បាន​បញ្ជាក់​ថា ប៉ុន្មាន​ឆ្នាំ​ចុង​ក្រោយ​នេះ​កសិករ​យើង​យល់​ដឹង​ច្រើន និង​នាំ​គ្នា​ប្រឹងប្រែង​ធ្វើ​ការងារ​រៀង​ៗ​ខ្លួន មិន​ទុក​ផ្ទៃដី​ឱ្យ​ទំនេរ​ដូច​កាលពី​កន្លង​មក​ទេ គឺ​នាំ​គ្នា​ដាំដំឡូង​មី ព្រោះ​មាន​តម្លៃ​ទីផ្សារ​ល្អ ហើយ​អាជ្ញាធរ​ខេត្ត ស្រុក​បាន​សាង
សង់​ផ្លូវ ស្ពាន​បាន​ល្អ ស្រួល​ឈ្មួញ​មក​ទិញ​ដល់​ចំការ​តែ​ម្តង​។

លោកស្រី​បន្ត​ថា​នេះ​ជា​កត្តារួម​ផ្សំ​បាន​ជំរុញ​ឱ្យ​ប្រជា​កសិករ​គ្រប់​រូប​ខិតខំ​ដាំ​ដុះ​មិន​មាន​ពេលទំនេរ​ទេ ព្រោះ​មាន​ដី មានពូជ គោ​យន្ត​ក៍​មាន អាច​បំរើ​ការងារ​កសិកម្ម​បាន​ទៅ​តាម​បំណង តែបើ​បងប្អូន​ណា​ក្រីក្រ​គឺ​មាន​តែ​អ្នក​ខ្ជិល​មិន​ធ្វើ​អ្វី​តែ​ប៉ុណ្ណោះ ។

សូម​បញ្ចា​ក់ថា​ ​ដំណាំ​ដំឡូង​មី​នៅ​ខេត្តស្ទឹងត្រែង​ឆ្នាំ​២០២៤​នេះ ប្រជា​កសិករ​ដាំ​ដុះ​បាន​ជាង​៤​ម៉ី​ន​ហិច​តា ចំណែក​ទិន្នផល​លក់​បាន​តម្លៃ​ខ្ពស់​ជាង​ឆ្នាំ​២០២២ ដំឡូង​ស្រស់​លក់​បាន​៤២០​រៀល ស្ងួត​៧៨០​រៀល​ក្នុង​មួយ​គីឡូក្រាម ។

​ជាមួយ​គ្នា​នេះ​មន្ទីរ​កសិកម្ម​បង្កើត​សហគមន៍​ដំឡូង​មី​បាន​ចំនួន​២ និង​សហគមន៍​ចន្ទីរ​បាន​ចំនួន​១៣​សហគមន៍ ដែល​កំពុង​ដំណើរការ​ទៅ​បាន​ល្អ​ក្នុង​ពេល​សព្វ​ថ្ងៃនេះ ៕

អត្ថបទសរសេរ ដោយ

កែសម្រួលដោយ