ខេត្តក្រចេះ៖ ប្រជាពលរដ្ឋជិត២០០នាក់ បានផ្ទុះប្រតិកម្មនឹងកាសែតអនឡាញ៣អង្គភាពដែលបានផ្សាយចោទប្រកាន់ពួកគាត់ចំនួន៥នាក់ថា រស់នៅអនាធិបតេយ្យ និងជាមេខ្លោងកាប់ទន្ទ្រានដីព្រៃរបស់រដ្ឋ ។ ពួកគាត់ដែលមកពីភូមិត្រពាំងឈូក ឃុំឃ្សឹម ស្រុកស្នួល បានលើកគ្នាទៅដាក់បណ្ដឹងនៅសាលាដំបូងខេត្ត…
ខេត្តក្រចេះ៖ ប្រជាពលរដ្ឋជិត២០០នាក់ បានផ្ទុះប្រតិកម្មនឹងកាសែតអនឡាញ៣អង្គភាពដែលបានផ្សាយចោទប្រកាន់ពួកគាត់ចំនួន៥នាក់ថា រស់នៅអនាធិបតេយ្យ និងជាមេខ្លោងកាប់ទន្ទ្រានដីព្រៃរបស់រដ្ឋ ។ ពួកគាត់ដែលមកពីភូមិត្រពាំងឈូក ឃុំឃ្សឹម ស្រុកស្នួល បានលើកគ្នាទៅដាក់បណ្ដឹងនៅសាលាដំបូងខេត្ត កាលពីព្រឹកថ្ងៃទី១៥ ខែមករា ឆ្នាំ២០២៤កន្លងទៅ ដោយនៅក្នុងដៃមានកាន់ស្លាកអង្គភាពព័ត៌មានអនឡាញទាំង៣នោះផង ។
ពួកគាត់លើកឡើងថា ការលើកគ្នាមកនេះគឺគោលបំណងដាក់ពាក្យប្តឹងនៅតុលាការសុំឲ្យសារព័ត៌មានទាំង៣អង្គភាពចុះផ្សាយបំភ្លឺឡើងវិញព្រោះការចុះផ្សាយរបស់អង្គភាពទាំង៣នេះ គឺបំភ្លៃការពិត ។ ប្រជាពលរដ្ឋទាំងនោះបន្តថា អង្គភាពសារព័ត៌មានទាំង៣នោះ បានចុះផ្សាយចោទប្រកាន់ពួកគាត់ដោយគ្មានមូលដ្ឋានច្បាស់លាស់ថា ពួកគាត់ចំនួន៥នាក់ជាមេខ្លោងញុះញង់ឲ្យប្រជាពលរដ្ឋមកកាប់ទន្ទ្រានយកដីគម្របព្រៃរបស់រដ្ឋ ដែលមានព្រះរាជក្រឹត្យចេញឲ្យក្រសួងបរិស្ថានគ្រប់គ្រងនៅដែនព្រៃកែវសីមា ។
ពួកគាត់រស់នៅមានមេភូមិ មេឃុំ មានច្បាប់ទម្លាប់ត្រឹមត្រូវ ព្រមទាំងមានសៀវភៅស្នាក់នៅ ហើយដីដែលគាត់កំពុងរស់នៅនោះ ចាប់តាំងពីឆ្នាំ២០១៤មកម្ល៉េះ ហើយដីមានប្លង់ភូមិ ឃុំត្រឹមត្រូវអាចដាក់បញ្ចាំនៅធនាគារបានទៀតផង ។ ពួកគាត់បញ្ជាក់ថា អង្គភាពសារព័ត៌មានដែលចុះផ្សាយមិនពិតនោះរួមមាន គេហទំព័ររស្មីឆ្នាំងមាស គេហទំព័ររដ្ឋារស្មីស្ទឹងត្រង់ និង Flash news ដែលបានផ្សាយថាប្រជា ពលរដ្ឋរស់នៅអនាធិបតេយ្យ ថែមទាំងញុះញង់ឲ្យប្រជាពលរដ្ឋស្អប់អាជ្ញាធរ ។ មិនត្រឹមតែប៉ុណ្ណោះ ថែមទាំងចោទថា ពួកគាត់កាប់បំផ្លាញព្រៃឈើ និងចោទថា លោកអភិបាលស្រុកស្នួលជាអ្នកបើកភ្លើងខៀវឲ្យប្រជាពលរដ្ឋកាប់ទន្ទ្រានដីរដ្ឋយកធ្វើជាសម្បត្តិផ្ទាល់ខ្លួន ។
រជាពលរដ្ឋទាំងនោះ សំណូមពរដល់ឯកឧត្តមរដ្ឋមន្ត្រីក្រសួងព័ត៌មាន សូមជួយអន្តរាគមន៍ និងពិនិត្យវែកមុខរកអង្គភាពទាំង៣នោះ ឲ្យចុះផ្សាយបកស្រាយរឿងដែលបានចុះផ្សាយចោទប្រកាន់ពួកគាត់ទាំង៥នាក់ និងអាជ្ញាធរផងដែរ ៕
ចែករំលែកព័តមាននេះ