ខេត្តបាត់ដំបង ៖ បុរសម្នាក់ដែលគេអះអាងថា ជាតន្ត្រីករ (ដៃអក)ផង បានស្លា.ប់ភ្លាមៗនៅកន្លែងកើតហេតុ ក្រោយពីត្រឡប់មកពីប្រគំតន្ត្រី ហើយជិះម៉ូតូបុកគំនរបាវស្រូវ ដែលគេរៀបនៅលើចិញ្ចើមថ្នល់ កាលពីវេលាម៉ោង៨ និង៤០នាទីយប់ថ្ងៃទី១៤ មករា នៅលើកំណាត់ផ្លូវហាយវេ ស្ថិតត្រង់ចំណុចភូមិបឹងរាំង សង្កាត់អូរម៉ាល់ ក្រុងបាត់ដំបង។
ប្រភពព័ត៌មានបានឲ្យដឹងថា ជនរងគ្រោះឈ្មោះ ថា វិច ភេទប្រុស អាយុ៣៥ឆ្នាំ ជាតន្ត្រីករ(ដៃអក) ប្រចាំវង់តន្ត្រី «ភ្នំរំសាយសក់» ។ ប្រភពដដែលបានបញ្ជាក់ថា ជនរងគ្រោះបានស្លាប់ដោយសារជិះម៉ូតូបុកគំនរបាវស្រូវនៅពេលយប់ ដែលម្ចាស់ស្រូវបានដឹកយកទៅគរទុកនៅក្បែរចិញ្ចើមថ្នល់ហាយវេ ត្រង់ចំណុចកើតហេតុខាងលើ ដើម្បីរងចាំរថយន្តទៅដឹក ។
អ្នកតន្ត្រីធ្លាប់រួបអាជីពបាននិយាយថា នៅថ្ងៃកើតហេតុ តន្ត្រីករដៃអករូបនេះ ជាមួយនឹងក្រុមវង់តន្ត្រីរបស់ខ្លួន ត្រូវគេជួលឲ្យទៅប្រគំក្នុងកម្មវិធីគេ នៅស្រុកថ្មគោល។ ប្រភពដដែលបានប្រាប់ថា ក្រោយបញ្ចប់កម្មវិធី តន្ត្រីករូបនេះរូបនេះបានផឹកស៊ីជុំគ្នារហូតដល់យប់បន្តិចទើបត្រឡប់មកផ្ទះវិញ ដែលទំនងជាស្រវឹងបន្តិចដែរ។ លុះជិះតាមដងផ្លូវហាយវេ ដល់ត្រង់ចំណុចកើតហេតុ ក៏បុកគំនរបាវស្រូវដួលបោកស្លាប់តែម្ដង។
សមត្ថកិច្ចបានចុះទៅកាន់កន្លែងកើតហេតុ ដើម្បីពិនិត្យសាកសព និងគំនរបាវស្រូវ ដែលម្ចាស់បានដឹកយកទៅគរទុកក្បែរចិញ្ចើមថ្នល់ ដែលនាំឲ្យមានគ្រោះថ្នាក់។ សមត្ថកិច្ចបាននិយាយថា បើពិនិត្យកន្លែងកើហេតុ នៅទីនោះមានស្ថានភាពងងិតគ្មានភ្លើងបំភ្លឺផង ស្របពេលជនរងគ្រោះ ទំនងជាស្រវឹងស្រាផង ទើបជិះបុកគំនរបាវស្រូវរហូតដូលស្លាប់បែបនេះ។
នេះមិនមែនជាលើកទី១ទេ ដែលអ្នកដំណើរជិះបុកគំនរបាវស្រូវនៅលើចិញ្ចើមថ្នាក់ ឬ ជិះរថយន្តចតលើចិញ្ចើមថ្នល់ឡើងស្រូវ។ កាលពីប៉ុន្មានខែមុននេះ លោក ស សាម៉ុន មេប៉ុស្ដ៏នគរបាល ឃុំកំពង់ព្រៀង ស្រុកសង្កែ បានជិះបុកគូទរថយន្តយក្សមួយគ្រឿងនៅពេលយប់ បណ្ដាលឲ្យដូលបោកក្បាលស្លាប់ភ្លាមៗ នៅក្រោមគូទរថយន្ត ខណៈរថយន្តនោះកំពុងចតឡើងស្រូវនៅលើចិញ្ចើមថ្នល់។
ដូច្នេះ អាជ្ញាធរ ឬសមត្ថកិច្ចមូលដ្ឋាន គួរតែមានវិធានចំពោះរថយន្តដឹកស្រូវចតលើចិញ្ចើមថ្នល់ ឬ ការដឹកបាវស្រូវយកទៅគរទុកនៅលើចិញ្ចើមថ្នល់ ដែលបង្កឲ្យមានគ្រោះថ្នាក់ដល់អ្នកដំណើរ៕
ចែករំលែកព័តមាននេះ