រាជធានីភ្នំពេញ ៖ តារាសម្តែងលោក កាវីន បានបង្ហូរទឹកភ្នែក ក្រោយលោកនៅតែនឹករលឹកដល់ម្តាយដែលជាព្រះរស់ ទោះបីជាម្តាយលោកបានលាចាកគ្មានថ្ងៃនឹងវិលត្រឡប់វិញក៏ដោយ។ ជាការពិតណាស់ តារាសម្តែងរូបនេះ កាលពីកន្លងទៅ បានលះបង់គ្រប់បែបយ៉ាងក្នុងការជួយដល់ម្តាយ តែអ្វីៗមិនអាចស្ថិតថេរនោះទេ ការកើតចាស់ឈឺស្លា.ប់ជាច្បាប់ធម្មជាតិ គ្មានអ្វីអាចប្រកែកបានឡើយ។
នៅក្នុងថ្ងៃកំណើតខ្លួនឯងនោះ តារាសម្តែងលោក កាវីន បានបង្ហូរទឹក ហើយនិយាយទៅកាន់អ្នកម្តាយដោយភាពខ្សឹបខ្សួលថា «រាល់ឆ្នាំ ម្តាយជាអ្នកជូនពរ តែឆ្នាំនេះ ខ្លួនជាអ្នកជូនពរម្តាយវិញ»។
លោកមានការនឹករលឹក ព្រោះថា ក្រោយអត់ពីឪពុកនោះ ម្តាយនេះហើយដែលបានដើរតួរជាម្តាយផង និងជាឪពុកផង ពោលគឺតារាសម្តែងលោក កាវីន កំព្រាឪពុកតាំងពីលោកនៅក្មេងខ្ចីមកម្ល៉េះ ហើយម្តាយ គឺជាអ្នករ៉ាប់រងគ្រប់សព្វបែបយ៉ាង ក្នុងការចិញ្ចឹមតារាសម្តែងរូបនេះ រហូតធំធាត់មកដល់សព្វថ្ងៃ។
ទន្ទឹមនឹងនោះ តារាសម្តែងរូបនេះ ក៏បានបង្ហាះសារនៅលើបណ្តាញសង្គមរបស់លោកថា «រីករាយថ្ងៃកំណើតរបស់ខ្ញុំ ១០.មករា.២០២៤ សូមឲ្យសំណេរបានដឹងលឺដល់ម៉ាក់ខ្ញុំ ហ៊ិន ដាន។ ជាដំបូង ខ្ញុំសូមអរគុណ និងជូនពរចំពោះលោកអ្នកមានគុណទាំងពីររបស់ខ្ញុំ គឺប៉ានិងម៉ាក់ ជាពិសេសម៉ាក់ទីស្រលាញ់ ជាម៉ាក់ដ៏កម្សត់របស់កូន ចាប់តាំងពីប៉ាបានចែកឋានទៅចោលពួកយើងទៅ ពួកយើងរស់នៅក្នុងភាពក្រលំបាកវេទនា តែកូនទទួលបានភាពកក់ក្តៅពីម៉ាក់ខ្លាំងណាស់ ក្នុងរយៈពេល២៩ឆ្នាំមកនេះ»។
តារាសម្តែងរូបនេះ បានបង្ហាះសារបន្តថា «ម៉ាក់ គឺជាវីរៈនារីដ៏អង់អាចក្លាហាន សែនអស្ចារ្យគួរអោយគោរពកោតសរសើរណាស់សម្រាប់កូន ម៉ាក់ស៊ូមិនយកគ្រួសារទៀតទេ ម៉ាក់ដើរតួរជាឪពុកផង ម្តាយផង ជម្នះគ្រប់ឧបសគ្គដើម្បីកូន ម៉ាក់ខំគ្រប់បែបយ៉ាង ទោះស្ថានភាពពួកយើងពេលនោះ ស្ថិតក្រោមភាពក្រលំបាកខ្លាំងបែបណា តែម៉ាក់ខំតស៊ូណាស់ដើម្បីចិញ្ចឹមបីបាច់ថ្នាក់ថ្នមផ្តល់ភាពកក់ក្តៅឲ្យកូន តែងតែមេត្តាដល់កូន អប់រំទូន្មាន ប្រៀនប្រដៅកូនបានយ៉ាងល្អបំផុត»។
តារាសម្តែងរូបនេះ បានបង្ហាះសារបន្តថា «ឆ្នាំ១៩៩៥ ប៉ាបានចែកឋានទៅចោលពួកយើង តែពេលនេះចុងឆ្នាំ២០២៣ ម៉ាក់ក៏ចែកឋានទៅចោលកូនទៀត បន្សល់ទុកឈ្មោះឲ្យកូនជាកូនកំព្រា កូនសែននឹករលឹកដល់ម៉ាក់ជាពន់ពេកណាម៉ាក់ ព្រោះម៉ាក់តែងតែបារម្ភ តែងតែសន្ដោសប្រណី ម៉ាក់ខ្លាចកូនឯកា។ តែពេលនេះ ក៏ពិតជាឯការពិតមែនណាម៉ាក់ សម្តីពេលម៉ាក់នៅរស់និយាយត្រូវទាំងអស់ តែកូនសន្យាប្រាប់ម៉ាក់ថា កូននឹងធ្វើខ្លួនឯងឲ្យរឹងមាំ ខំរស់បន្តដើម្បីម៉ាក់ណា ធ្វើជាមនុស្សល្អទៀងត្រង់ រស់នៅដោយកិត្តិយស ចែករំលែកក្តីស្រលាញ់ជូនមនុស្សជុំវិញខ្លួនណាម៉ាក់ ដូចម៉ាក់បានប្រដៅកូនចឹង»។
តារាសម្តែងរូបនេះ បានបង្ហាះសារបន្តទៀតថា «កូនសូមជូនជាបុណ្យកុសលជូនដល់ម៉ាក់គ្រប់ពេលដែលកូនបានធ្វើ សូមផ្សងជួបម៉ាក់គ្រប់ៗជាតិណាម៉ាក់ សូមឲ្យកូនមានសេចក្តីសុខណាម៉ាក់ កូនស្រលាញ់ម៉ាក់ រហូតស្រលាញ់ដូចកាលម៉ាក់នៅរស់ចឹងណាម៉ាក់ ហើយក៏សូមអរគុណដល់មនុស្សជុំវិញខ្លួនខ្ញុំគ្រប់រូប ដែលស្រលាញ់ចូលចិត្តរូបខ្ញុំ»។
គួរបញ្ជាក់ផងដែរថា តារាសម្តែងលោក កាវីន រូបនេះ ពិតជាកូនកត្តញ្ញូ ដោយកាលពីម្តាយរបស់លោកជួបទុក្ខលំបាកនោះ លោកលះបង់អ្វីសព្វបែបយ៉ាងក្នុងការជួយដល់ម្ដាយ ព្រោះលោកខ្លាចការបាត់បង់ ដោយកាលពីកន្លងទៅ លោកក៏បានបាត់បង់ឪពុកទាំងក្មេងខ្ចី ហើយអោយលោកតស៊ូជាមួយម្តាយដែលជាស្ត្រីពិការផងដែរ៕
អត្ថដោយដោយ ៖ លីហួ គីមឆាយ
ចែករំលែកព័តមាននេះ