រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ ព្រោះតែខឹងនឹងសង្សារមិនព្រមចូលទៅងូតទឹកជាមួយខ្លួន បែរជាបោ.កកន្ត្រកដាក់សាប៊ូចោល រួចជិះម៉ូតូហុងដាឌ្រីមឡើងស្ពានជ្រោយចង្វារ ហើយទៅលោ.តទឹកតែម្ដង បង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ ថ្ងៃទី១២ ខែមករា ឆ្នាំ២០២៤ នៅចំណុចលើស្ពានជ្រោយចង្វារ ស្ថិតក្នុងសង្កាត់ជ្រោយចង្វា ខណ្ឌជ្រោយចង្វារ រាជធានីភ្នំពេញ។
សេចក្តីរាយការណ៍បន្តថា បុរសខឹងសង្សារខាងលើនេះមានឈ្មោះ ប៉ែត ចាន់ អាយុ២១ឆ្នាំ ជាបុគ្គលិកក្រុមហ៊ុនវិរៈប៊ុនថាំ ស្នាក់នៅក្រុមហ៊ុន ស្ថិតក្នុងសង្កាត់ជ្រោយចង្វារ នឹងមានស្រុកកំណើតនៅខេត្តកំពង់ធំ ។
យោងតាមការបញ្ជាក់ពីនារីម្នាក់ ត្រូវជាសង្សាររបស់បុរសរងគ្រោះ បានប្រាប់ឲ្យដឹងថា «មុនកើតហេតុ ជនរងគ្រោះបានបបួលរូបនាងចូលទៅងូតទឹកជាមួយគ្នានៅក្នុងបន្ទប់ តែរូបនាងប្រកែកមិនព្រមចូលនោះទេ។ ពេលនោះ ក៏ធ្វើឲ្យជនរងគ្រោះមានចិត្តខឹងយ៉ាងខ្លាំង ក៏ទាញយកកន្ត្រកដាក់សាប៊ូបោ.កចោល រួចក៏ស្លៀកពាក់ទាញម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០២៤ ពណ៌ខ្មៅ ពាក់ផ្លាកលេខ កណ្តាល1AS-8689 ជិះចេញពីកន្លែងស្នាក់នៅក្នុងក្រុមហ៊ុនវីរៈប៊ុនថាំ រួចជិះក៏ឡើងលើស្ពានជ្រោយចង្វារ ស្រាប់តែមួយសន្ទុះក្រោយមក ក៏បានតេហៅរូបនាង ជាសង្សារឲ្យមកយកម៉ូតូត្រឡប់ទៅវិញ»។
ប្រភពដដែលបន្តថា «បន្ទាប់មក រូបនាងជាសង្សារ និងនារីម្នាក់ទៀតជាមិត្តរួមការងារ បាននាំគ្នារត់ឡើងលើស្ពានទាំងប្រញាប់បប្រញាល់។ លុះពេលឡើងមកដល់ រូបនាងជាសង្សារក៏បានយកកាតាបមួយឲ្យទៅបុរសរងគ្រោះជាសង្សារ ពេលនោះដែរ ជនរងគ្រោះក៏បានទុកស្បែកជើងមួយគូរ និងកាតាបមួយ រួមទាំងទូរស័ព្ទមួយគ្រឿងចោលនៅលើស្ពាន ហើយក៏លោ.តចូលទៅក្នុងទន្លេលិចបាត់តែម្តងទៅ។ ភ្លាមនោះដែរ នារីជាសង្សារក៏អង្គុយយំ រួចស្រែកឱ្យអ្នកធ្វើដំណើរឆ្លងកាត់ជួយ និងទាក់ទងទៅសមត្ថកិច្ចមូលដ្ឋាន ដើម្បីឱ្យចុះមកទីតាំងកើតហេតុភ្លាមៗផងដែរ»។
ក្រោយពេលកើតហេតុ សមត្ថកិច្ចមូលដ្ឋានឡើងមកដល់កន្លែងកើតហេតុ រួចនាំនារីជាសង្សារ និងម៉ូតូជនរងគ្រោះ យកទៅប៉ុស្តិ៍នគរបាលរដ្ឋបាលសង្កាត់ជ្រោយចង្វារ ដើម្បីសួរនាំបន្តជុំវិញរឿងហេតុការណ៍ខាងលើ បន្ទាប់មកធ្វើកំណត់ហេតុ រួចប្រគល់ម៉ូតូទៅឲ្យនារីជាសង្សារវិញ៕
ចែករំលែកព័តមាននេះ