អាជីវករដែលលក់ដូរគ្រឿងរណ្តាប់សែនព្រេនសម្រាប់បុណ្យចូលឆ្នាំចិនខាងមុខនេះ កំពុងមមាញឹករៀបចំបញ្ជាការទិញទំនិញដែលចាំបាច់នានា ដើម្បីបម្រើសេចក្តីត្រូវការរបស់ប្រជាពលរដ្ឋដែលមានឈាមជ័រកាត់ខ្សែស្រឡាយចិន-វៀតណាមរៀបចំនៅក្នុងខែកុម្ភៈខាងមុខនេះ ។
អ្នកស្រី ហួច ចិន្តា អាយុ៤០ឆ្នាំជាអ្នកលក់ផ្លែឈើមួយរូបបានអោយកម្មវិធីលុយ នៃសារព័ត៌មានកោះសន្តិភាពដឹងថា ឆ្នាំនេះអាចមានអ្នកទិញច្រើនដោយសារក្នុង១ថ្ងៃៗអ្នកស្រីអាចលក់ដាច់បានច្រើនគីឡូផ្លែឈើដែរ ហើយក្នុងថ្ងៃចូលឆ្នាំចិនខាងមុខអ្នកស្រីរំពឹងថា នឹងលក់បានកាន់តែច្រើន ។
អ្នកស្រី ហួច ចិន្តា បន្តថា «អត់អីដែរចេះតែទៅ ក្នុងមួយថ្ងៃបាន១លានជាង។ ពេលខ្លះក៏៣លានទៅតាមផ្លែឈើថ្លៃឬថោក ។ ដូចជាប៉ោមមានមួយគីឡូ២ម៉ីនរៀលជាងទៅ៣ម៉ីនរៀល ។ ខ្ញុំលក់បានច្រើនដែរ ហើយនៅពេលចូលឆ្នាំចិនខាងមុខខ្ញុំសង្ឃឹមថា អាចចូល១០លានរៀលជាង »។
អ្នកស្រី ហួច ចិន្តា បានបញ្ជាក់ថា តាមទំនៀមទម្លាប់ចិនការសែនព្រេន ផ្លែឈើ តំណាងឱ្យការនាំសំណាង និងតាមជំនឿផ្សេងៗគ្នាហើយអតិថិជនតែងតែមកទិញជារៀងរាល់ឆ្នាំ ។
កញ្ញា ឡាំ ហួរ អាយុ២៧ឆ្នាំ ជាអ្នកលក់នំគ្រប់ប្រភេទបានអោយដឹងដែរថា ការលក់នំពងទាសម្រាប់សែនផ្តើមដាច់ពីបីថ្ងៃមកហើយ ហើយវានឹងដាច់រហូតដល់ថ្ងៃដែលគេត្រូវសែនតែម្តង ។ ចូលឆ្នាំចិនឆ្នាំនេះការលក់នំទំនងជាដាច់គួរសម បើធៀបជាមួយនឹងឆ្នាំមុនៗ ។ កញ្ញា ម្ចាស់អាជីវកម្ម ម៉ាក់អាតួលក់នំរូបនេះបន្ថែមថា «វាអត់ទៀងទេពីមួយឆ្នាំទៅមួយឆ្នាំ វាបែងចែកគ្នាអត់ត្រូវ ។ ប៉ុន្តែចូលឆ្នាំចិនវាអត់ដែលស្ងាត់ទេ ។ យើងនិយាយអត់ត្រូវជួនកាលមានច្រើន ហើយរឹតតែច្រើនជាងហ្នឹងទៀតក៏មានដែរ» ។
នំគ្រប់ប្រភេទដែលកញ្ញា ឡាំ ហួរ លក់មានតម្លៃពី១២.០០០រៀលឡើងទៅ ។ ក្រៅពីនំដែលផលិតក្នុងស្រុកក៏នូវមាននំផ្សេង២ទៀតដែលនាំចូលពីប្រទេសចិន ហើយចូលឆ្នាំចិននៅកម្ពុជា មិនដែលចោលនំទាំងនោះទេ ។ នំភាគច្រើនធ្វើនៅរាជធានីភ្នំពេញ និងក្រុងតាខ្មៅ ខេត្តកណ្តាល ។
កញ្ញា ឡាំ ហួរ បន្តថា «បើចំនួននំយើងអត់ដែលរាប់ទេ យើងអត់ដែលរាប់ថា យើងមួយថ្ងៃលក់បានប៉ុន្មាន ព្រោះយើងអត់មានពេលទំនេររាប់ ។ យើងរវល់លក់យើងមិនមែនលក់តែនំនេះមួយមុខ ។ យើងលក់នំខ្មែរនំច្រើនមុខព្រមទាំង ស្ករគ្រាប់ ។ អ៊ីចឹងយើង អត់អាចកំណត់ចំនួនបាននោះទេ គឺយើងលក់យកតែម្តង» ។
ដោយឡែក អ្នកស្រី ជា ចន្ថា ហៅម៉ី ជាអាជីវករលក់ដូរសាច់ជ្រូកក្នុងផ្សារអូឬស្សីបានអោយដឹងថា សម្រាប់ស្ថានភាពទីផ្សារសាច់ជ្រូកសព្វថ្ងៃស្ងាត់ណាស់ ហើយណាមួយសាច់ជ្រូកឥឡូវវាសម្បូរដែរ ។ វាសម្បូរហូហៀរពេក ហើយគេក៏លក់ច្រើនពេកដែរ ។ អ្នកស្រីបានបន្តថា «តម្លៃវាទៅតាមសាច់ សាច់ចែឡាំងលក់៣ម៉ីនរៀល បើសាច់ធម្មតាលក់២៥.០០០ ។ ថ្ងៃធម្មតាលក់មិនទៀងទេ ជួនកាល៣០ ជួនកាល៤០គីឡូក្រាមបើចូលឆ្នាំ ចិនអាចលក់ប្រហែលជា២ទៅ៣ជ្រូកឆ្នាំនេះមិនទៀងទេ» ៕ ស និត
ចែករំលែកព័តមាននេះ