ខណៈពេលជិះម៉ូតូចេញពីលេងផ្ទះពូមីង ហើយត្រឡប់ទៅបន្ទប់ជួលខ្លួនឯងវិញ ក៏ស្រាប់តែត្រូវយុវជនមួយក្រុម មានគ្នាជា១០នាក់ ប្រដាប់ដោយដាវ និងកាំបិ.ត រួចធ្វើសកម្មភាពកា.ប់ម៉ូតូ និងយុវជនជាម្ចាស់ម៉ូតូ បណ្តាលឲ្យ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនម្នាក់ ខណៈពេលជិះម៉ូតូចេញពីលេងផ្ទះពូមីង ហើយត្រឡប់ទៅបន្ទប់ជួលខ្លួនឯងវិញ ក៏ស្រាប់តែត្រូវយុវជនមួយក្រុម មានគ្នាប្រមាណ១០នាក់ ប្រដាប់ដោយដាវ និងកាំបិ.ត រួចធ្វើសកម្មភាពកា.ប់ម៉ូតូ និងយុវជនជាម្ចាស់ម៉ូតូ បណ្តាលឲ្យរងរបួស ហើយដកសោម៉ូតូ រួចនាំគ្នីគ្នាជិះរត់គេចខ្លួនបាត់ស្រមោលអស់ បង្កឱ្យមានការភ្ញាក់ផ្អើលកាលពីវេលាម៉ោង៨និង៥០នាទីយប់ ថ្ងៃទី១០ ខែមករា ឆ្នាំ២០២៤ នៅជិតដេប៉ូតេលា ផ្លូវ៣០ម៉ែត្រ ហៅទ្រុងមាន់ កែងផ្លូវបុរីភ្នំពេញ ស្ថិតក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ អំ ពន្លក ភេទប្រុស អាយុ១៩ឆ្នាំ មុខរបរខាងដេគ័រ ស្នាក់នៅបន្ទប់ជួល ជិតផ្សារទួលពង្រ និងមានស្រុកកំណើតនៅស្រុកកំពង់ត្របែក ខេត្តព្រៃវែង។
បើតាមសម្តីយុវជនរងគ្រោះ បានប្រាប់ឱ្យដឹងថា «មុនពេលកើតហេតុ រូបគេបានជិះម៉ូតូម៉ាក ហុងដាឌ្រីម ស៊េរីឆ្នាំ២០២៣ ពណ៌ខ្មៅ ពាក់ស្លាកលេខ ព្រៃវែង1W 4889 ចេញពីកន្លែងធ្វើការ ហើយក៏ឈាងចូលលេងផ្ទះពូមីង នៅម្តុំផ្សារសូឡា»។
ប្រភពដដែលបានបន្តថា «បន្ទាប់និយាយលេងជាមួយមីងពូរួចហើយ រូបគេក៏ជិះម៉ូតូបន្តចេញពីផ្ទះពូមីង ក្នុងគោលបំណងទៅបន្ទប់ជួលរបស់ខ្លួនវិញនៅម្តុំទួលពង្រ ខណ្ឌពោធិ៍សែនជ័យ ដោយធ្វើដំណើរតាមបណ្ដោយផ្លូវបុរីភ្នំពេញ ទិសដៅពីកើតទៅលិច។ លុះមកដល់ចំណុចកើតហេតុ ដែលជាផ្លូវកែង៣០ម៉ែត្រ ក៏ស្រាប់តែមានយុវជនមួយក្រុម មានគ្នាប្រមាណ១០នាក់ និងម៉ូតូជាច្រើនគ្រឿង ក្នុងនោះមានម៉ូតូនិច និងហុងដាឌ្រីម ហើយក្នុងដៃប្រដាប់ដោយដាវ និងកាំបិ.តប៉័ងតោ បានធ្វើសកម្មភាពដេញតាមពីក្រោយ រួចកា.ប់ បណ្តាលឲ្យរងរបួសខ្នង។ បន្ទាប់មកក្រុមជនបង្កទាំងនោះ ក៏បានកា.ប់ម៉ូតូទៀត បណ្តាលឲ្យរងការខូចខាត ព្រមទាំងដកយកសោម៉ូតូរបស់គាត់ រួចនាំគ្នីគ្នាជិះរត់គេចខ្លួនបាត់ស្រមោលអស់ ដោយបន្សល់ទុកតែកាំបិ.តប៉័ងតោ១នៅកន្លែងកើតហេតុតែប៉ុណ្ណោះ»។
ពាក់ព័ន្ធក្នុងករណីខាងលើនេះដែរ តាមប្រភពពីពលរដ្ឋ បានដាក់ការសង្ស័យថា «អាចជាករណីបម្រុងកា.ប់ប្ល.ន់យកម៉ូតូ ព្រោះជនរងគ្រោះមិនដែលមានទំនាស់ជាមួយអ្នកណានោះទេ»។
ក្រោយពេលកើតហេតុ ដោយសារតែមិនឃើញមានសមត្ថកិច្ចចុះទៅដល់កន្លែងកើតហេតុ ជនរងគ្រោះក៏សម្រេចចិត្តនាំពូក្មួយរុញម៉ូតូ រួមទាំងកាំបិ.តប៉័ងតោ ដែលជាវត្ថុតាំង យកទៅទុកផ្ទះសិន លុះព្រឹកឡើងចាំមកទៅដាក់ពាក្យបណ្ដឹងតាមក្រោយ ដើម្បីឱ្យសមត្ថកិច្ចជួយធ្វើការស្រាវជ្រាវស្វែងរកជនបង្ក យកមកចាត់ការតាមនីតិវិធីនៃច្បាប់ផងដែរ៕
ចែករំលែកព័តមាននេះ