រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា សង្ស័យបង្កាត់ភ្លើងចង្ក្រានពន្លត់មិនបានត្រឹមត្រូវ បង្កឱ្យមានការឆាបឆេះរាលដាលកម្ទេចឈើនៅលើដំបូលផ្ទះល្វែងរបស់ជនជាតិបរទេសរស់នៅមួយកន្លែង ផ្អើលអស់ប្រជាពលរដ្ឋ និងសមត្ថកិច្ចនាំគ្នាជួយពន្លត់ បង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី៨ ខែមករា ឆ្នាំ២០២៤ នៅចំណុចផ្ទះយីហោ «BUFFALO SISTER» ស្ថិតតាមបណ្ដោយផ្លូវ៤៥៤ ស្ថិតក្នុងសង្កាត់ទួលទំពូងទី១ ខណ្ឌចំការមន រាជធានីភ្នំពេញ។
បើប្រភពព័ត៌មាន បានប្រាប់ឱ្យដឹងថា ទីតាំងខាងលើនេះ ត្រូវបានជួលឱ្យជនជាតិបរទេសម្នាក់ ធ្វើការលក់ដូរបែបអឺរ៉ុប តែដោយសារលក់មិនដាច់ ទើបទីតាំងនោះត្រូវបិទទ្វារឈប់លក់ ហើយមានជនបរទេសម្នាក់ស្នាក់នៅ»។
ប្រភពដដែលបន្តថា «លុះមកដល់ម៉ោងកើតហេតុ ពួកគាត់ជាអ្នកជិតខាង មិនដឹងថា តើមានរឿងអ្វីនោះទេ? ស្រាប់តែឃើញមានអណ្ដាតភ្លើង និងផ្សែងហុយនៅជាន់លើដំបូលផ្ទះ ចឹងហើយពួកគាត់ក៏បានការឆោឡោ ហើយក៏មានបងប្អូនប្រជាពលរដ្ឋខ្លះរស់នៅលើខុនដូរនៅក្បែរនោះនាំគ្នាយកទឹកមកជួយជះពន្លត់»។
ប្រភពដដែលបន្តទៀតថា «ចំណែកអ្នកខ្លះទៀតក៏រាយការណ៍ជូនកម្លាំងសមត្ថកិច្ចមូលដ្ឋាន ដើម្បីសុំជំនួយរថយន្ដពន្លត់អគ្គិភ័យរបស់ការិយាល័យបង្ការពន្លត់អគ្គិភ័យស្នងការរាជធានីភ្នំពេញ អោយមកជួយអន្តរាគមន៍ចំនួន៣គ្រឿង តែមិនបានបា.ញ់ទឹកនោះទេ ព្រោះត្រូវបានបងប្អូនប្រជាពលរដ្ឋយកបំពង់ពន្លត់អគ្គិភ័យមកបា.ញ់អស់ចំនួន២បំពង់ និងយកទឹកមកជះ ទើបធ្វើឱ្យអណ្ដាតភ្លើងរលត់ទៅវិញនៅពេលវេលាម៉ោង១១និង៤៥នាទីយប់ថ្ងៃដដែលវិញ»។
ពាក់ព័ន្ធក្នុងហេតុការណ៍ខាងលើនេះដែរ មិនមានការឆេះរាលដាលដល់ផ្ទះសម្បែងរបស់បងប្អូនប្រជាពលរដ្ឋណាផ្សេងទៀតនោះទេ គឺគ្រាន់តែខូចខាតសម្ភារៈ កម្ទេចឈើ និងចង្ក្រាន១ប៉ុណ្ណោះ។ ហើយចំពោះមូលហេតុសង្ស័យថា «បង្កាត់ភ្លើងចង្ក្រានមិនបានពន្លត់ឱ្យបានត្រឹមត្រូវ» ចំណែកមូលហេតុអ្វីផ្សេងទៀតនោះ សមត្ថកិច្ចកំពុងតែធ្វើការស្រាវជ្រាវជាបន្តទៀត៕
ចែករំលែកព័តមាននេះ