សិល្បករល្បីៗរំពឹងថា ឲ្យតែសេដ្ឋកិច្ចល្អ ពលរដ្ឋសម្បូរលុយនោះទីផ្សារការងារ និងសេវាកម្មរបស់សិល្បករ និងសិល្បការិនីក៏សម្បូរសប្បាយទៅតាមនោះដែរ ។
ពាក់ព័ន្ធនឹងបរិយាកាសការងារ ក៏ដូចជា សេវាកម្មទីផ្សារសិល្បៈនាឆ្នាំ២០២៤នេះ អ្នកសិល្បករ បានបង្ហាញនូវសុទិដ្ឋិនិយមប្រាប់កម្មវិធីលុយនៃសារព័ត៌មានកោះសន្តិភាពថា ឆ្នាំ២០២៤ជាឆ្នាំមួយដែល ប្រជាជនកម្ពុជាសម្បូរសប្បាយ ហើយអាចនឹងចាយវាយកាន់តែច្រើន ជាងប៉ុន្មានឆ្នាំមុនៗ ដោយសារតែស្ថានភាពសេដ្ឋកិច្ចកាន់តែអំណោយផលទៀតនោះធ្វើអោយកម្មវិធីជាច្រើននឹងប្រារព្ធឡើងមានការប្រគុំតន្ត្រី បុណ្យទាន អាពាហ៍ពិពាហ៍ ជាដើម ។
ពូ ឃ្លាំង ជាអ្នកចម្រៀមរ៉េប បានអោយដឹងថា ឆ្នាំ២០២៤នេះ ជាឆ្នាំមួយដែលអ្នកសិល្បៈមានទីផ្សារការងារធ្វើច្រើន ជាពិសេស គឺក្រោយពេលដែលកូវីដ១៩រសាយទៅ ហើយស្ថានភាពកំពុងតែប្រសើរ ។
ពូ ឃ្លាំង បានអោយដឹងថា «មើលទៅ២០២៤ជាឆ្នាំសុខសប្បាយ ឆ្នាំដែលប្រជាជនយើងរស់បានស្រួល អត់អីពិបាកច្រើន ។ អ៊ីចឹងគេមានពេលវេលាដើរលេងច្រើន គេសល់លុយចាយច្រើន ជាពិសេសក្រុមហ៊ុនធំៗមានពេលបង្ហាញរបស់គេបាន ដូច្នេះសិល្បកររបស់យើងមានជម្រើសបានច្រើនមានឱកាសរកលុយបានច្រើនដែរ» ។
ពូ ឃ្លាំង បន្ថែមថា ប្រសិនបើប្រទេសកម្ពុជាមានសង្គ្រាម ឬបញ្ហាកូវីដ១៩នោះ លោកជឿថា ទីផ្សារការងាររបស់អ្នកសិល្បៈក៏មិនមានច្រើនដូចជាពេលនេះដែរ ។ ឆ្នាំ២០២៤នេះ ទីផ្សារការងាររបស់អ្នកសិល្បៈកាន់តែរីកចម្រើន ដោយសារបច្ចុប្បន្នជាសម័យបច្ចេកវិទ្យា ធ្វើអោយ ពួកគាត់កាន់តែមានទំនាក់ទំនងជិតស្និទ្ធជាមួយនឹងអតិថិជន ។
ពូ ឃ្លាំង បន្តថា «យើងកាលមុន គ្រាន់តែឃើញទូរស័ព្ទស្មាតហ្វូនយើងថា អស្ចារ្យ យើងឃើញ WIFI យើងថា អស្ចារ្យ ឥឡូវសម័យ AI វាគុណនឹង១០ដង ។ ដូច្នេះវាធ្វើអោយសិល្បករយើងងាយស្រួល សូម្បីតែសិល្បករចាស់ៗមួយចំនួន ដែលគាត់អត់មានវិធីជួយខ្លួនឯង ប៉ុន្តែគាត់មានសមត្ថភាពអាចមកវិញបានយ៉ាងស្រួលយ៉ាងងាយ» ។
ដោយឡែក លោក យ៉ែម សំអូន ដែលជាសិល្បករជើងចាស់មួយរូបទៀតបានបន្ថែមថា ស្ថានភាពទីផ្សារការងាររបស់អ្នកសិល្បៈ នៅពេល បច្ចុប្បន្នកំពុងមានសន្ទុះកើនឡើង ក្រោយការរីករាលដាលនៃមេរោគកូវីដ១៩ ក្នុងប្រទេសកម្ពុជា។ លោក យ៉ែម សំអូន បន្ថែមថា « ខ្ញុំផ្តោតតែលើវិស័យចម្រៀង ឬក៏ការរៀបចំការប្រគុំតន្ត្រី ពិធីអាពាហ៍ពិពាហ៍ ពិធីផ្សេងៗទេ ប៉ុន្តែបើធៀបនឹងសិល្បៈរួម សិល្បៈទី៧របស់យើងមានទាំងផ្នែកភាពយន្តមានទាំងផ្នែកចម្រៀងទាំងសកម្មភាពផ្សេងៗរបស់សិល្បៈឃើញថា មានភាព រស់រវើកគ្រប់យ៉ាង» ។
លោក យ៉ែម សំអូន បន្ថែមថា បើនិយាយពីការងារសិល្បៈរបស់លោក ក៏ដូចជា ប្អូនៗសិល្បករ សិល្បការិនី គ្រប់ផ្នែកនៃសិល្បៈលោកបានសង្កេតឃើញថា មានភាពរស់រវើកគ្រប់យ៉ាង ៕ ដោយ ៖ ស និត
ចែករំលែកព័តមាននេះ