តម្លៃប្រេងធ្លាក់ចុះ១០%នៅឆ្នាំនេះ ដោយសារបញ្ហាជួញដូរ ភូមិសាស្ត្រនយោបាយ និងផលិតកម្ម
អន្តរជាតិ ៖ តម្លៃប្រេងឆៅបានធ្លាក់ចុះជាង ១០% នៅក្នុងឆ្នាំ ២០២៣ ដែលជាឆ្នាំដ៏ច្របូកច្របល់លើ
អន្តរជាតិ ៖ តម្លៃប្រេងឆៅបានធ្លាក់ចុះជាង ១០% នៅក្នុងឆ្នាំ ២០២៣ ដែលជាឆ្នាំដ៏ច្របូកច្របល់លើការជួញដូរ ដែលត្រូវបានសម្គាល់ដោយភាពចលាចលភូមិសាស្ត្រនយោបាយ និងការព្រួយបារម្ភអំពីកម្រិតនៃផលិតកម្មប្រេងរបស់ប្រទេសផលិតធំៗ នៅជុំវិញពិភពលោក។
ប្រេងឆៅប្រភេទ Brent នៅថ្ងៃទី២៩ ខែធ្នូ ឆ្នាំ២០២៣ ដែលជាថ្ងៃជួញដូរចុងក្រោយនៃឆ្នាំនេះ បានទូទាត់ក្នុងតម្លៃ ៧៧.០៤ដុល្លារក្នុង១បារ៉ែល ពោលធ្លាក់ចុះ ១១សេន ឬ ០.១៤%។ ចំណែកប្រេងឆៅ West Texas Intermediate របស់អាមេរិកបានទូទាត់ក្នុងតម្លៃ ៧១.៦៥ដុល្លារក្នុង១បារ៉ែល ពោលធ្លាក់ចុះ ១២សេន ឬ ០.១៧% ។ ការជួញដូរប្រេងឆៅទាំងពីរបានធ្លាក់ចុះជាង ១០% ក្នុងឆ្នាំ ២០២៣ ដើម្បីបិទឆ្នាំនៅកម្រិតចុងឆ្នាំទាបបំផុតមិនធ្លាប់មានចាប់តាំងពីឆ្នាំ ២០២០។
ការស្ទង់មតិរបស់ទីភ្នាក់ងារសារព័ត៌មាន Reuters លើអ្នកសេដ្ឋកិច្ច និងអ្នកវិភាគចំនួន៣៤នាក់ បានព្យាករណ៍ថា ប្រេងឆៅ Brent នឹងមានតម្លៃជាមធ្យម ៨២.៥៦ដុល្លារក្នុង១បារ៉ែលក្នុងឆ្នាំ ២០២៤ ពោលគឺធ្លាក់ចុះពីចំនួន ៨៤.៤៣ដុល្លារ កាលពីខែវិច្ឆិកាកន្លងទៅ ខណៈដែលពួកគេរំពឹងថា កំណើនសេដ្ឋកិច្ចពិភពលោកចុះខ្សោយជះឥទ្ធិពលទៅលើតម្រូវការ បូកផ្សំជាមួយនឹងភាពតានតឹងភូមិសាស្ត្រនយោបាយ ដែលកំពុងបន្តផងដែរ។
អ្នកវិភាគក៏បានចោទសួរថា តើអង្គការនៃប្រទេសនាំចេញប្រេង និងសម្ព័ន្ធមិត្ត ឬអង្គការ OPEC+ នឹងអាចប្តេជ្ញាចិត្តចំពោះការកាត់បន្ថយការផ្គត់ផ្គង់ ដែលពួកគេសន្យាថានឹងជំរុញតម្លៃបានដែរឬទេ0x017d7 បច្ចុប្បន្ន OPEC+ កំពុងកាត់បន្ថយផលិតកម្មប្រហែល៦លានបារ៉ែលក្នុង១ថ្ងៃ ដែលស្មើប្រហែល ៦% នៃការផ្គត់ផ្គង់ពិភពលោក។ OPEC កំពុងប្រឈមមុខនឹងការធ្លាក់ចុះនៃតម្រូវការ សម្រាប់ប្រេងឆៅរបស់ខ្លួននៅក្នុងឆមាសទី១ នៃឆ្នាំ ២០២៤ ខណៈចំណែកទីផ្សារពិភពលោកបានធ្លាក់ចុះដល់កម្រិតទាបបំផុតចាប់តាំងពីជំងឺកូវីដ-១៩ លើការកាត់បន្ថយទិន្នផល និងការដកខ្លួនចេញរបស់ប្រទេសអង់ហ្គោឡាពីក្រុមមួយនេះ។ ទន្ទឹមនឹងនេះ សង្គ្រាមនៅមជ្ឈិមបូព៌ាបានជំរុញឱ្យមានការរំខានដល់ការផ្គត់ផ្គង់ ដែលអាចកើតមាននៅក្នុងប៉ុន្មានខែចុងក្រោយនៃឆ្នាំ ២០២៣ ដែលត្រូវបានគេរំពឹងថា នឹងបន្តរហូតដល់ឆ្នាំ ២០២៤ ។
នៅក្នុងខែធ្នូ ការវាយប្រហារដោយក្រុមសកម្មប្រយុទ្ធហ៊ូធី (Houthi) របស់ប្រទេសយេម៉ែន លើនាវាដឹកជញ្ជូនដែលឆ្លងកាត់ផ្លូវសមុទ្រក្រហម បានបង្ខំឱ្យបណ្តាក្រុមហ៊ុនធំៗ ផ្លាស់ប្តូរទិសដៅការដឹកជញ្ជូនរបស់ពួកគេ។ ទោះបីជាក្រុមហ៊ុនមួយចំនួន កំពុងរៀបចំដើម្បីបន្តការដឹកជញ្ជូនតាមប្រឡាយ Suez យ៉ាងណាក៏ដោយ ក៏នាវាដឹកប្រេងឆៅ និងផលិតផលចម្រាញ់មួយចំនួន នៅតែជ្រើសរើសផ្លូវវាងនៅជុំវិញទ្វីបអាហ្វ្រិក ដើម្បីជៀសវាងជម្លោះដែលអាចកើតមានក្នុងតំបន់។ ភាពតានតឹងភូមិសាស្ត្រនយោបាយនៅមជ្ឈិមបូព៌ា បានកើនឡើងនៅប៉ុន្មានថ្ងៃចុងក្រោយនៃឆ្នាំនេះ នៅពេលអ៊ីស្រាអែលបានបង្កើនការវាយប្រហាររនៅតំបន់ហ្គាហ្សាភាគខាងត្បូង ដោយដាក់សម្ពាធកាន់តែខ្លាំងទៅលើតម្លៃប្រេង៕ (ប្រភព ៖ Reuters)
ចែករំលែកព័តមាននេះ